نۇرجان كەرمەنبايەۆ: العاشىندا كەلىنشەگىمنىڭ ەسى دۇرىس ەمەس ەكەن دەپ ويلادىم

استانا. قازاقپارات - نۇرجان كەرمەنبايەۆ وتاندىق باعدارلامالاردىڭ بىرىندە العاش رەت ءوزىنىڭ كەلىنشەگى تۋرالى ايتىپ بەردى.

ادەتتە ءانشى وتباسىلىق ءومىرىن قۇپيا ۇستاعاندى ۇناتاتىن. ول العاشىندا كەلىنشەگىنىڭ كەي قىلىعى تىم وعاش كورىنگەنىن ايتتى.

بۇل تۋرالى حابار ارناسىنىڭ «كومپرومات» باعدارلاماسىندا ايتىلدى.

- ءوزىڭىزدىڭ جارىڭىز تۋرالى ايتىپ بەرە الاسىز با؟

- مەنىڭ كەلىنشەگىم وتە سابىرلى. بيىل 21 جاسقا كەلەدى. تاراز قالاسىنىڭ ماڭىنداعى قاراتاۋ دەگەن كىشىگىرىم قالادا تۋىپ-وسكەن. اتالعان ايماققا ەشقاشان بارعان ەمەسپىن. دەگەنمەن سول جاقتىڭ قىزى بۇيىردى. كونسەرتتە ول كىسى ماعان سىيلىق ۇسىندى. سول كەزدە جانىمدا قولتىقتاسىپ ءجۇرىپ الاتىن. بۇل قىلىعىن تۇسىنبەيمىن. ول ءبىزدىڭ ءبىر-بىرىمىزگە قانشالىقتى جاراساتىنىمىزدى سول كەزدەن-اق تەكسەرىپ جۇرگەن ەكەن. ەسى دۇرىس ەمەس شىعار دەپ ويلاپ قالدىم. ياعني العاشىندا ول مەنىڭ تىڭدارمانىم بولدى. قازىر كەلىنشەگىم تۋرالى ولاي ايتىپ وتىرعانىم ۇيات شىعار. ول ماعان ءوزىنىڭ جىلى قارىم- قاتىناسىن كورسەتە ءبىلدى. كونسەرتتەن كەيىن قوشتاسىپ كەتتىك.

ۋاقىت وتە كەلە «جاسىڭ 25 كە كەلدى. قاشان ۇيلەنەسىڭ؟» دەگەن اڭگىمەلەر باستالدى. وسى اڭگىمەلەردەن كەيىن الگى قىزدى ىزدەي باستادىم. ءبىر رەت جەلىدە ماعان پىكىر جازعانىن بايقاپ قالعان بولاتىنمىن. اراسىنان وتىرىپ الىپ ىزدەدىم. تاپقان سوڭ، جەكەسىنە حات جازدىم. تەلەفون ءنومىرىن الىپ، كەزدەسكىم كەلەتىنىن ايتتىم. ءبىر-ءبىرىمىزدىڭ قالامىزعا بارساق، حابار بەرۋدى ۇسىندىم. 3-4 كۇن وتكەن سوڭ، ول ءوزى حابار بەردى. اناسىمەن الماتىعا كەلگەن ەكەن. سول كەزدە ەكىنشى رەت كەزدەستىك. ءبىراق سۇراق- جاۋاپ بولدى. جات قىلىعىن دا، كەمشىلىگىن دە بايقاعان جوقپىن. ءۇشىنشى رەت كەزدەسكەنىمىزدە ونى ءوزىمنىڭ اناممەن تانىستىردىم. اناما سالەم سالعانى قاتتى ۇناپ قالدى. وسىلايشا ءتورتىنشى رەت ۇزاتۋدا كورىستىك.

- بىرنەشە ءتۇسىرىلىم كەزىندە ءسىزدىڭ سابىرلى بولا باستاعانىڭىزدى بايقادىم. وسىنىڭ بارلىعى ايەلىڭىزدىڭ ارقاسى دەيدى. سول قانشالىقتى راس؟

- بارلىعىنا تەك كەلىنشەگىم سەبەپ بولدى دەپ ايتا المايمىن. ارينە، ونىڭ دا سەپتىگى بار. ءتىپتى، ماعان تۋعان كۇنىمدە قاسيەتتى قۇران كىتاپتى سىيلاعان بولاتىن. شىنىمدى ايتسام، بۇل سىيلىقتى كۇتكەن جوقپىن. قۇران كىتاپتىڭ اۋدارماسىن ءالى كۇنگە دەيىن وقيمىن. قاسيەتتى كىتاپتى وقىعان سوڭ ومىرگە دەگەن كوزقاراسىڭ وزگەرەدى ەكەن.

- تويدا جاندى داۋىسپەن ايتاسىز با؟

- ءيا، تويدا جاندى داۋىسپەن ايتامىن. ءبىراق قارا حالىق اراسىندا «مينۋسپەن كەلىپ باستى اۋىرتىپ كەتكەنشە، پليۋسپەن ءان ايتىپ كەتە بەرسىنشى» دەيتىندەر دە بولادى. وسى ءسوزدى ەستىپ قاتتى تاڭقالدىم. فونوگراممامەن ءان ايتقاندى ۇناتپايمىن. ءبىراق، ونەر ادامى جان- جاقتى دا بولا بىلگەنى ءجون. ناعيما ەسقاليەۆانىڭ ءوزى «ساحناعا شىعىپ الىپ پليۋسپەن ءان ورىنداۋ - ۇلكەن ونەر» دەپ ايتقان بولاتىن. ۋاقىتىندا اۋزىڭدى اشىپ، جابا ءبىلۋىڭ كەرەك. سول سياقتى ول دا ونەر. دەگەنمەن، جاندى داۋىستا ءان سالعانعا جەتپەيدى.

- نۇرجان تويعا بارۋ ءۇشىن 1 ميلليون تەڭگە سۇرايدى ەكەن. ەگەر وسى سومادان تومەن ۇسىنسا، كوپ بارا بەرمەيدى دەپ ايتىپ جاتادى. قانداي تالاپتارعا سۇيەنىپ، گونورارىڭىزدى 1 ميلليوننان جوعارى ەتىپ قويدىڭىز؟

- بىرىنشىدەن، ول گونوراردى مەن تاعايىندامايمىن. بىزدە باسشىلىق پەن پروديۋسەرلەر بار. ودان كەيىن ول اقشانى ۇجىمداعى ءبىر ادام الاتىن بولسا، ارينە، ۇلكەن سوما بولادى. ياعني جاڭاعى ءسىز ايتىپ وتىرعان سومانى ءبىر ادام عانا المايدى، پروديۋسەرگە، توپتىڭ كونسەرتتىك ديرەكتورىنا، اكىمگەر، بۋحالتەر جانە سالتانات ەكەۋىمىزگە بولىنەدى.

- نۇرجان سويلەگەندە «قاراپايىم» ءسوزىن ءجيى قولداناسىز. ءوزىڭىزدى قاراپايىممىن دەپ ويلايسىز با؟ قاراپايىم بولىپ نە ىستەپ جاتىرسىز؟ سوڭعى كەزدە باق وكىلدەرى ءسىزدىڭ ءوزىمشىل مىنەزىڭىز تۋرالى ايتىپ جاتىر.

مەن كوز الدىلارىندا وسكەندىكتەن، «كوكىرەك پايدا بولدى» دەپ ايتىپ جاتقان شىعار. مەنى 16-17 جاستاعى بوزبالا شاعىمنان باستاپ كوردى. مەن دە اداممىن. سول 16 جاسىمداعى كەيپىمدە قالا بەرۋىم مۇمكىن ەمەس قوي. ول ەشقانداي كوكىرەكتىك ەمەس. مەن ەشۋاقىتتا كوكىرەك بولماۋى ءتيىس دەپ ەسەپتەيمىن. باۋىرلارىمدى دا، جان- جاعىمداعىلاردى دا قاراپايىم بولۋعا شاقىرامىن. مەن سىرت كوزگە قالاي كورىنەتىمدى بىلمەيمىن. ونى سىزدەر باعالاي الاسىزدار. ارتىق كەتسەم، كەمشىلىگىم بولسا، كەشىرىم سۇرايمىن.