اقتوبەدە ۋاقىتشا تىركەۋگە تۇرۋعا بارعاندارعا تەگىن ءشاي بەرىپ جاتىر

ورتالىقتار جۇمىس ۋاقىتىن بۇرىنعىدان ءبىر ساعاتقا ەرتە باستايدى.
مۇندا تۇسكى ءۇزىلىسسىز، كەشكى ساعات 20-00 گە دەيىن كەلىپ تىركەلۋگە بولادى. كوشى-قون پوليتسياسى قىزمەتكەرلەرىنە كەلۋشىلەر كەزەكتە ۇزاق تۇرىپ قالماۋلارى ءۇشىن قوسىمشا جۇمىس ورىندارى ۇيىمداستىرىلعان. وندا قىزمەت كورسەتۋ بارىسىندا قانداي دا ءبىر ساۋالدار تۋىنداعان جاعدايدا كەڭەس بەرۋشىلەر كومەككە كەلەدى. ءتۇسىندىرۋ جۇمىستارىنا كومەككە ستۋدەنتتەردى دە تارتىپ جاتىر.
بۇل تۋرالى بۇگىن «اقتوبە- اقپارات» ورتالىعىندا وتكىزىلگەن بريفينگ كەزىندە ايتىلدى.
«كىرەبەرىستە انىقتاما ءبولىمى بار. سول جەردە تۇرعان قىزمەتكەرلەرىمىز ءجون سىلتەپ، بلانكتەر قالاي تولتىرىلاتىندىعىن ايتىپ، كومەك كورسەتەدى. ودان بولەك، كەلۋشىلەرگە تالون بەرىلەدى. سول ارقىلى ازاماتتاردى رەتىمەن، قاي ساۋال بويىنشا كەلگەنىنە قاراي، ءتيىستى ورىنعا جىبەرىپ وتىرادى. ۋاقىتشا تىركەۋگە تۇرۋعا، باسقا دا انىقتاما الۋعا كەلگەندەر ۇزاق كۇتىپ قالعاندار دەمالىپ، بۋفەتتەگى تاتتىلەردەن ءدام تاتىپ، ىستىق ءشاي ىشە الادى. ونىڭ بارلىعى- تەگىن»، - دەيدى حالىققا قىزمەت كورسەتۋ ورتالىعى ديرەكتورىنىڭ ورىنباسارى سامال نۇعىمانوۆا.
اقتوبە وبلىستىق ءى ءى د كوشى- قون پوليتسياسى باسقارماسىنىڭ باسشىسى نۇربولات حايرۋلليننىڭ ايتۋىنشا، 7-قاڭتاردان باستاپ وبلىس بويىنشا 741 ادام ۋاقىتشا تىركەۋدەن وتكەن. 2072 ادام تۇرعىلىقتى مەكەنجايى بويىنشا تىركەلگەن.
«تىركەۋ جۇمىستارى ازاماتتاردىڭ ەركىن ءجۇرىپ- تۇرۋ قۇقىعىن ەشقانداي شەكتەمەيدى. بۇل حالىقارالىق تاجىريبەدە بار نارسە. جۇرگىزىلىپ جاتقان جۇمىستار قۇقىقبۇزۋشىلىقتى بولدىرماۋعا، ىشكى كوشى- قوندى باقىلاۋعا مۇمكىندىك بەرەدى»، - دەيدى نۇربولات حايرۋللين.
زادا زەيىن