رەجيسسەر «الماس قىلىشتى» قىتايداعى قانداستارىمىزعا كورسەتۋگە قاتىستى وتىنىشكە جاۋاپ بەردى

قازاقپارات تىلشىسىنە سۇحبات بەرگەن رەجيسسەر رۇستەم ءابدىراش قانداستارىمىزدىڭ وسى ءبىر وتىنىشىنە جاۋاپ بەردى.
«بۇنىڭ ءبارى ديستريبيۋتورعا بايلانىستى. بىزدە مىنا جاقتا ءبىر ديستريبيۋتور بولعان. قازىر سونى تابا الماي وتىرمىز. قىتاي جاقتا ءجۇر- اۋ دەيمىن. سول جاقتان ديستريبيۋتور بولامىز دەسە، ءبىز دايىنبىز. قىتايدىڭ بارلىق اۋداندارىنا شىقپاي- اق قويايىق، ەڭ باستىسى، ءۇرىمجى جاقتاعى ديستريبيۋتسياعا وتكىزۋگە ادام بولسا، كەلىسىمشارتتى راسىمدەپ، فيلمدى اپارىپ كورسەتۋگە بولادى»، - دەيدى ءابدىراش.
رەجيسسەردىڭ سوزىنە قاراعاندا، باس كەزىندە ۇسىنىستار بولعان. ءبىراق الدىمەن قازاقستانداعى پروكاتتى رەتتەپ الۋ قاجەت ەدى. ەندىگى كەزەكتە سان الۋان فەستيۆالدەر ارقىلى فيلمدى شەتەلگە شىعارۋ، مۇمكىندىك بولسا، پروكاتقا شىعارۋ شارالارى قولعا الىنادى.
«ەگەر قىتاي جاقتاعى قازاقتاردان ديستريبيۋتور بار، ءوزىمىز كورسەتەمىز دەپ، ۇسىنىس جاساسا، ءبىز كەزدەسىپ، كەلىسىمشارتقا وتىرۋعا ءازىرمىز. ويتكەنى قىتايدا دا بيۋروكراتيا بار. ول جاقتا پروكاتقا شىعۋ ءۇشىن كۆوتا قاجەت. ال سول جاقتاعى قازاقتاردىڭ ىشىندە ءسوزى وتەتىن ازاماتتار تابىلسا، فيلمدى تەزدەتىپ كورسەتۋگە بولادى. ءبىز ءوز تاراپىمىزدان دايىنبىز»، - دەپ اتار كورسەتتى رەجيسسەر.
ايتا كەتەيىك، قاڭتاردىڭ 5- كۇنى «قازاق حاندىعى. الماس قىلىش» فيلمى پروكاتقا شىققان بولاتىن. «قازاقپارات» ح ا ا ءتىلشىسى تاريحي تۋىندىنى كينوتەاتردان ءبىرىنشى بولىپ تاماشالاعان كورەرمەندەردىڭ پىكىرىن جازىپ العان ەدى. رەجيسسەر رۇستەم ءابدىراشتىڭ ءوزى حالىقتىڭ وي- پىكىرىن ءبىلۋ ماقساتىندا كينوتەاترلاردى جاسىرىن ارالاپ جۇرگەنىن جەتكىزگەن.
اۆتور: ارمان اسقاروۆ
***
(ديستريبيۋتور - 1. ءىرى وندىرىستىك فيرما- وندىرۋشىلەردەن دايىن ءونىمدى كوتەرمە باعامەن ساتىپ الۋ نەگىزىندە، ونى ساتۋمەن اينالىساتىن فيرما.
2. كەلىسىلگەن اۋماق پەن رىنوك شەگىندە، بەلگىلى ءبىر تاۋار نەمەسە قىزمەتتى كوتەرمەلەپ ساتۋعا جانە ساتىپ الۋعا ەرەكشە نەمەسە ارتىقشىلىق قۇقىق بەرىلەتىن زاڭدى تۇلعا نەمەسە ازامات.)