استانادا بالالارعا ارنالعان تەگىن باسكەتبول اكادەمياسى اشىلدى - فوتو

اكادەميا 8-14 جاس ارالىعىنداعى قىزدار مەن ۇلداردى جاتتىقتىرا الادى. جاتتىقتىرۋ قۇنى مۇلدە تەگىن. باس جاتتىقتىرۋشى - دەيان پارەجانين، سەربيا ازاماتى.
«راسىمەن، اكادەميا اشىلا قالعان وسى كەزەڭگە ءبىز سەربيادان مامان شاقىرتتىق. بۇل كىسى بالالار باسكەتبولىن عانا ەمەس، ەرلەر اراسىنداعى باسكەتبولدىڭ قىر- سىرىن جاقسى بىلەتىن ادام. ۇيرەنسىن دەپ ءوزىمىزدىڭ ەكى جاتتىقتىرۋشىنى قوستىق. جالپى، نەگىزگى ماقساتىمىز - شەتەلدەن مامان شاقىرۋ ەمەس، باستى ماقساتىمىز - بالالار باسكەتبولىن دامىتۋ»، - دەيدى وليمپيادا چەمپيونى، «استانا» باسكەتبول كلۋبىنىڭ باس ديرەكتورى ۆالەري تيحونەنكو.
ونىڭ ايتۋىنشا، استانانىڭ اۋا- رايى باسكەتبولدى دامىتۋ ءۇشىن مۇلدە كەدەرگى كەلتىرمەيدى. الماتىداعى باسكەتبولدىڭ دامۋى دا اۋا- رايىنا ەمەس، بۇل سپورتقا قانشالىقتى كوڭىل بولىنەتىنىنە بايلانىستى جانە باسكەتبول تەك الماتىدا دامىسىن دەگەن زاڭ جوق، دەگەن ويىن ايتتى ۆ. تيحونەنكو.
«الماتىنىڭ قانداي قالا ەكەنىن بىلەمىن، مەنىڭ ءوزىم - الماتىلىق ازاماتپىن. ءبىراق، استانانىڭ سونداي سۋىق بولعانى كەدەرگى كەلتىرەدى دەپ وتىرا بەرۋگە بولمايدى. استانادا باسكەتبول اكادەمياسىن اشپاۋ مۇمكىن ەمەس. سەبەبى، باسكەتبول كوبىنە جابىق نىساندا وينالاتىن سپورت ءتۇرى»، - دەگەن ويىن ايتتى تيحونەنكو.
اكادەمياعا قازىردىڭ وزىندە 60 بالا جازىلعان ەكەن. اقپان ايىنان باستاپ «استانا» باسكەتبول كلۋبى قالاداعى مەكتەپتەردە شەبەرلىك ساباقتارىن وتكىزىپ، بالالاردى قىزىقتىرا تۇسپەك.
اۆتور: كەنجەكەي توقتامۇرات قىزى