كونگرەستىڭ كەي مۇشەلەرى ترامپتى ۇلىقتاۋعا قاتىسپايتىندارىن ايتادى

NBC تەلەارناسى ەفيرىنەن قاڭتاردىڭ 15-ىندە كورسەتىلەتىن سۇحباتتا ا ق ش كونگرەسى وكىلدەر پالاتاسىنىڭ مۇشەسى، ازاماتتىق قۇقىقتار ءۇشىن كۇرەس ارداگەرى دەموكرات دجون ليۋيس ترامپتى زاڭدى سايلانعان پرەزيدەنت دەپ مويىندامايتىنى تۋرالى مالىمدەگەن. ا ق ش- تاعى پرەزيدەنت سايلاۋىنا رەسەيدىڭ ىقپال ەتكەنى تۋرالى بارلاۋ مالىمەتتەرى جونىندەگى حابارلارعا قاتىستى پىكىر بىلدىرگەن ول دەموكراتتاردان پرەزيدەنتتىككە كانديدات حيللاري كلينتوننىڭ سايلاۋدا جەڭىلۋىن ناق وسى جايتپەن بايلانىستىرعان.
كونگرەستىڭ وزگە مۇشەلەرى ترامپ ايەلدەر تۋرالى، الەۋمەتتىك ازشىلىقتار مەن شەتەلدىكتەرگە قاتىستى «ادەپسىز» سوزدەر ايتقانى ءۇشىن ونىڭ يناۋگۋراتسياسىنا قاتىسقىلارى كەلمەيتىندىگىن ايتقان.
ازاماتتىق قۇقىقتار ءۇشىن قوزعالىس بەلسەندىلەرى 20- قاڭتاردا بەلگىلەنگەن دونالد ترامپتىڭ يناۋگۋراتسياسى الدىندا نارازىلىق اپتاسىن باستاماقشى. «ۇلتتىق ارەكەت» قوزعالىسى جەتەكشىسى ال شارپتون سەنبى كۇنى ۆاشينگتوندا باستالاتىن شەرۋگە ءوز جاقتاستارى جانە وزگە دە بىرنەشە قوزعالىس وكىلدەرى قاتىساتىنى تۋرالى مالىمدەدى. ونىڭ سوزىنشە، بۇل شەرۋ اق ۇيدەگى بيلىككە كەلەتىن جاڭا اكىمشىلىكتىڭ ەلدەگى سايلاۋ قۇقىعى، دەنساۋلىق ساقتاۋ جانە قىلمىستىق قۇقىق سالالارىندا جۇزەگە اسىرۋ بەلگىلەنگەن رەفورمالاردان باس تارتۋىنا، سونىمەن بىرگە يمميگرانتتارعا قارسى شارالاردى كۇشەيتۋىنە جول بەرمەۋ ماقساتىن كوزدەيدى.
www.azattyq.org