اتىشۋلى «كەلىن» فيلمىنىڭ اكتريساسى توسەك ساحنالارىنا قالاي تۇسكەنىن ەلگە جايىپ سالدى
بۇل تۋرالى ول 31-ارناداعى «ۇيات ەمەس» باعدارلاماسىندا ايتتى.
اكتريسا گۇلشارات جۇبايەۆا بۇكىل قازاق قوعامىن ءدۇر سىلكىندىرگەن فيلمدە توسەك ساحنالارىنا قالاي تۇسكەنىن اشىپ ايتتى.
- ول كادرلارعا تۇسپەيمىن دەپ ايتتىم، توقتاتپاق بولدىم. فيلمنىڭ ورتاسىنا كەلگەندە ءوزىمدى ەكراننان كورىپ قالدىم دا، قارسىلىق ءبىلدىردىم. ول كەزدەگى «قازاقفيلمنىڭ» باسشىلارى مەنى سول ءۇشىن ورتاعا الىپ، «ويلان، ويتكەنى بۇل مەملەكەتتىك قارجىعا ءتۇسىرىلىپ جاتىر، اۋەسقوي فيلم ەكەن دەپ ويلاما، مەن دارداي ستسەناريست، مەن دارداي رەجيسسەر سەنىڭ الدىڭدا ويناپ ءجۇر ەكەنبىز عوي» دەگەن سياقتى اۋىر سوزدەر كەلدى.
«مەملەكەتتىڭ قارجىسىنا ەكى اي تۇسەسىڭ دە، جول ورتاعا كەلگەندە قارسى بولىپ، تۇسپەي قوياتىن كىمسىڭ سەن» دەدى ولار. باسىندا مەملەكەتتىك قارجىعا ءتۇسىرىلىپ جاتىر، ول جامان بولۋى مۇمكىن ەمەس دەگەن ءۇمىت تە بولدى. ءبىراق ورتاسىنا كەلگەندە ءوزىمدى ەكراننان كورىپ قالدىم دا، قورقىپ كەتتىم. جاۋىپ قويامىز، پەردە بولادى دەپ الداۋسىراتقان ەدى. بۇلاي قاتتى اشىق تۇسىرەدى دەپ ويلاعان جوقپىن. دەگەنمەن، ارتقا قايتار مەندە جول بولعان جوق. ويتكەنى اۋىلعا قايتا المادىم. وسىعان دەيىن كورگەن قانشاما قيىنشىلىقتاردان كەيىن اۋىلعا سۇمىرەيىپ بارىپ تۇرعىم كەلمەدى. اتىراۋ قالاسىنا كەلىپ، بىرەۋدىڭ ۇيىندە ءۇي قىزمەتشىسى دە بولدىم. كافەدە دە، دۇكەندە دە ىستەدىم. ىستەمەگەن كاسىبىم قالمادى. ءتىپتى پودەزدە تۇنەگەن كۇنىمىز دە بولدى.
قازىر ەلدەر اقشا ءۇشىن ىستەدى دەپ ايتادى عوي. ءبىراق كىم اقشا ءۇشىن ىستەمەيدى؟ سودان تاپقان اقشانىڭ بارلىعى، شىنى كەرەك، ءوزىمنىڭ ەمىمە كەتتى. بۇل فيلمنەن كەيىن قاتتى، وتە قاتتى اۋىردىم، اسقازانىم اۋىردى. قىتايعا بارىپ ەمدەلىپ، اقشانىڭ بارلىعى سوعان كەتتى»، - دەدى اكتريسا.
- مەنىڭ ەستۋىمشە، بۇل فيلمگە ءتۇسۋ ءۇشىن ساعان اشى سۋ بەرگەن دەيدى؟
- جوق ولاي ەمەس. بۇل ءسوز وتكەن جىلى شىقتى. گيپنوز ىستەپتى دەگەن سياقتى سوزدەر تاراپ كەتتى. ەگەر ويتەتىن بولسام، مەن ارى قاراي كينوعا تۇسپەس ەدىم. ماماندار بىلەدى عوي، ەكران الدامايدى. ەكراندا مەن اشى سۋ ءىشىپ وينايتىن بولسام، ول كورىنىپ تۇرار ەدى. ءارى قاراي ۇدەتكىم كەلگەن جوق بۇل اڭگىمەنى. ايتپەسە بۇل سوزگە جاۋاپ بەرۋىم كەرەك ەدى. بۇل فيلم رەجيسسەرىنىڭ جىلدار وتكەننەن كەيىن قايتادان سونى سەنساتسيا قىلعىسى كەلىپ، جاساعان پيار قادامى دەسەم بولار ەدى.
- سەن سوندا ەرمەك تۇرسىنوۆقا رەجۋلىسىڭ بە؟ وسى ايتقان سوزدەرى ءۇشىن؟
- ارينە رەنجۋلىمىن، ارينە. ءبىر جاعىنان ماعان وتە اۋىر ءتيدى. مەن قازىر بىرەۋدىڭ جارىمىن، ەكى بالانىڭ اناسىمىن. كەلىنمىن. جىلدار وتكەننەن كەيىن مەن ءسويتىپ ءتۇسىردىم دەپ ماقتانىپ، بولماعان زاتتى بولدى دەپ، اتىراۋدا تويدا بيلەپ جۇرگەن جەرىنەن الىپ كەلدىم دەپ، بۇكىل شىندىقتى ىسىرىپ قويىپ ينتەرۆيۋ ەتىپ بەرگەن. ول سۇحباتىنىڭ قاي جەرى وتىرىك، قاي جەرى شىن ەكەنىن مەن دالەلدەپ بەرە الام.
قۇجاتتار دا جيناي الام. سەبەبى، مەنى رەجيسسەر ەسەبىندە بەكىتكەن ول ەمەس. وعان دەيىن باسقا رەجيسسەر بولاتىن. بۇكىل اكتەرلىك قۇرام بولەك بولاتىن. بۇل ءفيلمدى ءتۇسىرىپ باستاعاندا، باستاپقىدا مۇنداي اشىق تۇسىرىلىمدەر بولعان دا جوق. جاقسى ءتۇسىرىلىپ باستاعان. ءبىراق فيلمنىڭ العاشقى نۇسقاسىن كوركەمدىك جەتەكشىلەر كورگەننەن كەيىن، ول وتپەي قالدى. ول نۇسقا ەكى اي تۇسىرىلگەن بولاتىن. قايتادان اكتەرلەردى اۋىستىردى، رەجيسسەر دە اۋىستى. سەناريستىڭ ءوزى ەرمەك تۇرسىنوۆ بولىپ كەلدى. مەنى قالدىردى، قاينى رولىندەگى اكتەردى قالدىردى. باسقالارى اۋىستى.
- كوپتەگەن سۇحباتىندا ەرمەك تۇرسىنوۆ كەلىسپەيتىن، وتىرىگى كوپ ايتتى دەپ وتىرسىڭ. ول قانداي اڭگىمەلەر؟
- مەنى اتىراۋدان بيلەپ جۇرگەن كەزىنەن الىپ كەلدىم دەپ ايتاتىنعا ۇقسايدى. مەن وقىدىم مۇنىڭ بارلىعىن. مەن ودان ءارى قاراي شۋ شىعارعىم كەلمەدى. جايىما قالدىرعانىن قالادىم. ماعان تىنىشتىق كەرەك. شىن مانىندە ءبىراز ادامدارعا بارىپ، جۇگىرىپ تە كوردىم. سۇحباتىندا ايتقان سوزدەرىن قايتا الىپ، كەشىرىم سۇرايتىنداي نە ىستەۋگە بولادى دەپ ويلاندىم.
ءبىراق مەنى كەزىندە ۇگىتتەگەن ادامداردىڭ ىشىنەن «وسىلاي ساعان جالا جابىلىپ جاتىر ەكەن عوي، سەنى ماس قىلىپ ءتۇسىردىم دەپ جاتىر ەكەن عوي. ول وتىرىك ءسوز، مەن قاسىندا بولدىم عوي» دەپ ايتاتىن ەشكىم تابىلعان جوق.
- وسى باعدارلاما شىققاننان كەيىن قانشاما ءسوز بولاتىنىن سەزىپ وتىرسىڭ. ولارعا نە دەپ جاۋاپ بەرەر ەدىڭ؟
- كىم نەگە سەنسە، سوعان سەنە بەرسىن. مەن ەشكىمنىڭ الدىندا ەشتەڭە دە دالەلدەگىم كەلمەيدى.
