ۋاقىتشا تىركەۋ كوممۋنالدىق تولەمدەرگە اسەر ەتپەيدى - كوشى-قون باسقارماسى

استانا. قازاقپارات - استانا قالالىق ىشكى ىستەر دەپارتامەنتى كوشى-قون باسقارماسىنىڭ باسشىسى گۇلۆيرا دونەنبايەۆانىڭ ايتۋىنشا، بۇگىندە ۋاقىتشا تىركەۋ ماسەلەسىن سان-ساققا جۇگىرتۋدىڭ قاجەتى جوق.

اتالعان شارا ءۇي سالىعىنا، دا، كوممۋنالدىق تولەمدەرگە دە اسەر ەتپەيدى، دەپ حابارلايدى قازاقپارات ءتىلشىسى.

«ءتىپتى، پاتەر جالداۋشىنى ۋاقىتشا تىركەۋگە قويسا، ول مەنشىك قۇقىعىنا تالاسا الادى دەگەن ۇرەي دە بار. ءبىراق ءبىز ىلعي ايتامىز، ۋاقىتشا تىركەۋ ارقىلى ونداي ارەكەتتەردى جاساۋ مۇمكىن ەمەس. سوسىن ول جەردە ۋاقىتشا تىركەۋدىڭ ناقتى مەرزىمى جازىلادى. ۋاقىت وتكەندە ول ادامدى اۆتوماتتى تۇردە تىركەۋدەن شىعارىپ تاستايدى. ال كوممۋنالدىق تولەمدەرگە كەلەر بولساق، ۋاقىتشا تىركەۋدىڭ وعان ەش قاتىسى جوق. ءبىزدىڭ دەرەكتەر بازالارىمىز ەكى بولەك جانە ءبىر- بىرىمەن بايلانىسپاعان. مىسالى، قازاقستان رەسپۋبليكاسى ازاماتتارىن قۇجاتتاندىرۋ بازاسى بار. تىركەۋدەن كەيىن بارلىق دەرەكتەر جەكە تۇلعالار مالىمەتتەرىنىڭ مەملەكەتتىك بازاسىنا تۇسەدى. وعان بارلىق مەملەكەتتىك ورگاندار كىرە الادى. ونى كۇندەلىكتى جۇمىس ءۇشىن پايدالانادى. باسقا ماقساتتار ءۇشىن پايدالانۋعا رۇقسات جوق. كوممۋنالدىق قىزمەتتەرمەن اينالىساتىن كومپانيالار وعان كىرە المايدى»، - دەدى دونەنبايەۆا «قازاقپارات» تىلشىسىنە بەرگەن سۇحباتىندا.

ايتا كەتەيىك، قاڭتاردىڭ 7 ءسى كۇنى كۇشىنە ەنگەن زاڭناماعا سايكەس، ۋاقىتشا تىركەلمەگەنى ءۇشىن اكىمشىلىك جازا، ياعني ايىپپۇل سالۋ شاراسى ەنگىزىلگەن بولاتىن. ءبىر ايدىڭ ىشىندە تەك ءتۇسىندىرۋ مەن ەسكەرتۋ جۇمىستارى جۇرگىزىلەدى. ال اقپاننىڭ 7 سىنەن باستاپ تۇراقتى جانە ۋاقىتشا تىركەۋگە تۇرماعان ازاماتتارعا ايىپپۇل سالىنادى. ءۇيدىڭ قۇجاتتارى دايىن بولماسا، جۇمىس ورنى، ءيا بولماسا تۋىستاردىڭ مەكەنجايى بويىنشا ۋاقىتشا تىركەۋگە تۇرۋعا بولادى.

اۆتور: جاسۇلان جولدىبايەۆ