ساعىنتايەۆ: «فۋتبول ويناعاندى» قويۋ قاجەت

بۇگىندە ەنەرگەتيكالىق قاۋىپسىزدىك بويىنشا ءبىرقاتار مىندەتتەمەلەر اكىمدىكتەرگە جۇكتەلگەن. مەملەكەتتىك ورگاندار دا باقىلاۋ شارالارىن جۇرگىزەدى. الايدا شاحانداعى جارىلىس سياقتى توتەنشە جاعدايلار بولعاندا جەرگىلىكتى بيلىك پەن مەملەكەتتىك ورگاندار ءبىر-بىرىنە سىلتەپ جاتادى، دەپ حابارلايدى قازاقپارات ءتىلشىسى.
«ماعان ءبىر نارسە ۇناماي تۇر، (ەنەرگەتيكالىق قاۋىپسىزدىك بويىنشا - اۆت.) وكىلەتتىلىكتەردى ءوزارا ءبولىسىپ، اكىمدىكتەرگە بەردىك، الدىق دەپ وتىرسىزدار. الايدا ەشقانداي جاۋاپكەرشىلىك جوق. ەندى، ونى (مەملەكەتتىك ورگاندارعا - اۆت.) تاعى قايتارۋ كەرەك پە، جوق الدە، قاداعالاۋ شارالارىن كۇشەيتەمىز دەيسىزدەر. ول دۇرىس ەمەس قوي. وكىلەتتىلىك بەرىلگەننەن كەيىن جەرگىلىكتى اتقارۋشى ورگاندار ءوز مىندەتتەرىن بۇلجىتپاي ورىنداۋى ءتيىس. بىزدە ەنەرگەتيكا مينيسترلىگىندە ەنەرگەتيكالىق قاداعالاۋ قىزمەتى بار. ول قايدا قاراپ وتىر؟ ءسويتىپ، جەرگىلىكتى بيلىككە وكىلەتتىلىكتى بەردىك دەيمىز، ولار بولسا، ورتالىقتاندىرىلعان جىلۋ جۇيەسىن قوسايىن دەسەك، ورتالىق اقشا بەرمەي وتىر دەپ شىعادى. ورتالىق ورگاندار بولسا، اقشا بەرەيىن دەسەك، جەرگىلىكتى بيلىك قۇجاتتاردى جىبەرمەي جاتىر دەيدى. وسىلايشا، «فۋتبول ويناپ» وتىرادى. اقىر سوڭىندا شاحان سياقتى ەلدى مەكەندەردىڭ جىلىتۋعا قاتىستى بارلىق پروبلەمالاردى حالىقتىڭ موينىنا ارتىپ قويدىق. وسىدان كەيىن ادامدار امال جوق، پەش قويادى، «بۋرجۋيكا» ورناتادى، نەشە ءتۇرلى قازاندىقتاردى كىرگىزەدى. ءۇيدى ءوز كۇشىمەن جىلىتادى. سوسىن كەشەگىدەي قايعىلى وقيعالارعا تاپ بولامىز»، - دەدى ب. ساعىنتايەۆ.
ونىڭ ويىنشا، ەگەر ءۇيدى جىلىتۋ قوندىرعىلارى قاۋىپتى بولسا، وندا ناقتى ءبىر تالاپتاردى ازىرلەۋ كەرەك. وسىعان بايلانىستى ناقتى ءبىر قۇجاتتىڭ بولعانى ءجون. «بىلايشا ايتقاندا، ناقتى ءبىر جۇمىستى قولعا العان ءجون. ءبىز بولساق، ءاي، جىلۋ بولسا بولدى دەپ، سالعىرت قاراپ وتىرمىز»، - دەپ اتاپ كورسەتتى ۇكىمەت باسشىسى.
وسى ورايدا ۇكىمەت باسشىسى ب. ساعىنتايەۆ ءوز ورىنباسارى اسقار مامينگە جەرگىلىكتى اكىمدىكتەر مەن مەملەكەتتىك ورگانداردىڭ ءوزارا جاۋاپكەرشىلىگىن ناقتى بەلگىلەپ الۋدى تاپسىردى. ول ءۇشىن ارنايى جۇمىس توبى قۇرىلاتىن بولادى.
اۆتور: ارمان اسقاروۆ