استانادا وپەرا ونەرىنىڭ دۇنيەجۇزىلىك كونكۋرسى وتكىزىلەدى

جيىرما بەسىنشى رەت ۇيىمداستىرىلعالى وتىرعان وپەرا ونەرىنىڭ دۇنيەجۇزىلىك كونكۋرسى ق ر مادەنيەت جانە سپورت مينيسترلىگى قولداۋىمەن 2017 -جىلدىڭ 24 - 29 - شىلدەسى ارالىعىندا «استانا وپەرا» ساحناسىندا وتكىزىلەدى.
- «استانا وپەرا» تەاترىنىڭ ونەر ۇجىمى «ەكسپو-2017» كورمەسىنە وراي، ەستە قالارلىق كەرەمەت شارالار باعدارلاماسىن ازىرلەدى. سولاردىڭ قاتارىندا «وپەراليا» دا بار. ماەسترو دومينگونىڭ الەمدىك وپەرا ونەرىنە قوسقان ۇلەسىنە باعا جەتپەيدى. مۇنداي دەڭگەيدەگى تۇلعامەن بىرگە جۇمىس جاساۋ - ءبىز ءۇشىن ۇلكەن ماقتانىش، - دەيدى «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى عالىم احمەدياروۆ.
«وپەراليا» بايقاۋىنا 18 بەن 32 جاس ارالىعىنداعى كەز كەلگەن ءانشى (باس داۋسىنان باستاپ، سوپرانوعا دەيىن) قاتىسا الادى. استاناعا دۇنيەءجۇزىنىڭ تۇكپىر- تۇكپىرىنەن 40 جۋىق دارىندى ۆوكالشىلار كەلەدى. الدىن- الا ىرىكتەۋ ەلەكتروندىق ءوتىنىش بويىنشا 2016 -جىلدىڭ جەلتوقسانىنان باستاپ، 2017 -جىلدىڭ اقپانىنا دەيىن جۇرەدى. بايقاۋ ءۇش كەزەڭنەن تۇرادى جانە ماەسترو دومينگونىڭ «استانا وپەرا» سيمفونيالىق وركەسترىنە جەتەكشىلىك ەتۋىمەن وتەتىن جەڭىمپازداردىڭ گالا كونسەرتىمەن اياقتالادى.
«وپەرا كورولى» جانە «قازىرگى زاماننىڭ كورنەكتى وپەرا ءارتىسى» اتانىپ كەتكەن پلاسيدو دومينگو، بولاشاعىنان ۇلكەن ءۇمىت كۇتتىرەتىن جاس انشىلەرگە ۇنەمى ەرەكشە كوڭىل بولەدى، سەبەبى ونەر جولىنىڭ باستاۋىندا كەزدەسەتىن قيىنشىلىقتى تالاي ءوز باسىنان كەشىردى.
- «وپەرالياداعى» مەنىڭ مىندەتىم ۇزدىك داۋىستاردى ىرىكتەپ قانا قويماي، بولاشاقتا ناعىز ءارتىس شىعۋى مۇمكىن دەگەن ەرەكشە، مىنەزدى، اكتەرلىق شەبەرلىگى بار انشىلەردىڭ تالانتىن اشۋ. وسىنداي جاستار ناعىز جۇلدىزعا اينالادى، - دەيدى ماەسترو دومينگو.
بايقاۋدىڭ جۇلدە قورى - 180000 دوللارى. ەرلەر مەن ايەلدەر داۋسى اراسىندا 1, 2 جانە 3 سىيلىق يەلەرىن ماراپاتتاۋمەن قاتار، جۇلدەلەر قاتارىندا ر. ۆاگنەر جانە ر. شتراۋستىڭ رەپەرتۋارىنان وپەرانى ۇزدىك ورىنداعان ءۇشىن ب. نيلسوننىڭ سىيلىعى، ۇزدىك ورىندالعان سارسۋەلالار ءۇشىن (يسپاندىق وپەرەتتاعا جاقىن ساحنالىق- مۋزىكالىق جانر) پەپيتا ەمبيل دە دومينگو مەن ۇلكەن پلاسيدو دومينگونىڭ سىيلىعى جانە كورەرمەن كوزايىمىنىڭ جۇلدەسى جانە ت. ب. بار.
«وپەراليانىڭ» ۆيسە- پرەزيدەنتى الۆارو دومينگو دەلەگاتسياسىمەن بىرگە ەلوردا تەاترىندا بولدى. كىشى دومينگو مىرزا، «استانا وپەرا» تەاترىندا مۇنداي دەڭگەيدەگى بايقاۋدى وتكىزۋگە بارلىق جاعداي جاسالعانىن اتاپ ءوتتى.
- استانادا بولعان ساپارىمىزدىڭ ناتيجەسىنە وتە ريزامىن. جاڭا، قازىرگى زامانعا ساي تەاتر ەڭ سوڭعى ۇلگىدەگى تەحنيكامەن جابدىقتالعان: مۇنداعى رەپەتيسيا، گريمدەۋ زالدارى، وركەستر شۇڭقىرى، ساحنا، ءبارى كەرەمەت. وركەستر مەن حوردىڭ جوعارى دەڭگەيى، سونداي- اق، ءار قىزمەتكەردىڭ جۇمىسقا دەگەن وڭ كوزقاراسى جاعىمدى اسەر قالدىردى. تەاتر باسشىلىعىمەن وتكەن كەزدەسۋ ەكى جاققا دا ءتيىمدى بولدى. بىرلەسكەن ەڭبەگىمىز جەمىسىن بەرىپ، الداعى ايلاردا جۇزەگە اسىراتىن «وپەراليانىڭ» بۇل شىعارىلىمى، بۇعان دەيىنگىلەرىنەن دە ءساتتى وتەدى دەپ ۇمىتتەنەمىن، - دەپ قورىتىندىلادى الۆارو دومينگو.
العاش رەت ايگىلى گراند- وپەرا ساحناسىندا وتكەن كونكۋرستىڭ نەگىزى 1993 - جىلى پاريجدە قالانعانىن ەسكە سالا كەتەيىك. سودان بەرى «وپەراليا» جىل سايىن ءتۇرلى ەلدىڭ ەڭ ايگىلى الاڭدارىندا وتكىزىلىپ كەلەدى. ولاردىڭ قاتارىندا - اڭىزعا اينالعان ميلاندىق لا سكالا، لوندونداعى «كوۆەنت- گاردەن»، كورولدىك تەاتر (مادريد، يسپانيا)، فيلارمونيكو تەاترى (ۆەرونا ق. يتاليا) جانە ت. ب. وتكەن جىلدارى «وپەراليادا» جەڭىسكە جەتىپ، اسقاق ونەرگە جولداما العان الەمدىك وپەرا ساحناسىنىڭ بۇگىنگى جۇلدىزدارى - دجويس دي دوناتو، رولاندو ۆيللازون، ەرۆين شروتت، سونيا يونچيەۆا، نينا شتەممە، حوسە كۋرا، دجوزەف كاللەيا، ينۆا مۋلا جانە باسقالارى.
پلاسيدو دومينگونىڭ بۇكىلالەمدىك وپەرا انشىلەرىنە ارنالعان «وپەراليا» بايقاۋىن «Rolex» كومپانياسى ۇسىنادى.
بايقاۋدىڭ تالابىمەن جانە جاڭالىعىمەن وپەراليا سايتىندا تانىسۋعا بولادى.