بيگەلدى عابدۋللين كىناسىن تولىقتاي مويىندادى

«ق ر قىلمىستىق كودەكسىنىڭ 1 -بابى، 1 -تارماقشاسىنا سايكەس، ءبىرىنشى رەت كىشىگىرىم نەمەسە ورتاشا اۋىر قىلمىس جاساعان ادام، ەگەر ول قىلمىس جاساعاننان كەيىن ايىبىن مويىنداپ ءوز ەركىمەن كەلسە نەمەسە قىلمىستى اشۋعا جاردەمدەسسە نەمەسە قىلمىستىق جولمەن جاسالعان زياندى وزگەشە تۇردە قالپىنا كەلتىرسە، قىلمىستىق جاۋاپتىلىقتان بوساتىلۋى مۇمكىن. سوتقا دەيىنگى تەرگەۋ بارىسىندا عابدۋللين ءوزىنىڭ قىلمىس جاساعاندىعىن مويىندادى. جاساعان ىسىنە وكىنىپ، قىلمىستى اشۋعا بەلسەندى كومەك كورسەتتى. زارداپ شەگۋشىلەرگە 20 ميلليون 625 مىڭ تەڭگە كولەمىندە كەلتىرگەن شىعىنىن تولىقتاي وتەدى»، - دەدى عابدۋليننىڭ ادۆوكاتى امانجول مۇحامەدياروۆ.
سونىمەن قاتار ول بيگەلدى عابدۋلليننىڭ تەرگەۋ پروتسەسسى بارىسىندا قىلمىستى مويىنداعانى جانە تەرگەۋگە كومەك كورسەتكەنى ءۇشىن قىلمىستىق قۋدالاۋدان بوساتۋ تۋرالى ءوتىنىش جاساعاندىعىن ايتتى.
«زارداپ شەگۋشىلەرگە كەلتىرىلگەن زالال تولىق كولەمدە قايتارىلدى جانە ولار عابدۋلليندى قىلمىستىق قۋدالاۋدان بوساتۋعا قارسى ەمەس»، - دەدى مۇحامەدياروۆ.
ال پروكۋرور بولسا، عابدۋلليندى قىلمىستىق قۋدالاۋدان بوساتۋعا نارازىلىق تانىتتى.
وسىدان كەيىن سوت شەشىم قابىلداۋ ءۇشىن كەڭەسۋ بولمەسىنە ءوتتى. ءىس استانا ۋاقىتى بويىنشا ساعات 17 دە قايتا جالعاسادى.
ەستەرىڭىزگە سالا كەتەيىك، وتكەن جىلدىڭ 16 -قاراشاسىندا استانا قالاسى الماتى اۋداندىق №2 -سوتىنىڭ سانكسياسىمەن بيگەلدى عابدۋللين تۇتقىنعا الىنعان بولاتىن. عابدۋللين «Central Asia Monitor» جانە «Radiotochka.kz» بۇقارالىق اقپارات قۇرالدارىنىڭ پايداسىنا بيۋدجەتتىك قارجىنى الۋ ءۇشىن بوپسالاۋ ارەكەتىنە باردى دەپ ايىپتالعان بولاتىن.
ول ءوز قۇزىرىنداعى بۇقارالىق اقپارات قۇرالدارىن پايدالانىپ، مەملەكەتتىك ورگان جەتەكشىلەرىنىڭ ىسكەرلىك ابىرويىنا نۇقسان كەلەتىن ماتەريالداردى جاريالاۋ ارقىلى ولارعا اقپاراتتىق شابۋىل جاساعان. الداعى ۋاقىتتا سىناۋدى توقتاتۋ ءۇشىن عابدۋللين لاۋازىمدى تۇلعالاردان ءوز مەديا رەسۋرستارىنا مەملەكەتتىك تاپسىرىستار تالاپ ەتكەن. ولار ءوز كەزەگىندە عابدۋلليننىڭ كومپانياسىن قولپاشتاپ، مەملەكەتتىك ساتىپ الۋلار تۋرالى كەلىسىمشارتتار بەكىتۋدى قامتاماسىز ەتكەن. وسىدان كەيىن عانا ولاردىڭ قىزمەتى تۋرالى تەك جاعىمدى ماتەريالدار جاريالانىپ وتىرعان. ماسەلەن، جامبىل وبلىسى اكىمدىگىنەن عابدۋللين 10 ميلليون تەڭگە كولەمىندەگى قاراجات بوپسالاعان. ءدال وسى سحەمامەن 7 مەملەكەتتىك ورگان عابدۋللينگە مەملەكەتتىك تاپسىرىس الىپ بەرگەن.
اۆتور: مارلان جيەمباي