ماسكەۋلىكتەر قازاقتىڭ ساۋمالىنا قىزىعىپ ءجۇر

«ازىرشە، ماسكەۋدەگى قازاقستان پاۆيلونىندا، كوبىنەسە ءىرى تاۋار وندىرۋشىلەردىڭ ونىمدەرى ساتىلادى. البەتتە، وعان شاعىن جانە ورتا بيزنەستىڭ دە اتسالىسقانى دۇرىس. بۇگىندە ول جەردە ۇن مەن ۇن ونىمدەرىنە دەگەن سۇرانىس جوعارى بولىپ تۇر. «ساۋمال» اتتى ءونىمدى ساتۋ كورسەتكىشى دە تاڭ قالدىردى. ءبىز دەگۋستاتسيانى وتكىزگەندە وعان سۇرانىس وتە جوعارى بولدى. بۇدان بولەك، حالال تاعامدارىنا دا سۇرانىس جاقسى. قازىر شۇجىق ونىمدەرىنە تاپسىرىس كوپتەپ ءتۇسىپ جاتىر»، - دەدى اناربايەۆا بۇگىن «سامعاۋ» بايقاۋىنىڭ جەڭىمپازدارىن ماراپاتتاۋ ءراسىمى اياسىندا.
ونىڭ ايتۋىنشا، ماسكەۋدە ساتىلاتىن قازاقستاندىق تاۋارلاردىڭ ساپاسى جاقسى. الايدا سىرتقى وراما جانە ديزاين جاعىن ءالى جەتىلدىرۋ كەرەك.
ايتا كەتەيىك، بۇگىن استانادا «سامعاۋ» ۇلتتىق بايقاۋىنىڭ ايماقتىق اتالىمدارى بويىنشا جەڭىمپاز اتانعان جۋرناليستەر ماراپاتتالدى. الداعى ناۋرىز ايىندا ماسكەۋ قالاسىندا بايقاۋدىڭ باس جۇلدەسى - جەڭىل كولىكتى تاپسىرۋ ءراسىمى وتەدى. وعان تاعى 8 جۋرناليست تالاسىپ وتىر.
اۆتور: ارمان اسقاروۆ