مەملەكەتتىك ءتىلدى دامىتۋ قورى مەن اباي مۇراجايى ىنتىماقتاستىق تۋرالى مەموراندۋمعا قول قويدى

مۇنداعى ماقسات - قازاق حالقىنىڭ مادەني، ادەبي، رۋحاني جەتىستىكتەرىن كەڭىنەن ناسيحاتتاۋ، ينتەرنەت كەڭىستىگىندە مەملەكەتتىك ءتىلدىڭ قولدانۋ اياسىن كەڭەيتۋ.
ىنتىماقتاستىق مەموراندۋمىنىڭ اياسىندا «Abaialemi.kz» ونلاين ەنسيكلوپەديالىق پورتالىن بىرلەسىپ تولىقتىرۋعا، ۇلى ابايدىڭ ءومىرى مەن شىعارماشىلىعى، اقىن شاكىرتتەرىنىڭ، زامانداستارىنىڭ ەستەلىكتەرى، ابايتانۋشىلاردىڭ ابايعا ارنالعان ەڭبەكتەرى، شىعارمالارى جايىندا ماتەريالدار جيناۋ جۇمىستارىن جۇزەگە اسىرۋ، اقپاراتتارمەن الماسۋ جانە بىرلەسكەن باستامالاردى ازىرلەۋگە قاتىسۋ كوزدەلەدى.
«Abaialemi.kz» - ابايدىڭ بارلىق شىعارمالارى، اۋديو، ۆيدەو ماتەريالدار جيناقتالعان پورتال. ونلاين پورتالدا ۇلى اباي ءداۋىرى، ونىڭ اقىن شاكىرتتەرى جايلى ماتەريالدار، زامانداستارىنىڭ ەستەلىكتەرى، ابايتانۋشىلاردىڭ ابايعا ارناعان ەڭبەكتەرى مەن شىعارمالارى جانە تاعى باسقا اقپاراتتار ورنالاستىرىلعان.
پورتالدا تۇڭعىش قازاق رومان- ەپوپەياسى بولىپ تانىلعان «اباي جولى» كوپتومدىق تاريحي رومانىنىڭ الەم حالىقتارىنىڭ تىلدەرىندەگى اۋدارما نۇسقالارى ورنالاستىرىلعان. روماندى سايتتان ونلاين وقۋعا جانە تىڭداۋعا بولادى.
ينتەرنەت پورتال 2015 -جىلى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ باستاماسىمەن ءوزىنىڭ «جىبەك جولى» بەيبىتشىلىك سىيلىعىنا العان قارجىسىنا ازىرلەندى. ەلباسى وسى اتالعان سىيلىقتىڭ ءبىر بولىگىن الەۋمەتتىك جوبالاردى جۇزەگە اسىرۋ ءۇشىن مەملەكەتتىك ءتىلدى دامىتۋ قورىنا بەرگەن بولاتىن.
جۋىردا «Abaialemi» موبيلدىك قوسىمشاسى ىسكە قوسىلدى. ەندى سمارتفوندا «اباي جولى» قازاق، ورىس جانە اعىلشىن تىلدەرىندە بار. مۇنداي پاتريوتتىق باعدارلاما ەندى بارلىق «اندرويد» پايدالانۋشىلار ءۇشىن قولجەتىمدى. مەموراندۋم ينتەرنەت قاۋىمداستىعىندا اباي مۇراسىن ءارى قاراي ناسيحاتتاۋعا ىقپال ەتەتىن بولادى.