ۋنيۆەرسياداعا دايىندالۋ ءۇشىن «شىمبۇلاق» سىرعاناۋ جولدارىن جاپتى
تراسسالاردى جارىستارعا دايىنداۋ ءۇشىن «شىمبۇلاق» 9- قاڭتاردان باستاپ سىرعاناۋعا ارنالعان «كومبي 1» («پروفەسسور»، «ازيادا»، «ترۋبا»، «پولە چۋدەس»، «وليمپيسكيي»، «تەرراسا») تراسسالارىن جاباتىن بولادى. ال باسقا تراسسالار، اتاپ ايتقاندا، «سول جاق تالعار»: «دياديا بوگدانوۆيچ»، «زەلەنايا پوليانا»، «سولنەچنايا دولينا»؛ «كومبي 2»: «تالعار»، «گرەبەن دۆادتسادكي»؛ «تراۆەلاتور»: «بەلىي ميشكا»؛ «زمەيكا» بۇرىنعى قالپىندا جۇمىس جاسايتىن بولادى، دەپ حابارلايدى قازاقپارات ۋنيۆەرسيادانىڭ رەسمي سايتىنا سىلتەمە جاساپ.
«كومبي 1» ارقان جولى جاياۋ تۋريستەرگە، سونداي-اق، سىرعاناۋعا كەلگەندەردى كوتەرۋ جانە ءتۇسىرۋ ءۇشىن شتاتتىق تارتىپتە جۇمىس جاسايتىن بولادى.
جابىلىپ جاتقان سىرعاناۋعا ارنالعان تراسسالاردا سپورتتىق تراسسالاردى سالۋ، تەلەحابار تاراتۋ ءۇشىن تاۋ باۋرايى ارقىلى كابەلدەردى جۇرگىزۋ، كامەرالاردىڭ ورنىن بەلگىلەۋ، ۋاقىتشا قۇرىلىمداردى سالۋ جانە مونتاجداۋ، «ب» جانە «س» ساناتىنداعى قاۋىپسىزدىك جەلىلەرىن ورناتۋ جۇمىستارى جۇرگىزىلەدى.
تراسسالاردىڭ ءبىر بولىگى جابىلاتىندىقتان، شيپاجايعا كۇندىزگى ۋاقىتتا كەلۋشىلەردىڭ بارلىعىنا ۋنيۆەرسيادا اياقتالعانعا دەيىن 30 پايىزدىق جەڭىلدىك جاسالادى. سونداي-اق، shymbulak.com نەمەسە homebank.kz سايتتارىندا تومەندەتىلگەن باعامەن ونلاين-تولەم جاساۋ كەزىندە قوسىمشا تاعى 30 پايىزدىق جەڭىلدىك ۇسىنىلادى.
ەستەرىڭىزگە سالىپ وتەيىك، «شىمبۇلاق» تاۋ-شاڭعىسى شيپاجايىندا سلالوم، جارىسپالى سلالوم، سلالوم-گيگانت، جارىسپالى سلالوم-گيگانت، سۋپەر-گيگانت، كومبيناتسيا (سۋپەرگيگانت، سلالوم) ، شاڭعى كروسى، سنوۋبورد-كروسس، سلوۋپستايل، جۇپتىق موگۋل سەكىلدى ديستسيپلينالاردا جارىستار وتەدى.
