ەكى ءتۇرلى وتباسىندا تاربيەلەنگەن قىتايلىق ەگىز قىزدار العاش رەت كەزدەستى - فوتو

تۋعان باۋىرلاردىڭ العاشقى جۇزدەسۋىن جاقىندارى كوڭىلدەرى بوساي وتىرىپ باقىلادى.
دۇنيە ەسىگىن اشقاننان كەيىن ەكى قىزدى ەكى ءتۇرلى وتباسى اسىراپ العان. ارادا ون جىل وتكەن سوڭ امەريكانىڭ ۆيسكونسين شتاتىندا تۇراتىن ودري دەرينگ پەن ۆاشينگتوندا تۇراتىن گرەيسي رەينسبەرري جۇزدەستى، دەپ جازدى People.com.
ودريدىڭ اناسى دجەننيفەر دەرينگ قىزىنىڭ تۋعان باۋىرى بولسا ەكەن دەپ ارمانداعان. ءبىرشاما ۋاقىت بۇرىن ول الەۋمەتتىك جەلىدەن ءوز قىزىنان اۋمايتىن قىزدىڭ سۋرەتىن كورىپ قالعان. سۋرەتتە ول قىز اسىراپ العان اناسىنىڭ الدىندا وتىرعان.
«سول سۋرەتتى كورە سالىسىمەن الگى بالانىڭ كىم ەكەنىن انىقتاعىم كەلدى» ، - دەيدى ول.
بۇدان كەيىن دجەننيفەر الەۋمەتتىك جەلى ارقىلى گرەيسيدىڭ اناسى نيكولمەن بايلانىسقا شىققان.
ەگىزدەردى زەرتتەۋگە العان پسيحولوگ مامان نەنسي سيگال دنق ءاناليزىن جاساپ، گرەيسي مەن ودريدىڭ ەگىزدەر ەكەنىن دالەلدەدى.
ال بۇعان دەيىن ۆيدەو-حابارلاما ارقىلى تىلدەسكەن گرەيسي مەن ودري ءبىر- ءبىرىنىڭ بويىنان سىرت كەلبەتتەرىنەن وزگە دە ۇقساستىقتار تاپقان.
«ەكەۋمىز دە الفرەدو تاۋىعىن جاقسى كورەمىز. ەكەۋمىزدىڭ دە جاقسى كورەتىن تاعامىمىز سول. جانە ەكەۋمىز دە ىرىمشىكتى ۇناتامىز»، - دەيدى گرەيسي.
سونداي-اق، ەكى قىزدىڭ دا جۇرەگى اۋىراتىن بولىپ شىقتى. ا ق ش- قا كەلگەلى بەرى گرەيسيدىڭ جۇرەگىنە ەكى رەت، ال ودريگە ءبىر رەت وتا جاسالعان.
بۇل كۇن وقيعا كۋاگەرلەرىنە اينالعان ءاربىر جان ءۇشىن سەزىمگە، ەموتسياعا تولى بولدى. ءبىر- بىرىمەن قاۋىشىپ، كوز جاستارىنا ەرىك بەرگەن ەگىزدەردى كورگەندەردىڭ كوڭىلدەرى بوساپ كەتتى.