ۋنيۆەرسيادا الاۋىن كىمدەر كوتەرەدى

الماتى. قازاقپارات - 28- قىسقى ۋنيۆەرسيادا الاۋىن قازاقستان بويىنشا كوتەرىپ وتەتىن جاستاردىڭ ءتىزىمى بەلگىلى بولدى.
None
None

بۇل تۋرالى ۋنيۆەرسيادا ۇيىمداستىرۋ كوميتەتىنىڭ باسپا ءسوز قىزمەتى حابارلادى.

«بۇل ماڭىزدى مىندەتتى 1000 ادام اتقاراتىن بولدى. مىڭ الاۋگەردىڭ %70  ىن عىلىم، مادەنيەت جانە سپورت سالاسىندا جەتىستىكتەرگە جەتكەن 17-28 جاس ارالىعىنداعى ستۋدەنتتەر قۇراپ وتىر»، - دەلىنگەن حابارلامادا.

ولاردىڭ قاتارىندا گرەك-ريم كۇرەسىنىڭ 1980-جىلعى وليمپيادا چەمپيونى جاقسىلىق ۇشكەمپىروۆ، بوكستان 2000-جىلعى وليمپيادا چەمپيونى ەرماحان ىبىرايىموۆ، 1988-جىلعى وليمپيادا ويىندارىنىڭ كۇمىس جۇلدەگەرى، قازاقستان رەسپۋبليكاسىنىڭ ەڭبەك سىڭىرگەن باپكەرى داۋلەت تۇرلىحانوۆ، بوكستان ەكى دۇركىن الەم چەمپيونى نازىم قىزايباي، جۇزۋدەن 2016-جىلعى وليمپيادا چەمپيونى دميتري بالاندين، ءابۋ-دابيدە وتكەن دجيۋ-دجيتسۋدان الەم چەمپيونى ءمولدىر مەكەنبايەۆا، سونداي-اق، ءتۇرلى جىلدارى قازاقستانعا جەڭىستەر سىيلاعان تاعى دا باسقا كوپتەگەن سپورتشىلار بار.

بۇرىن حابارلاعانىمىزداي، الاۋگەرلەردى ىرىكتەۋ ءۇش كەزەڭنەن تۇردى.

ىرىكتەۋدىڭ ءبىرىنشى كەزەڭى 1- قىركۇيەك كۇنى باستالىپ، رەسپۋبليكامىزدىڭ بارلىق جوعارى وقۋ ورىندارىن قامتىدى. ۋنيۆەرسيتەتتەر ىشكى بايقاۋ قورىتىندىسى بويىنشا ءوز وتىنىمدەرىن بەردى. ەكىنشى كەزەڭدە ىرىكتەۋ بارىسىنا وبلىستىق ورتالىقتاردا ەستافەتانى وتكىزۋمەن اينالىساتىن ايماقتىق شتابتار قوسىلدى.

ىرىكتەۋدىڭ ءۇشىنشى كەزەڭىندە كەز كەلگەن ادام www.torchrelay.kz سايتىندا ءوتىنىم تولتىرىپ، ەستافەتاعا الاۋگەر رەتىندە قاتىسۋعا ءوتىنىم جىبەرە الدى.

2017-جىلدىڭ 25- قاڭتارىندا استانادا 28-دۇنيەجۇزىلىك قىسقى ۋنيۆەرسيادا الاۋى تۇتانادى. بەس كۇن ارالىعىندا ءاربىر وبلىس ورتالىعىندا الاۋدى جاعۋعا ارنالعان سالتاناتتى شارا وتكىزىلەتىن بولادى. الاۋ ەستافەتاسى وڭىرلەردە وتكىزىلگەننەن كەيىن 16 الاۋگەر الاۋدى الماتىعا جەتكىزىپ، وسىندا ۋنيۆەرسيادانىڭ اشىلۋ سالتاناتىندا ءبىر توستاعانعا بىرىكتىرەدى. ستۋدەنتتىك ويىنداردىڭ استاناسىندا الاۋدى 100 ادام كوتەرىپ وتەدى.

جالپى العاندا ۋنيۆەرسيادا الاۋى 22500 شاقىرىم ءجۇرىپ وتەدى. ونىڭ 200 شاقىرىمىن الاۋگەرلەر جاياۋ ءجۇرىپ وتپەك. ستۋدەنتتىك ويىنداردىڭ رەسمي اۋەتاسىمالداۋشىسى «ەير استانا» كومپانياسى الاۋدى ايماقتاردان الماتىعا جەتكىزەدى. وسىلايشا ەستافەتا الاۋى قالعان 22300 شاقىرىمدى الماتىعا دەيىنگى جولدا وتكىزەدى.

اۆتور: الماس مۇقاش ۇلى

سوڭعى جاڭالىقتار