قاراعۇسوۆا زەينەتاقى قورىنان مەرزىمىنەن بۇرىن قارجى الۋدى قولدايدى

استانا. قازاقپارات - ق ر پارلامەنتى ءماجىلىسىنىڭ دەپۋتاتى گۇلجان قاراعۇسوۆا ءبىرىڭعاي جيناقتاۋشى زەينەتاقى قورىنىڭ جاڭا باسشىسى ءنۇربيبى ناۋرىزبايەۆانىڭ ءبىلىم الۋعا، ەمدەلۋگە جانە نەسيەگە زەينەتاقى جيناعىنان اقشا الۋ مۇمكىندىگىنە قاتىستى ۇسىنىسىنا وراي پىكىر ءبىلدىردى،

دەپ حابارلايدى قازاقپارات.

«بۇل ماسەلەنى بارىنشا تىڭعىلىقتى تالقىلاۋ قاجەت. مۇنداي حالىقارالىق تاجىريبە بار. ءبىراق، وندا بارىنشا وزەكتى ەسەپتەۋلەر جۇرگىزۋ كەرەك. كەيبىر سالىمشىلاردا بەلگىلى ءبىر قارجىنىڭ بار ەكەندىگى جاسىرىن ەمەس. الايدا، ول قاجەتتى سوماسىن العان سوڭ ودان ءومىر سۇرۋىنە قاجەتتى تىم بولماعاندا ورتاشا دەڭگەيدە قارجىسى قالۋى ءتيىس. ەندىگى ۋاقىتتا ىنتىماقتى زەينەتاقى بولمايدى. جيناقتاۋشى جانە بازالىق زەينەتاقى عانا قالادى. مەن مينيستر بولعاندا جالاقى وتە تومەن ەدى. ءبىز بۇل تاجىريبەنى زەردەلەگەنبىز»، - دەدى قاراعۇسوۆا.

بۇعان دەيىن حابارلانعانداي، ەگەر ءتيىستى زاڭناماعا وزگەرىستەر ەنگىزىلسە، قازاقستاندىقتار زەينەتاقى جيناقتارىنىڭ ءبىر بولىگىن وقۋعا، ەمدەلۋگە نەمەسە يپوتەكا الۋعا جۇمساي الادى.

«قازىر بۇل ماسەلە (زەينەتاقى جيناقتارىن مەرزىمىنەن بۇرىن شەشىپ الۋ - اگەنتتىك) تالقىلانىپ جاتىر. ۇلتتىق بانك ءتوراعاسى دا بۇل ماسەلە تۋرالى ايتقان، ياعني بۇل الەمدىك تاجىريبە بولعاندىقتان، تالقىلاپ جاتىرمىز. ەگەر بۇل زاڭمەن بەكىتىلسە، زەينەتاقى قورىنىڭ ءبىر بولىگى ەڭ كەرەكتى دۇنيەلەرگە، ەمدەلۋگە، ءبىلىم الۋعا نەمەسە يپوتەكا الۋعا بەرىلەدى. قازىرگى تاڭدا ازاماتتارعا ەڭ قاجەتتى وسى ءۇش باعىت الىنىپ وتىر»، - دەدى «ب ج ز ق» اق باسقارما ءتوراعاسى ءنۇربيبى ناۋرىزبايەۆا.

 اۆتور: مارلان جيەمباي