تۇلكىباس اۋدانىنىڭ اتاۋى تۇركىباسى بولىپ وزگەرۋى مۇمكىن

شىمكەنت. قازاقپارات - وڭتۇستىك قازاقستان وبلىسى، تۇلكىباس اۋدانىنىڭ تۇرعىنى، اۋداندىق ىشكى ىستەر ورگانى ارداگەرلەر كەڭەسىنىڭ ءتوراعاسى ساۋران تاڭاتبايەۆ باستاعان ءبىر توپ بەلسەندى اۋداننىڭ اتىن وزگەرتۋدى ۇسىنادى، دەپ حابارلايدى قازاقپارات.
None
None

 «بۇل ماسەلە بۇرىن دا بىرنەشە رەت كوتەرىلگەن. اۋداننىڭ اتى بۇرمالانعانى كوپشىلىككە دە، تاريحشى عالىمدارعا دا بەلگىلى. ول جايلى اكادەميك ادىلبەك بايباتشا، پروفەسسور مەكەمتاس مىرزاحمەتوۆ تە ايتىپ ءجۇر. تاريحي دەرەك بويىنشا، 6-7 - عاسىردا بۇل جەردە اتاقتى تۇرىكباسى ەستەمەس دۋلى قاعان شاتىرىن تىگىپ، ەل باسقارعان، مەملەكەتتىك ساياساتتى جۇرگىزىپ وتىرعان. سونىڭ قۇرمەتىنە تاۋ تۇركىباسى دەپ اتالىپ كەتكەن. ەل ءالى كۇنگە سول تاۋدىڭ توبەسىندەگى تۇركىباسى اۋليە بۇلاعىنا بارىپ، زيارات جاساپ تۇرادى. ءبىراق بەرتىن كەلە جەردىڭ دە، اۋداننىڭ دا اتى بۇرمالانىپ كەتتى»، - دەيدى ارداگەرلەر كەڭەسىنىڭ ءتوراعاسى.

 ساۋران تاڭاتبايەۆتىڭ ايتۋىنشا، اۋداننىڭ اتاۋى ءتىپتى جەرگىلىكتى اقىننىڭ ايتىستا جەڭىلۋىنە سەبەپ بولعان كورىنەدى.

«باسقا اۋداننىڭ اقىنى ءبىزدىڭ ايتىسكەردى: تۇلكىنىڭ باسى بولسا دا قانشا ءبىر قات، اۋدانىڭنىڭ تاريحي اتاۋىن تاپ. بولماسا تۇلكىنىڭ باسىمەن ايتىسپايمىن، ادام باسى بولماساڭ، اۋزىڭدى جاپ، - دەپ ءبىر شۋماق ولەڭمەن جەڭىپ كەتكەن ەكەن»، - دەيدى ساۋران تاڭاتبايەۆ.

بەلسەندىلەر بۇل وتىنىشتەرىن حاتقا ءتۇسىرىپ، ەلباسى ن. نازاربايەۆتىڭ اتىنا جولداعان. قازىر بۇل حات قارالىپ، و ق و اكىمىنە جىبەرىلگەن ءتارىزدى.

«بىزگە سونداي جاۋاپ كەلدى. ەندى بىلۋىمىزشە، ول ماسەلە تۇلكىباس اۋدانىنا جولدانادى. اكىمدىك پەن اۋداندىق ءماسليحات ءتيىستى شەشىم شىعارىپ، وبلىستىق ونوماستيكالىق كوميسسيادا قارالادى. سوڭعى شەشىمدى رەسپۋبليكالىق ونوماستيكالىق كوميسسيا قابىلدايدى. ەگەر ۇسىنىسىمىزدى قولداسا، اۋدان اتى تۇركىباسى بولىپ وزگەرۋى ءتيىس» - دەيدى تاڭاتبايەۆ.

جانات نۇر

سوڭعى جاڭالىقتار