ەكى كوزى كورمەيتىن ماسكەۋلىك ورىس قىزى قازاق اندەرىن جاتقا ايتىپ تاڭعالدىرۋدا

استانا. قازاقپارات - ماسكەۋ قالاسىندا تۇراتىن ۆيكتوريا اندرەيەۆانىڭ تۋعالى ەكى كوزى كورمەيدى.
None
None

مۇمكىندىگى شەكتەۋلى بولسا دا ۆيكانىڭ ومىرگە دەگەن قۇشتارلىعى زور. ەڭ قىزىعى دا سول، ول قازاق اندەرىن ءسۇيىپ تىڭدايدى. سونىڭ ارقاسىندا از عانا ۋاقىتتىڭ ىشىندە ول قازاق ءتىلىن مەڭگەرىپ العان. بۇگىندە قازاق تىلىندە اكسەنتسىز سويلەيتىن ۆيكتوريا كوپشىلىكتى تاڭعالدىرۋدا.

بۇل تۋرالى «قازاقستان» ۇلتتىق ارناسىنىڭ جاڭالىقتار قىزمەتىندە ايتىلدى.

18 جاستاعى ۆيكتوريا الەۋمەتتىك جەلىدەگى قازاق دوستارىمەن سويلەسۋ ارقىلى قازاقشا ۇيرەنگەن.

«العاشقىدا قايرات نۇرتاستىڭ ءانىن تىڭدادىم. سوسىن سوزدەرىن تۇسىنەيىن دەپ عالامتور ارقىلى قازاقتارمەن تانىسا باستادىم. ولار ماعان ءاندى اۋدارىپ بەردى. تاعى ءبىراز سوزدەردى ۇيرەتتى. كەيىن ءبىراق ونىڭ ءبارى ۇمىتىلدى. ال باتىردىڭ «وتان انا» ءانىن ەستىگەندە جان دۇنيەمدە ءبىر وزگەرىس بولدى. سوسىن قايتسەم دە قازاق ءتىلىن ۇيرەنەمىن دەپ الدىما ماقسات قويىپ ءبىرجولا كىرىستىم. شىنىمدى ايتسام، ورىستارعا قاراعاندا قازاقتارمەن سويلەسكەندە ءوزىمدى جاقسى سەزىنەمىن. سەبەبى قازاقتار وزگەلەرگە قاراعاندا مەيىرىمدى، اشىق، شىنايى حالىق»، - دەيدى ۆيكتوريا.

بويجەتكەن جازعى دەمالىستا قازاقستانعا اتباسىن بۇرۋدى كوزدەپ وتىر. ول قازاق حالقىمەن جۇزدەسىپ، تىلدەسكىسى كەلەدى. اناسى مەن اجەسى بولسا ونىڭ قىزىعۋشىلىعىنا قۇرمەتپەن قارايدى. ءتىپتى، ۆيكتوريانىڭ ارقاسىندا قازاقشا ۇيرەنگىسى كەلەتىندەرىن جاسىرمايدى.

«مەن نەگىزى ناعىز ورىستىڭ ايەلىمىن. ورىستىڭ كوڭىلدى، ويناقى اندەرىن تىڭدايتىنمىن. ءبىراق سوڭعى كەزدەرى ۆيكا ايتىپ جۇرگەن قازاقشا اندەر ماعان دا ۇناپ قالدى. سوزدەرىن ۇقپاسام دا، قازاقتىڭ اندەرىن جان دۇنيەممەن تۇسىنەمىن. ءتىپتى، ورىستىڭ اندەرىنە قاراعاندا قازاقتىڭ اندەرىن كوبىرەك قالايتىن بولدىم. مىنا تۇرىممەن بىرتە بىرتە مەن دە قازاقشا سويلەيتىن شىعارمىن» ، دەيدى ۆيكتوريانىڭ اجەسى رايسا گۋدىما.

ال ۆيكتوريانىڭ ءوزى تازا قازاق تىلىندە:

«مەن ۆيكتوريا اندرەيەۆا، مەنىڭ جاسىم 18 دە. مەن ماسكەۋ قالاسىندا تۇرامىن. قازىرگى ۋاقىتتا قازاق ءتىلىن ۇيرەنىپ جاتىرمىن. قازاقستانعا سالەم ايتىڭىز. راحمەت. ساۋ بولىڭىز»، - دەپ قوشتاستى.

سوڭعى جاڭالىقتار