اقمولا وبلىسىندا ۇستاز وقۋشىنىڭ موينىنداعى پراۆوسلاۆيەلىك القانى شەشىپ تاستادى

مۇنى تەك وقۋشىنىڭ رۇقساتىن سۇراعاننان كەيىن عانا جاساعان. سىنىپ جەتەكشىسى مۇنى بيلەپ جۇرگەن قىزعا كەدەرگى بولماۋى ءۇشىن جاساعان ەكەن.
بۇل تۋرالى BNews.kz حابارلايدى.
تولىعىراق تىلشىگە جاعدايدى اقمولا وبلىسى ەسىل اۋدانى ماسكەۋ ورتا مەكتەبىنىڭ ديرەكتورى بايانداپ بەردى. وقيعا 2016 -جىلدىڭ جەلتوقسان ايىندا بولسا دا، باق- قا ەندى عانا بەلگىلى بولدى. ءبۇلدىرشىننىڭ اپكەسى اقمولا وبلىسىنىڭ ءبىلىم باسقارماسىنا حات جازعان. قانداي زاڭدا مۇنداي اشەكەيدى تاعۋعا تىيىم سالعاندىعىن سۇراعان.
«ءبىز بارلىق جاعدايدى رەتكە كەلتىردىك. اناسىنان دا كەشىرىم سۇرادىق. ۇستاز وعان ءدال وسىنداي القانى شىركەۋدەن ساتىپ الىپ بەردى. وقۋشىنىڭ اناسى دا مەكتەپتىڭ ۇستىنەن ارىزدانعىسى كەلمەيتىنى تۋرالى ايتتى. ىڭعايىسسىز جاعداي بولدى. بالالار بيلەپ ءجۇر ەكەن. بەلسەندى ءبي بارىسىندا القاسىمەن جاراقاتتانىپ قالماۋى ءۇشىن ۇستاز ونى شەشۋدى ۇسىندى. ۇستاز القانىڭ ءجىبىن شەشە الماعان. ارتىنشا وقۋشىنىڭ رۇقساتىمەن ونى قايشىمەن كەسكەن. ۇستاز مۇنداي ارەكەتكە قىزدىڭ جاعدايىن ويلاعاندىقتان عانا بارعان»، - دەيدى مەكتەپ ديرەكتورى سۆەتلانا ءبىرجانوۆا.
ديرەكتور بۇدان ءدىني- ساياسي استار ىزدەۋدىڭ جوق ەكەنىن دە ايتىپ ءوتتى. ال وقۋشىنىڭ اناسى يرينا كليمەنكو مەكتەپكە ەش وكپەسى جوق ەكەنىن جەتكىزدى.
«ءبىزدى ادەيىلەپ رەنجىتتى دەپ ويلامايمىن. مەن القانىڭ ءجىبىن قايتارۋدى تالاپ ەتتىم. ال حاتتى مۇنداي اشەكەيدى مەكتەپكە تاعۋعا بولىپ- بولمايتىنىن ءبىلۋ ءۇشىن جازدىم. تىيىم سالىنعان بولسا، سوعان قاتىستى قۇجاتتاردى كورمەك بولدىم. مۇنداي شۋدىڭ قاجەتى جوق ەدى»، - دەيدى ول.