ساعىنتايەۆ حالىققا قاتىستى نورمالاردى ءتۇسىندىرۋدى دەر كەزىندە جۇرگىزۋدى تالاپ ەتتى

استانا. قازاقپارات - ۇكىمەتتىڭ بۇگىنگى وتىرىسىندا پرەمەر-مينيستر باقىتجان ساعىنتايەۆ ەل ازاماتتارىن تۇرعىلىقتى جەرى بويىنشا تىركەۋ جانە ۋاقىتشا تىركەۋگە قاتىستى ءتۇسىندىرۋ جۇمىستارىن دەر كەزىندە جۇرگىزۋ كەرەكتىگىن جەتكىزدى، دەپ حابارلايدى قازاقپارات ءتىلشىسى.
None
None

وسى ورايدا ۇكىمەت باسشىسى ب. ساعىنتايەۆ ىشكى ىستەر مينيستردەن وسى ماسەلەگە قاتىستى زاڭدى قاي ۋاقىتتا قابىلدانعانىن سۇرادى. «جەلتوقساننىڭ 28 ءى»، - دەدى مينيستر قالمۇحامبەت قاسىموۆ.

«جوق، جەلتوقساننىڭ 22-كۇنى ءبىز ءتيىستى زاڭعا قول قويدىق. ال العاشقى ءتۇسىندىرۋ ماتەريالدارىن ءبىز قاي كەزدە بەردىك؟ حالىققا قىزمەت كورسەتۋ ورتالىقتارىنداعى ءبىرىنشى دۇربەلەڭنەن كەيىن بەردىك. سىزدەر اتالعان نورمانىڭ حالىققا تىكەلەي قاتىسى بار ەكەنىن بىلدىڭىزدەر عوي. ءتۇسىندىرۋ جۇمىستارىن جەلتوقساننىڭ 22 سىندە باستاي المادىڭىزدار ما؟ اشىعىن ايتۋ كەرەك، حالىق نە ىستەرىن بىلمەدى. سودان قىزمەت كورسەتۋ ورتالىقتارىنا لاپ بەردى»، - دەدى ب. ساعىنتايەۆ.

پرەمەر-مينيستر ونلاين رەجيمدە ۋاقىتشا تىركەلۋ قىزمەتىن تەزدەتىپ ىسكە قوسۋدى تاپسىردى. «حالىقتى ول قىزمەتتى كىمنىڭ ازىرلەيتىنى قىزىقتىرمايدى. ۇلتتىق تەحنولوگيالىق ورتالىق پا، ىشكى ىستەر مينيسترلىگى مە، وندا جۇمىسى جوق. ەل ازاماتتارى بىلاي دەيدى، سىزدەر زاڭدى قابىلدادىڭىزدار، ءبىز سول زاڭعا باعىناتىن ازاماتتار رەتىندە تىركەۋگە تۇرۋعا كەلدىك. بولدى. ۋاقىتشا تىركەۋدى ەنگىزگەنى دۇرىس. وعان داۋ جوق. دەگەنمەن، وسى جۇمىستى ۇيىمداستىرۋ شارالارىمىز حالىقتىڭ كوڭىلىنەن شىقپادى. ءبىز قايتادان شالىس باستىق. حالىققا تىكەلەي قاتىسى بار زاڭدى قابىلدايمىز دا، ونىڭ نەگىزگى نورمالارىن دۇرىس جەتكىزە المايمىز. الداعى ۋاقىتتا وسىنى ەسكەرۋ كەرەك»، - دەپ اتاپ كورسەتتى ب. ساعىنتايەۆ.

اۆتور: ارمان اسقاروۆ

سوڭعى جاڭالىقتار