استانادا سەلفيگە ارنالعان ساياباقتار پايدا بولادى

استانا. قازاقپارات - ەلوردادا سەلفي جاساۋعا ارنالعان ساياباقتار پايدا بولادى. «كرىشا» پورتالىنىڭ اقپاراتى بويىنشا، سەلفي ءۇشىن ارنايى مۇسىندەر قويىلعان ءۇش جاڭا ساياباق سالىنادى.

ونىڭ العاشقىسى ءارى ەڭ ۇلكەنى جەڭىس داڭعىلى مەن جانگەلدين كوشەسىنىڭ قيىلىسىندا بولادى. اۋماعى - 3 مىڭ شارشى مەتر. ءدال وسىنداي سكۆەر (اۋماعى ءسال كىشىرەك - 2 مىڭ شارشى مەتر) سارى ارقا داڭعىلىنىڭ بويىنان دا ورىن تەبەدى. ۋچاسكەلەردىڭ ۇشتەن ءبىر بولىگى كوگالداندىرىلادى. قالعان بولىگىنە جول توسەلىپ، ورىندىقتار جانە ءتۇرلى قوندىرعىلار قويىلادى. ال ساياباق اۋماعىندا سۋرەتكە ءتۇسۋ ءۇشىن بيىكتەۋ ورىندار قاراستىرىلعالى وتىر.

جوبانىڭ مازمۇنى بويىنشا، بەزەندىرۋدىڭ تاقىرىبى مۋزىكا بولماق. استانا قالالىق تابيعي رەسۋرستار باسقارماسىنان جۋىردا عانا ساراپتامادان وتكەن قۇجاتتامادا سەلفي ءۇشىن كونتراباس، رويال جانە تاعى باسقا دا اسپاپتار قاراستىرىلعان.

ءۇشىنشى ساياباق مولداعۇلوۆا كوشەسى بويىندا جەڭىس داڭعىلى مەن پوتانين كوشەسى اراسىنداعى ۋچاسكەدە اشىلادى. ول كىشكەنتاي بالالاردىڭ دەمالىسىنا لايىقتالىپ جاسالادى.

abctv.kz