باراك وباما پرەزيدەنت رەتىندە ەلىمەن قوشتاستى

استانا. قازاقپارات -  بيلىك مەرزىمى اياقتالاتىن ا ق ش باسشىسى باراك وباما چيكاگودا پرەزيدەنت رەتىندەگى سوڭعى ءسوزىن سويلەدى.
None
None

ا ق ش- تىڭ 44-پرەزيدەنتى باراك وباما چيكاگو قالاسىندا ەكىنشى پرەزيدەنتتىك مەرزىمىنىڭ اياقتالۋىنا، ءوزىنىڭ بيلىكتەن كەتۋىنە بايلانىستى قوشتاسۋ ءسوزىن ايتتى.

باراك وباما ا ق ش ۋاقىتى بويىنشا 10- قاڭتار كۇنى سويلەدى (استانا ۋاقىتى بويىنشا بۇل قاڭتاردىڭ 11- كۇنى تاڭعى سەگىزدەر شاماسى - رەد.). ول پرەزيدەنتتىك قىزمەتى باستالاتىن كەزدە وزەكتى بولىپ تۇرعان تاقىرىپتارعا ورالىپ، ونىڭ ىشىندە امەريكالىقتاردى بىرىكتىرەتىن يدەيالار جايىندا ايتتى. وباما «بۇرىنعىدان مىقتىراق حالىقپەن قوشتاسىپ تۇرمىن، ءبىراق امەريكالىقتار ءوز ارالارىنداعى كەلىسپەۋشىلىكتەردى ەڭسەرۋ ءۇشىن، امەريكا ماقساتى مەن بيلىگىنىڭ تۇتاستىعى ءۇشىن جۇمىس ىستەي بەرۋلەرى كەرەك» دەدى.

55 جاستاعى وباما سونىمەن قاتار ءوزىنىڭ قول جەتكىزگەن باستى جەتىستىكتەرى - دەنساۋلىق ساقتاۋ سالاسىنا جاسالعان رەفورمالاردى، يراننىڭ يادرولىق باعدارلاماسىن توقتاتۋ جونىندەگى حالىقارالىق كەلىسىمدى، كۋبامەن قارىم- قاتىناستى جاقسارتقانىن ايتتى. ا ق ش- تىڭ جاڭا سايلانعان پرەزيدەنتى، رەسپۋبليكاشىل دونالد ترامپ وباما اكىمشىلىگىنىڭ ىشكى جانە سىرتقى ساياساتىنداعى وسى تۇستارىن سىناپ كەلگەن.

وباما «ءبىز باستاعان كەزگە قاراعاندا امەريكا بارلىق جاعىنان كۇشتىرەك، مىقتىراق بولا ءتۇستى. ءبىز ءالى دە ەڭ باي، ەڭ قۋاتتى، ەڭ سىيلى حالىقپىز» دەپ، «امەريكا حالقى مەن پرەزيدەنتى شەشۋى ءتيىس قاۋىپتەردىڭ بار ەكەنىن» ەسكەرتكەن.

ول «ەلگە كەلىپ جاتقان يمميگرانتتارعا قاتەر دەپ قاراۋدىڭ قاتە ەكەنىن» ايتىپ، امەريكانىڭ ءاۋ باستان يمميگرانتتار ەلى ەكەنىن، كوشىپ كەلىپ جاتقان ادامداردى ا ق ش- تىڭ ەكونوميكالىق، مادەني قۋاتى قىزىقتىرعانىن، ءارتۇرلى ناسىلدەر مەن ۇلتتاردىڭ بىرىككەن قۋاتىن دۇرىس پايدالانا ءبىلۋ كەرەك ەكەنىن مالىمدەگەن.

وباما «امەريكالىق مۇسىلمانداردى الالاۋدى ايىپتايمىن، ولاردىڭ پاتريوتتىعى بىزدەن كەمە ەمەس» دەپ، اق ءناسىلدى امەريكالىقتارعا «بۇل قاراتورى بالالار امەريكانىڭ نەگىزگى ەڭبەككەرلەرى بولادى، ولارمەن تابىسۋىمىز كەرەك» دەگەن ۇندەۋ تاستاعان.

باراك وباما سىرتقى ساياساتقا قاتىستى دا پىكىرلەرىن ايتتى. ول «ءبىز كورشى وتىرعان شاعىن ەلدەرگە الىمجەتتىك كورسەتىپ، بۇزاقىلىق جاسامايتىن جولىمىزدان تايقىماساق، باسەكەلەستەرىمىزدەن تايساقتاماساق، رەسەي، قىتاي سياقتى ەلدەر ا ق ش ىقپالىمەن جارىسا المايدى» دەگەن.

وباما بيلىكتەن جاقسى بەدەلمەن، 55 پايىز رەيتينگپەن كەتىپ بارا جاتىر. وبامانىڭ پرەزيدەنتتىك مانداتى قاڭتاردىڭ 20- كۇنى اياقتالادى. بۇل كۇنى دونالد ترامپ ۆاشينگتونداعى كاپيتولييدە انت قابىلدايدى.

«ازاتتىق» جاڭالىقتارى

سوڭعى جاڭالىقتار