ۋاقىتشا تىركەلمەگەنى ءۇشىن جازالاۋ ءبىر ايدان كەيىن قولعا الىنادى - قاسىموۆ

«جاڭا نورمانىڭ نەگىزگى ماقساتى - ىشكى كوشى-قوندى باقىلاپ وتىرۋ. وسىنىڭ نەگىزىندە دەنساۋلىق ساقتاۋ، ءبىلىم بەرۋ، جۇمىس ورىندارىن اشۋ جانە تاعى باسقا الەۋمەتتىك-ەكونوميكالىق ماسەلەلەر شەشىلەدى. بۇل - جالپى الەمدىك تاجىريبە. ماسەلەن، گەرمانيادا تۇراقتى مەكەن-جايىنان كوشىپ كەتكەنى، ءيا بولماسا، بوتەن بىرەۋدىڭ مەكەن-جايىن پايدالانعانى ءۇشىن 1000 - 50000 ەۋرو اينالاسىندا ايىپپۇل تولەۋ مىندەتى بار»، - دەپ اتاپ كورسەتتى ق. قاسىموۆ.
ايتا كەتەيىك، قازاقستان ازاماتتارىن ۋاقىتشا تىركەلۋگە مىندەتتەيتىن زاڭ قاڭتاردىڭ 7-سىنەن باستاپ كۇشىنە ەنگەن بولاتىن. بۇعان دەيىن تۇراقتى تىركەۋ مىندەتى بولعان. ەندى، ءوز ۇيىنە ادامداردى تۇرعىزعانى ءۇشىن جاۋاپكەرشىلىك ەنگىزىلىپ وتىر. ولاردى ۋاقىتشا تىركەۋگە قويۋ قاجەت. اتالعان نورما ءبىر رەت بۇزىلسا، 10 ا ە ك كولەمىندە ايىپپۇل سالىنادى. ال ءبىر جىلدىڭ ىشىندە تاعى قايتالانسا، ايىپپۇلدىڭ كولەمى ەكى ەسەگە ارتادى.
اۆتور: ارمان اسقاروۆ