حالىقارالىق ىزدەۋدە جۇرگەن بەس قىلمىسكەر تۇتقىندالدى

الماتى وبلىستىق ىشكى ىستەر دەپارتامەنتىنىڭ مالىمەتىنە قاراعاندا، ۇستالعان تۇلعالارعا وسى وڭىردە قىلمىس جاساعان دەگەن كۇدىكپەن رەسپۋبليكالىق جانە حالىقارالىق ىزدەۋ جاريالانعان، دەپ حابارلايدى قازاقپارات ءتىلشىسى.
ايتا كەتەرلىگى، پوليتسيا قىزمەتكەرلەرى ۋنيۆەرسيادا قارساڭىندا الماتى وبلىسىنىڭ وڭتۇستىك ايماعىندا باقىلاۋدى كۇشەيتىپ، الماتى قالاسىنا جاقىن ورنالاسقان وڭىردە «قۇقىقتىق ءتارتىپ» وپەراتسياسىن باستاعان بولاتىن. وبلىستىڭ تالعار، قاراساي، ىلە، جامبىل جانە ەڭبەكشى قازاق اۋداندارىن قامتىعان شاراعا مىڭعا جۋىق قىزمەتكەرلەر تارتىلعان.
«سوڭعى ءۇش كۇندە ەسىرتكى ساتۋ، اۆتوۇرلىق، توناۋ سەكىلدى ءبىرقاتار قىلمىستارعا بايلانىستى ىزدەۋدە جۇرگەن 5 كۇدىكتى قۇرىقتالدى. بۇدان باسقا، پوليتسەيلەردىڭ كومەگىمەن قاراساي، ىلە، ەڭبەكشىقازاق اۋداندارى بويىنشا ءىز-ءتۇسسىز جوعالعان 4 ازامات تابىلدى»، - دەلىنگەن وبلىستىق ءى ءى د باسپا ءسوز قىزمەتىنىڭ حابارلاماسىندا.
پوليتسيا رەيدتەرى بارىسىندا سونىمەن بىرگە، ەسىرتكى بيزنەسىنە قاتىستى 4 قىلمىستىق قۇقىق بۇزۋشىلىقتىڭ جولى كەسىلىپ، جارتى كەلىگە جۋىق ەسىرتكى زاڭسىز اينالىمنان الىنعان. ماسەلەن، ىلە اۋدانىنىڭ بايسەركە اۋىلىندا 30 جاستاعى ازامات ۇستالىپ، ودان 447 گرامم گاشيش پەن 5 گرامم ماريحۋانا تاركىلەنگەن. ءىرى كولەمدەگى ەسىرتكىنى زاڭسىز ساقتاعان كۇدىكتى قازىر ۋاقىتشا وقشاۋلاعىشقا قامالىپ، وعان قاتىستى قىلمىستىق ءىس قوزعالدى.
«ۋنيۆەرسيادا قارساڭىندا ءتارتىپ ساقشىلارى كوشى- قون جەلىسى بويىنشا دا قۇقىق بۇزۋشىلىقتىڭ الدىن الۋعا باسا نازار اۋداراتىن بولادى. سوڭعى ءۇش كۇندە وڭىردە قازاقستاننىڭ كوشى- قون زاڭناماسىن بۇزعانى ءۇشىن 153 شەتەلدىك ازامات جاۋاپكەرشىلىككە تارتىلدى»، - دەلىنگەن باسپا ءسوز بايانىندا.