اقتوبەدەگى تەراكت كەزىندە قايتىس بولعان اسكەريلەردىڭ تۋىسقاندارى مارقۇمدار تۋرالى ەستەلىكتەرىمەن ءبولىستى

اسكەري بولىمدە وتكەن سالتاناتتى جيىنعا تەراكت كەزىندە قازا بولعان مايور دانيەل مايلىبايەۆ، كىشى سەرجانت بەرىكجان قاليەۆ پەن قاتارداعى جاۋىنگەر دوسبول ساپاردىڭ اتا-انا، باۋىرلارى، بالالارى دا قاتىستى. ولار جاقىندارى تۋرالى ەستەلىكتەرىمەن ءبولىستى.
«دانيەل بالا كەزىنەن اسكەري بولۋدى ارماندادى. وتە باۋىرمال ەدى. اتا- اناسى، باۋىرلارى، جاقىندارىنا ۇنەمى جانى اشىپ تۇراتىن. وتباسىن قاتتى جاقسى كوردى. اعامنىڭ سول كۇنگى ارەكەتىن مەن ەرلىككە بالايمىن. ول انتىنا بەرىك ەكەنىن دالەلدەدى»، - دەيدى مارقۇم دانيەل مايلىبايەۆتىڭ ءىنىسى ايان مايلىبايەۆ.
ال تۇلا بويى تۇڭعىشىنان قاپىدا كوز جازىپ قالعان ەركىنبەك ءابدىقادىروۆ ۇلى دوسبولدىڭ باقيلىق بولعانىنا ءالى سەنەر ەمەس. قايعىلى وقيعادان ءبىر كۇن بۇرىن اناسىمەن تەلەفون ارقىلى تىلدەسىپ، جاعدايىنىڭ جاقسى ەكەنىن، اسكەري ومىرگە ۇيرەنگەنىن ايتىپتى.
«ءتورتىنشى ماۋسىم كۇنى ماماسىمەن سويلەسىپتى. ءتىپتى، الاڭداماۋشى ەدىم. ويتكەنى، بۇعان دەيىن اسكەري انت قابىلداعاندا كەلىپ، اسكەري ءبولىمدى كوردىك عوي. جاعدايىمەن تانىسپىز. سوندىقتان، الاڭسىز بولدىق. جايسىز حاباردى ەستىرتكەندە دە، سەنبەدىك، ەسەڭگىرەپ قالدىق. تاعدىردىڭ سالعانىنا امال بار ما؟ ءالى كۇنگە سەنە المايمىن. قازىر ءبىر سولدات كورسەم، تۋرا بالامدى كورگەندەي بولام. سول جەرى ادامعا قاتتى باتادى. كوز الدىمنان كەتپەيدى. امال جوق ەندى. قايتەمىن، ەلى ءۇشىن تۋعان بالا ەكەن...» - دەيدى قاتارداعى جاۋىنگەر دوسبول ساپاردىڭ اكەسى ەركىنبەك ءابدىقادىروۆ.
توعىزىنشى سىنىپتا وقيتىن گۇلاينا ەرەنوۆا اكەسى بەرىكجان قاليەۆتى باتىر سانايدى. ماقتان تۇتادى. كىشى سەرجانت بەرىكجان قاليەۆ سول كۇنى كەزەكشىلىكتە بولعان.
«اكەم - مەن ءۇشىن ناعىز باتىر. مەيىرىمدى ادام. اسكەري ادام بولعاسىن با، ءتارتىپتى وتە جاقسى كورەتىن. ءبىزدى دە سوعان ۇيرەتتى. ۇنەمى باعىت- باعدار بەرىپ وتىراتىن»، - دەپ ەسكە الدى اكەسىن گۇلاينا ەرەنوۆا.
ايتا كەتسەك، وسىعان دەيىن پودپولكوۆنيك دانيەل مايلىبايەۆ پەن كىشى سەرجانت بەرىكجان قاليەۆتىڭ «قازاقستان رەسپۋبليكاسىنىڭ قۇقىقتىق ءتارتىپ اسكەرىنە - 25 جىل» كەۋدە بەلگىسىمەن ماراپاتتالعانىن حابارلاعان بولاتىنبىز. ماراپاتتى دانيەلدىڭ اعاسى ايان اقارىس ۇلى جانە بەرىكجاننىڭ اناسى گۇلجان تولەن قىزى قابىلداپ الدى.
ەسكە سالا كەتەيىك، وتكەن جىلدىڭ ماۋسىم ايىندا قارۋلانعان 18 ادام اقتوبەدەگى №6655 اسكەري بولىمىنە شابۋىل جاساعان ەدى. قاقتىعىس كەزىندە 3 اسكەري قىزمەتكەر قازا بولىپ، التاۋى جاراقاتتاندى.
زادا زەيىن