دانيار ەلەۋسىنوۆتىڭ سالماعىندا ەندى جاستارعا جول اشىلادى - مىرزاعالي ايتجانوۆ
وسىعان وراي تارالعان اقپاراتتىڭ انىق-قانىعىن ءبىلۋ ماقساتىندا بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆقا قوڭىراۋ شالىپ، ءمان-ءجايدى سۇرادىق.
- مىرزاعالي قۇلان ۇلى، ءتول شاكىرتىڭىز وليمپيادا چەمپيونى دانيار ەلەۋسىنوۆتىڭ كاسىپقوي بوكسقا اۋىسىپ جاتقانى قانشالىقتى شىندىققا جاناسادى؟
- ءيا، ونداي ءسوز شىقسا، تەگىن ەمەس. بۇل شىندىق. ول كاسىپقوي بوكسقا كەتىپ جاتىر.
- ءسىز ونىڭ كاسىپقوي بوكسقا اۋىسۋىنا قالاي قارايسىز؟
- كىم بولسا دا، بىرەۋدىڭ باعىن بايلاي المايدى. ەگەر الدىنا بەلگىلى ءبىر ناقتى ماقسات قويىپ، سونىڭ جولىندا بار كۇش-جىگەرىن سالىپ جاتسا، نەگە قولداماسقا؟ ول جاقىندا ماعان ارنايى قوڭىراۋ شالىپ، امەريكالىق پروموۋتەرلەردەن ۇسىنىس ءتۇسىپ جاتقانىن، ولارمەن كەلىسىم-شارتقا وتىرۋعا دايىن ەكەنىن ايتىپ، الداعى جوسپارلارىمەن ءبولىستى. مەن ونىڭ ويلارىمەن كەلىسىپ، اق جول تىلەدىم. ءبىز ونىڭ ۇسىنىسىن كوماندا بولىپ قولدادىق. ەندى ول گەننادي گولوۆكين سياقتى قازاقتىڭ تۋىن كاسىپقوي بوكستا جەلبىرەتەدى.
- دانيار اۋەسقوي بوكستا ءجۇرىپ، ەندى ءبىر وليمپياداعا قاتىسۋ مۇمكىندىگى بار ەدى...
- ءيا، اۋەسقويدا جۇرسە تاعى ءبىر وليمپياداعا بارۋعا تولىققاندى مۇمكىندىگى بار. الايدا ول بوكستان اۋەسقويدا قانداي دەڭگەيدەگى جارىستار بولسا، سونىڭ بارلىعىن باعىندىرىپ بولعان سپورتشى. ازيا بىرىنشىلىگىن، الەم چەمپيوناتىن، وزگە دە كوپتەگەن حالىقارالىق جارىستاردى، وتكەن جىلى عانا جارىستىڭ تورەسى سانالاتىن وليمپيادا التىنىن دا قانجىعاسىنا بايلادى. ەندى ول وزگە قىرىنان تانىلىپ، كاسىپقوي رينگتە باعىن سىناماق.
- ەندى 69 كەلى سالماقتا كىمگە ءۇمىت ارتامىز؟
- ءبىزدىڭ مىندەتىمىز - شاكىرت تاربيەلەۋ. 69 كەلى «قازاقتىڭ التىن سالماعى» ەكەنىن بىلەسىزدەر. دانيار كەتكەنىمەن بۇل سالماقتىڭ ورنى بوساپ قالمايدى. ونىڭ ورنىنا جاڭا سپورتشىلار كەلەدى. بۇيىرسا، كەلەسى وليمپيادادا بۇل سالماقتان جاڭا چەمپيون شىعاراتىن بولامىز. دانيار كەتسە، ارتىنداعى جاستارعا جول اشىلعالى تۇر. بولاشاقتا دانيار سياقتى جاڭا ەسىمدەر، جاڭا جۇلدىزدار شىعادى ءالى.
- قازىر ۇلتتىق قۇراما وقۋ-جاتتىعۋ جۇمىستارىن باستادى ما؟
- ءيا، وقۋ-جاتتىعۋدى باستاپ كەتتىك. الماتىداعى بوكس اكادەمياسىندا ۇلتتىق قۇراما باپكەرلەرى مەن «استانا ارلاندارىنىڭ» باپكەرلەرى بىرگە، جالپى 52 بوكسشىنى جاتتىقتىرىپ جاتىرمىز.
- الدا قانداي جارىستار بولادى؟
- اقپان ايىندا العاشقى تۋرنير وتەدى. ول ۆەنگريا ەلىندەگى «يشتۆان بوسكاي» مەموريالى. ال ناۋرىزدا ەكى بىردەي حالىقارالىق تۋرنيرگە قاتىسامىز. ولار گەرمانيادا جانە فينليانديادا وتەدى. باسقا دا ءتۇرلى دودالار بار. باستى ماقسات - ازيا چەمپيوناتىنا تىڭعىلىقتى دايىندالۋ. اقپان ايىندا بوكسشىلارىمىز ا ق ش جانە گەرمانيا ەلدەرىمەن بىرىككەن وقۋ-جاتتىعۋ جۇمىستارىن جاسايدى. ال ناۋرىز ايىندا گەرمانيا ەلىنە بارىپ، گاللە قالاسىندا وتەتىن تۋرنيرگە قاتىسادى.
- اڭگىمەڭىزگە راحمەت!
اۆتور: كۇنسۇلتان وتارباي
