دۇيسەنوۆا اۋىلدا جۇرگەن جۇمىسسىز جاستاردى جاپپاي بيزنەسكە ۇيرەتۋدى كوزدەيدى

ءمينيستردىڭ سوزىنە قاراعاندا، سوڭعى بەس جىلدىڭ ىشىندە جۇمىسپەن قامتۋ باعدارلاماسى اياسىندا 380 مىڭنان استام جاسقا مەملەكەتتىك قولداۋ كورسەتىلدى.
«دەگەنمەن دە، قازىرگى تاڭدا جاستار اراسىندا ءجىتى كوڭىل ءبولۋدى تالاپ ەتىپ وتىرعان 200 مىڭعا جۋىق ازاماتتار بار. ولاردىڭ 56 پايىزى اۋىلدا تۇرادى. 90 مىڭى - جۇمىسسىزدار، ال 103 ادام - ءوزىن-ءوزى جۇمىسپەن قامتىعان ازاماتتار. بۇلاردىڭ كوپشىلىگى تەك ورتا مەكتەپتى ءتامامداعان جاستار عانا بولىپ وتىر. وسى ساناتتاعى جاستارعا مەملەكەتتىك قولداۋ رەتىندە بيىلعى جىلى جۇزەگە اسىرىلعالى وتىرعان «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا وقىتۋ، كاسىپكەرلىككە باۋلۋ، نەسيە بەرۋ جانە جاستار پراكتيكاسىن كەڭەيتۋ ماسەلەلەرى قارستىرىلىپ وتىر»، - دەدى ت. دۇيسەنوۆا ۇكىمەتتىڭ بۇگىنگى وتىرىسىندا.
وسى ورايدا مينيستر اۋىل اكىمدەرىنىڭ اقپاراتتىق جۇيەلەرىن كەڭىنەن دامىتۋ قاجەت دەپ سانايدى. وندا تۇرعىنداردىڭ تەك سانى مەن تۇرمىستىق جاعدايى عانا ەمەس، سونىمەن قاتار مەملەكەتتىك قولداۋدى قاجەتەتەتىن ازاماتتار دا كورسەتىلەدى.
«وسىنداي اقپاراتتىق جۇيەنى ءبىز اقمولا وبلىسىنىڭ ارشالى اۋدانىندا، اقتوبە قالاسى مەن وعان قاراستى التى كەنتتە ىلكى جوبا رەتىندە ەنگىزدىك. ونى بارلىق وبلىستاردا، استانا مەن الماتى قالالارىندا كەزەڭ-كەزەڭىمەن ەنگىزۋ كەرەك دەپ سانايمىز. بۇل جۇيە ەڭ الدىمەن بارلىق دەڭگەيدەگى اكىمدەر ءۇشىن اۋىل تۇرعىندارى تۋرالى جان-جاقتى ءارى ناقتى دەرەكتەر قورىن قالىپتاستىرۋعا مۇمكىندىك بەرمەك. ەكىنشىدەن، سونىڭ ارقاسىندا «ەلەكتروندى ۇكىمەتتى» اۋىل- ايماقتارعا كەڭىنەن تاراتۋعا بولادى»، - دەپ اتاپ كورسەتتى دۇيسەنوۆا حانىم.
اۆتور: ارمان اسقاروۆ