اڭساعان مۇستافا: ۇلتتىق ناقىشتاعى كيىمدەر قىمبات بولماۋى كەرەك - فوتو

ول قوعامداعى ءتۇرلى قۇبىلىستارعا كوزقاراسىن ءوزىنىڭ قاراپايىم، ءبىراق ماعىناسى تەرەڭ اق- قارا سۋرەتتەرىمەن بىلدىرەدى. ەgemen.kz ءتىلشىسى اڭساعان مۇستافامەن كەزدەسىپ، اڭگىمەلەسكەن ەدى.
- اڭساعان، ءسىزدىڭ الەۋمەتتىك تاقىرىپتاعى سۋرەتتەرىڭىز ادامدارعا وي سالادى. بۇرىن سۋرەتتەرىڭىز اپتاسىنا ءبىر رەت شىعاتىن ەدى. ءبىراق كەيىنگى ۋاقىتتارى كورمەي ءجۇرمىز. ونىڭ سەبەبى نە؟
- قازىر تۋرا سول قارقىنمەن، تۋرا سول ەكپىنمەن ۇلتتىق ناقىشتاعى فۋتبولكالار دايىنداپ جاتىرمىن. بۇرىن تاڭەرتەڭنەن كەشكە دەيىن الەۋمەتتىك تاقىرىپتاردى ويلاپ جۇرەتىنمىن. ال ءقازىر ۇجىمدا 7-8 ادام بار. ولاردى جيناپ الىپ، ءوزىم الەۋمەتتىك تاقىرىپتا سۋرەت سالىپ وتىرعانىم تاعى ءبىرتۇرلى سەكىلدى.
- نەگىزى، الەۋمەتتىك تاقىرىپقا قاشان، قالاي كەلدىڭىز؟
- قاراپ وتىرسام، ەڭ ءبىرىنشى سۋرەتىم 15 جاسىمدا سالىنعان ەكەن. ول «ۇيادا نە كورسەڭ، ۇشقاندا سونى ىلەسىڭ» دەپ اتالادى. كوبى تاڭ قالىپ، الەۋمەتتىك ماسەلەلەردى سۋرەتتەردى سويلەتە وتىرىپ كورسەتەسىڭ دەپ جاتادى.
اڭساعان مۇستافا، ۇيادا نە كورسەڭ، ۇشقاندا سونى ىلەسىڭ
اڭساعان مۇستافانىڭ العاشقى سۋرەتى
11 جاسىمدا انام «اق بوساعا» گازەتىن اشتى. مەن رەداكسيادا ءوستىم دەسەم دە بولادى. سول كەزدە ءتۇرلى تاعدىرلاردىڭ كۋاسى بولدىم. پروبلەمالاردى ءوز كوزىممەن كورگەن سوڭ، قورقىپ ءوستىم، كوڭىلگە تۇيگەنىم دە بولدى.
ءبىر كۇنى رەداكسياعا كەلگەن ايەل كۇيەۋى ۇرىپ-سوعاتىنىن ايتىپ، جاعدايىن ءتۇسىندىردى. الماتىداعى تۋىستارىن تاۋىپ العانشا بالاسىن قالدىرا تۇرايىن دەدى. ءسويتىپ، بالانى انام الىپ قالدى. ءبىراق كەشكە الگى ايەل كەلمەدى، ەرتەڭىندە دە سولاي. ول بالاسىن تاستاپ كەتكەنىن سەزگەندە، پوليتسيا شاقىردىق. ولار «نەگە ەرتە شاقىرماعانسىڭدار، بىرەۋدىڭ بالاسىن نەگە الىپ قالدىڭدار؟» دەپ ءوزىمىزدى سۇراقتىڭ استىنا الدى. الگى بالا جەتىمدەر ۇيىنە ءتۇستى. بالاعا ءۇش- ءتورت رەت باردىق. انامدى ماما دەپ، جىلاپ قالاتىن. كەلەسى بارعانىمىزدا بىزگە كەلمەدى. سول كەزدە ءوزىم كىشكەنتاي بالامىن. زارەم ۇشىپ، قورقىپ قالدىم. وسىنداي فاكتىلەر الەۋمەتتىك تاقىرىپتارعا بەت بۇرعىزدى. سونداي سۋرەتتەردى كوپ سالدىم.
- سۋرەتتەرىڭىزدىڭ حالىق اراسىندا كەڭ تاراي باستاعانى قاشان ەدى؟
- 2010 -جىلى فەيسبۋك الەۋمەتتىك جەلىسىنە تىركەلدىم. وندا اركىم ءوزىنىڭ ولەڭىن سالادى، اڭگىمە جازادى. ءسويتىپ لايكومانيا دەگەن اۋرۋعا ۇشىرادىق. ول كەزدە «اق بوساعا» گازەتىنە يلليۋستراتسيا سالاتىنمىن. گازەت شىققاندا ونى سۋرەتكە ءتۇسىرىپ، مىناۋ مەنىڭ جۇمىسىم دەپ كورسەتەتىنمىن. ءسويتىپ، لايك كوبەيە باستادى. سودان «اق بوساعا» گازەتى شىققانشا شىدامىم جەتپەي، ءبىرىنشى گازەتكە ەمەس، پاراقشاما سالا باستادىم. ويلاپ قاراسام، بۇل جاقسى دۇنيە ەكەن. سەبەبى، جەلىدەگى قىزدار سۋرەتتى كوردىم، ويلاندىم دەپ حات جازا باستادى. جاستار الەۋمەتتىك جەلىدە كوپ وتىراتىن بولعان سوڭ، ولارعا اسەر ەتەتىنىن كوردىم. بوسقا وتىرماي، ازداپ بولسا دا وسىنداي وي سالا جۇرەيىن دەپ شەشتىم.
- سۋرەت مەكتەبىندە وقىعانىڭىزدى بىلەمىز. وعان اۋىسۋىڭىزدىڭ ءوزى قىزىق ەكەن. سول تۋرالى ايتا وتىرساڭىز.
- 3 -سىنىپتى ءبىتىرىپ، جازعى دەمالىسقا شىققان بويدا اكەم «شاشىڭدى تاقىرلاتىپ الىپ تاستاساڭ، «كاما» ۆەلوسيپەدىن الىپ بەرەمىن»، دەدى. ءوزىم ۇل بالا سەكىلدى ءوستىم. سول ۋادە بويىنشا كانيكۋلعا شىعا سالىسىمەن شاشتى الدىق. ۆەلوسيپەد ارمانىم ەدى. شاش قاجەت ەمەس، ۆەلوسيپەد كەرەك (كۇلدى). ءبىر كۇنى مۇعالىمنىڭ شاقىرۋىمەن مەكتەپكە بارساق، مەنى كورگەن سىنىپتاستارىم دۋ كۇلدى. مەن ول مەكتەپكە بارماسپىن دەگەن سوڭ، اكە-شەشەم باسقا مەكتەپ ىزدەدى. ءسويتىپ، كوركەمسۋرەت كوللەدجى جانىنداعى مەكتەپكە اۋىستىم.
- بۇل مەكتەپكە اۋىسپاس بۇرىن وزىڭىزدە سۋرەت سالۋعا دەگەن اۋەستىك نەمەسە قابىلەت بولدى ما؟
- ونداي ەشتەڭە بولعان جوق. بارلىعىن مەكتەپتە ۇيرەتتى. شىنى كەرەك، ۇيگە جاقىن مەكتەپ بولعاننان كەيىن عانا باردىم. بىرەۋلەر تالانت دەپ جاتادى عوي. مەنىڭ ويىمشا، تالانتى بار ما، جوق پا ءبارىبىر، ادامدا ەڭبەك بولسا، ول كەز كەلگەن نارسەنى ۇيرەنىپ الادى.
- سول مەكتەپتەن كەيىن وسى باعىتپەن كەتتىڭىز بە؟
- ءيا. مەكتەپتەن كەيىن كوللەدجدە گرافيكالىق ديزاين، اكادەميادا ديزاينەرلىكتى وقىدىم.
- سۋرەتتەرىڭىزدىڭ ىشىندە تەلەفونعا تاۋەلدىلىك تۋرالى تاقىرىپ كوپ ەكەن.
- سۋرەتتەرىمنىڭ ءبارىن ويدان شىعارعانمەن، ءبارىبىر ومىردەن الامىن. ۇيدە، جۇمىستا، كوشەدە كورگەندەرىم يدەياعا اينالادى. ءقازىر تەلەفوننىڭ ايتقانىن ىستەيتىن بولدىق قوي. تەلەفوندى ۋاقىتىندا قۋاتتايمىز، قاجەت بولسا اقشا سالامىز. تەلەفوندى قۇشاقتاپ جاتامىز. ول دۇرىس ەمەس.
كوپ ادام ۇيلەرىندەگى كورىنىس تۋرا سول سۋرەتتەردەگىدەي ەكەنىن جازىپ جاتادى. كەيبىرەۋى سۋرەتكە قاراپ ىڭعايسىزدانىپ قالدىم دەيدى. بىرەۋلەر ۇرلىعىمدى اشىپ قويعانداي بولدىڭىز دەيدى.
تەلەفونعا بايلانىستى ەڭ ءبىرىنشى «كەش» دەگەن سۋرەت سالدىم. تاعى ءبىر سۋرەتكە جاندوس ءبايدىلدا دەگەن كىسى ء«بىر قولىمەن الەمدى، ءبىر قولىمەن بالانى تەربەتەدى» دەگەن ماقالدى الىپ، بەسىك تەربەتىپ وتىرعان انانىڭ ءبىر قولىنا تەلەفون ۇستاتىپ سالۋىمدى سۇرادى.
- سۋرەتتەرىڭىزدە وتباسىلىق پروبلەمالاردى دا كوپ قوزعايسىز. سولاردىڭ بىرنەشەۋىنە توقتالا كەتسەڭىز...
- سۋرەتتەرىمە يدەيا ايتاتىندار كوپ. وزىمە وي كەلگەندە ءسوزى دە، سۋرەت تە بىرگە كەلەدى. ال بىرەۋ ايتسا، كەيدە شىقپاي قالىپ جاتادى. كەيدە جاقسى يدەيالار ايتىلسا دا، ولاردى جەتكىزۋ قيىن بولادى. وتباسى تاقىرىبىنداعى سۋرەتتەر دە سولاي تۋىندادى.
بىردە جاڭالىقتاردان اكەسى بالاسىن ۇرعانى تۋرالى كورسەتتى. سوعان سالعان سۋرەتىمە جىگىتتەردىڭ ءوزى جىلاعىم كەلىپ كەتتى عوي دەپ جازىپ جاتتى.
اڭساعان مۇستافا، جەكسەنبىلىك اكە
مىنا سۋرەت «جەكسەنبىلىك اكە» دەپ اتالادى. ءبىرىنشى وتباسىدان اجىراسقان، جەكسەنبى سايىن سوندا قالعان بالاسىن قىدىرتادى. باسقا بالالارى كۇتىپ وتىرادى. وسىلاي جۇرگەندەر بارشىلىق. ەكى جاقتاعى بالالارعا دا وبال. ءارقايسىسى اكەسىن كۇندە كورگىسى كەلەدى عوي. قىزعانىش سەزىمى دە العاش وسىنداي جاعدايلاردا تۋىنداپ جاتادى.
«مەنى نەگە تەلەديدار قىلمادىڭ؟» دەگەن سۋرەتتىڭ يدەياسىن ۆاتسابىما كەلگەن ۆيدەودان الدىم.
مىسالى، ءبىر سۋرەتتى ءۇيىمىزدىڭ قاسىنداعى ساۋدا ورتالىعى قاسىندا تەمەكى شەگىپ تۇرعان جۇكتى ايەلدى كورگەن سوڭ سالدىم. كۇندە بىرنەشە رەت كورگەن سوڭ ءبىر كۇنى سۋرەتتى سالىپ، تەرەزەگە ارى قاراتىپ جابىستىرىپ قويدىم. كەيىن وسى سۋرەت ينتەرنەتكە شىققان سوڭ، كوبى قوعامدىق ورىندارعا ىلەتىن بولىپتى.
نەگىزى، سۋرەتتەرىمنىڭ كوبىن قوعامدا كەزدەسەتىن وقيعالاردان الدىم. جىل سايىن قىزدار بوي جەتىپ، ۇلدار ەر جەتەدى. مىسالى، مىنا «مامام مەنى ولتىرەتىن شىعار» دەگەن سۋرەتكە 12 جاستاعى بالا كوڭىل اۋدارمايدى. ال ەرتەڭ 15-16 عا كەلگەن كەزدە ويلانا باستايدى. ياعني، بۇل اينالىپ كەلە بەرەتىن تاقىرىپ.
اڭساعان مۇستافا، ابورت
ەڭ كوپ تاراعان وسى سۋرەت بولدى. ءوز كوزىممەن ون شاقتى تىلدە كوردىم. تۇرىكشە شىققان كەزدە كوبى سەنبەدى. سەنەن كوشىرۋى مۇمكىن ەمەس دەگەندەر بولدى. بىردە جاڭالىقتاردان بالاسىن قوقىسقا تاستاپ كەتكەن انا تۋرالى ەستىدىم. بۇل سۋرەت سول كەزدە پايدا بولعان.
- كوپ سۋرەتتەرىڭىزدى انا مەن بالاعا ارناپ سالعانىڭىز دا بايقالادى...
- بۇل تاقىرىپتا «اناعا حات» دەگەن سۋرەت بار. جەتىمدەر ءۇيىنىڭ بالاسى اناسىنا حات جازادى. جىبەرەيىن دەسە، مەكەن- جايىن بىلمەيدى. وسى سۋرەتتى بەينەروليك قىلىپ تا ىستەدىم. بالانىڭ حاتىن ءوزىمنىڭ قىزىما وقىتتىم. قىزدارعا ساباق بولسىن دەگەنىم عوي. ەۋرازيا ۇلتتىق ۋنيۆەرسيتەتىنە حابارلاسىپ، وسى سۋرەتتى قىزدارعا تاراتقىم كەلەتىنىن ايتتىم. ولار كەلىسىپ، 2 مىڭ داناسىن تاراتتىق. بۇل تەڭىزدەگى تامشىمەن تەڭ بولسا دا، قولدان كەلەتىنى وسى.
- اراسىندا جەڭىل تاقىرىپتاردى قوزعاپ، ماحاببات تۋرالى سۋرەتتەر دە جاريالاپ تۇراتىن ەدىڭىز...
- ينتەرنەتتە وتىرعاننان كەيىن، تەك ۇرسا بەرمەي، جاستاردى قىزىقتىرىپ وتىرۋ كەرەك. سوندىقتان اراسىندا سونداي سۋرەتتەردى دە ءجيى جاريالادىم. سونىڭ ىشىندە «تازارۋ» دەگەن سۋرەتتى شىعارعان كۇن برازياليادا ماحاببات كۇنى ەكەن. سول سۋرەتتى ولاردىڭ سايتتارى سالىپ، تەز تاراپ كەتكەنى بار.
- العاشقى كورمەڭىز استانادا ءوتتى. كورمە تۋرالى وي قالاي كەلدى؟
- نەگىزى، كورمەنى جاسايتىن ويىم بولعان جوق. ءبىر كۇنى تانىسىم ويدا جوقتا كورمە قاشان دەپ سۇرادى. مەن بۇيىرعان كۇنى دەسەم، ول ناقتى جاۋاپ ايت دەدى. ءسويتىپ، كۇزدە دەپ ايتتىم.
كورمە وتكىزەتىن جەر ىزدەپ ۇزاق ءجۇردىم. كەرۋەن ساۋدا ورتالىعىن تاڭداماق بولدىم. ولار نەگاتيۆ كەرەك ەمەس دەدى. كىتاپحانا كەيىنگە شەگەردى. مۋزەيدە وتكىزەيىن دەسەم، ول جەردە ادام از. شىنىمدى ايتسام، ماعان ونەر سىنشىلارىنىڭ پىكىرى ماڭىزدى ەمەس. ولاردىڭ ويلارىنان گورى، ماعان جاستار كەرەك. سولاردى ويلاندىرعىم كەلدى. العاشقى كورمە گۋميلەۆ اتىنداعى ۋنيۆەرسيتەتتە ءوتتى.
- باسقا قالادا وتكەن كورمەلەر قالاي ۇيىمداستىرىلدى؟
- استانادا كورمە وتكەن كۇنى الماتىداعى مەترودان حابارلاسىپ، وسى كورمەنى قويۋىمدى سۇرادى. ەكى اپتا ۋنيۆەرسيتەتتە تۇراتىنىن ايتىپ ەدىم، «سودان كەيىن بىزدە ءوتسىن، ءبىز جارنامالاي بەرەمىز» ، دەدى. ودان كەيىن شىمكەنتتەن سول كەزدەگى وقو اكىمى اپپاراتىنىڭ باسپا ءسوز قىزمەتىنىڭ جەتەكشىسى بەرىك ءۋالي حابارلاستى. ول جاقتا دا بىزگە قاشان كەلەدى دەپ سۇراپ جاتىر ەكەن. الماتىداعى كورمەدەن سوڭ اراسىنا 3-4 كۇن سالىپ، سوندا وتكىزەتىن بولدىق. تەمىرتاۋدا، جامبىلدا، تالدىقورعاندا، قىزىلوردادا، اتىراۋدا ءوتتى. ءقازىر سۋرەتتەر پيراميدادا تۇر. ولار بىزدە تۇرسىن، ءبىر جاقتا بولىپ جاتسا، الارسىڭ دەگەن سوڭ، سول جەرگە تۇراقتى كورمە قىلىپ قويدىق.
- ءبىر سۋرەتىڭىزدىڭ يدەياسىن قىزىلورداداعى كورمەدە قىرىمبەك كوشەربايەۆ ايتتى دەپ ەستىدىم. سول راس پا؟
- راس. قىزىلورداداعى كورمەگە اكىم كەلدى. مەن سۋرەتتەرىمدى تانىستىرا باستاپ ەدىم، توقتاتىپ تاستاپ، ءوزىنىڭ ۇناتاتىن، وعان ەرەكشە اسەر ەتكەن سۋرەتتەردى كورسەتە باستادى. سويتسەم، مەنىڭ سۋرەتتەرىممەن ءجىتى تانىس ەكەن. تاڭ قالدىم. سوسىن «قازىر قازاقتار جاتادى دەگەن ءسوزدى ءجيى قولدانادى. وسى ءسوزدىڭ ءوزى دۇرىس ەمەس. بارايىن دەپ جاتىرمىن، جۇمىس ىزدەپ جاتىرمىن دەيدى. وسىعان بىردەڭە سالشى»، دەدى. يدەيا جاقسى. سۋرەتىن سالدىق.
جۇمىس، اڭساعان مۇستافا
- قاتەلەسپەسەم، فۋتبولكا (سپورتتىق جەيدە) تۋرالى قازاق حاندىعىنىڭ 550 جىلدىعىنا وراي وي تاستاعان بولاتىنسىز؟
- ءيا، قازاق حاندىعىنىڭ 550 جىلدىعى تويلانادى دەگەندى ەستىپ، قاتتى قۋاندىم. سۋرەتشى رەتىندە ءوز تاراپىمنان نە قوسا الامىن دەپ ويلاندىم. سوسىن جازدا ءبارى قازاقشا ويۋمەن، قازاقى ناقىشتا كيىنىپ جۇرسە دەگەن وي كەلدى. فوتوسالوندار ءوزىڭ قالاعان سۋرەتپەن فۋتبولكاعا جاسايتىنىن بىلەمىن. مەن سۋرەت سالسام، ۇناتقان ادام ءوزى سول فوتوسالوندارعا جاساتىپ الار دەپ، الەۋمەتتىك جەلىگە ويىمدى جازدىم. «ەگەر 550 لايكتان اسسا، وسىنداي قازاقى فۋتبولكانىڭ 55 ءتۇرىن سالامىن» دەپ جازىپ ەدىم، كورسەتكىش مىڭنان اسىپ كەتتى. ءسويتىپ، حاندىعىمىزدىڭ 550 جىلدىعىن جارتى جىل بويى سۋرەت سالدىم. سالت-ءداستۇر، ۇلتتىق ويىندار، اتا- بابالارىمىز بەن باتىرلاردى قامتۋعا تىرىستىم. بارلىعى دايىن بولعان سوڭ استاناداعى لەۆ گۋميلەۆ اتىنداعى ەۋرازيا ۋنيۆەرسيتەتىنىڭ 55 ستۋدەنتى فۋتبولكالاردى كيىپ، فلەشموب ۇيىمداستىردى. ودان كەيىن تارازدا ۇلكەن توي بولعان كەزدە، ديزاينىن ينتەرنەت ارقىلى سالىپ جىبەردىم. ولار وزدەرى فۋتبولكاعا شىعارىپ، سول كيىممەن ءدۇبىرلى تويدا بي بيلەتتى.
- ول كەزدە اركىم ءوزى جاساتىپ الاتىن ەدى. ال ءوزىڭىز فۋتبولكالار شىعارۋ تۋرالى وي قالاي كەلدى؟
- «مامام مەنى ولتىرەتىن شىعار» دەگەن سۋرەت تاراپ كەتكەن كەزدە شەتەلدىك دوستار كوپ پايدا بولدى. سول كەزدە يتاليانىڭ سيراكۋزا قالاسىنان Benedetto Speranza دەگەن كىسى حات جازدى. فۋتبولكالاردى ءوزىڭ جاساپ ساتىپ جاتىرسىڭ با دەپ سۇرادى. جوق، ەلدەر وزدەرى جاساتىپ جاتىر دەسەم، ول تاڭ قالادى. ديزايندارى تەگىن با دەپ سۇرايدى. ءيا دەسەم، جارتى جىلدىق ەڭبەگىڭدى تەگىن تاراتقانىڭ نە دەيدى. مەن وعان «ءسىز بىلەسىز بە، بىزدە وتانى ءۇشىن ءومىرىن بەرەدى، جارتى جىل ەڭبەك دەگەن نە؟» دەپ جاۋاپ بەردىم. سول كىسى ءوزى فۋتبولكا شىعارۋمەن اينالىسادى ەكەن. ماعان ۆيدەو ارقىلى قوڭىراۋ شالدى. گۋگل اۋدارماشىمەن اۋدارىپ، قاجەتتى قۇرالداردىڭ قازاقشا اتاۋلارىن جابىستىرىپ قويىپتى. سولاردىڭ ءبارىن كورسەتىپ، تانىستىرىپ، ءبارىن ءتۇسىندىردى. «ماعان ەڭ قيىنى، سۋرەت سالۋ. ال سەن ءوزىڭ سالاسىڭ ەمەس پە؟» دەدى. ءبىر سۋرەتىمە كليشە جاساپ، پوشتامەن سالىپ جىبەردى. ءسويتىپ، وسى ءىستى قولعا الۋعا سەبەپكەر بولدى. ۇسىنىس كوپ بولدى. اسىرەسە اۋىلدى جەرلەردەن ءوزىڭ ىستەتىپ بەرىپ جىبەرشى، بىزدە فوتوسالون جوق دەگەندەرگە سالىپ جىبەرىپ وتىراتىنمىن.
مەن فۋتبولكاعا سالاتىن سۋرەتتەرگە كوپ ۋاقىتىمدى جۇمسايمىن. سەبەبى، شىنايى بولۋ كەرەك دەپ ويلايمىن. مىسالى، ءبورىنى سالسام، ول تۇپ- تۋرا بورىگە ۇقساپ تۇرۋى كەرەك. سوعان ۋاقىتىمدى ارنايمىن. قازىر ansa.kz دەگەن سايتىمىز بار. سول سايتتا 600 دەن استام ءارتۇرلى سۋرەتتەرى بار فۋتبولكالار جينالىپ قالدى. فۋتبولكالار شىعارعانداعى ماقساتىم - ۇلتتىق ناقىشتاعى تاۋار قىمبات بولۋى كەرەك دەگەن ويدى تۇبەگەيلى جويۋ. مەنىڭ ويىمشا، كەز كەلگەن قازاق ويۋ- ورنەگى بار كيىمدى قينالماي ساتىپ الاتىنداي بولۋ كەرەك. سول ءۇشىن قولىمنان كەلگەننىڭ ءبارىن ىستەيمىن، بۇيىرسا.
- قازىر فۋتبولكاعا كىرىسكەلى الەۋمەتتىك سۋرەتتەرىڭىز ازايدى. سول ەكەۋىن بىرىكتىرىپ كورمەدىڭىز بە؟
- ارينە، كوردىم. ءبىراق الەۋمەتتىك سۋرەتتەردى فۋتبولكاعا سالۋعا تاپسىرىس جوق. سۇرانىس بولماعان سوڭ، وعان باسىمدىق بەرۋ قيىن.
- الەۋمەتتىك سۋرەتتەرىڭىزدى ىزدەپ، قاشان شىعاراسىز دەپ سۇراپ جاتقاندار بار ما؟
- ىزدەيدى، سۇرايدى. نەگە قويىپ كەتتىڭ دەيتىندەر بار. ولارعا ءبىر كۇنى قايتىپ كەلەتىنىمدى ايتىپ جاتىرمىن. سەبەبى، حالىققا وي تاستاعىم كەلەدى. بۇل مەنىڭ سۇيىكتى تاقىرىبىم عوي. ءبىراق جوعارىدا ايتقانىمداي، ۇجىم جيناپ الىپ، ءوزىم باسقا تىرلىكپەن وتىرعانىم ەرسى بولار دەپ ەسەپتەيمىن.
الەۋمەتتىك تاقىرىپتاعى سۋرەتتەردەن پايدا جوق، نەگە سالاسىڭ، ۋاقىتىڭدى نەگە كەتىرەسىڭ دەگەندەر دە بار. مەن ولارعا «پايدا بار. پايدام - بالالارىم ءوسىپ كەلە جاتىر، سولار تاربيەلى، جاقسى قوعامدا ءومىر سۇرگەنىن قالايمىن. بولاشاق ۇرپاق باقىتتى بولسا، ماعان ودان ارتىق نە كەرەك؟» دەيمىن.
- اڭگىمەڭىزگە راحمەت!
اڭگىمەلەسكەن گۇلنۇر قۋانىشبەك قىزى، «ەگەمەن قازاقستان»