عالىمدار سمارتفونداردىڭ دەنساۋلىققا تاعى ءبىر قاۋپىن انىقتادى

استانا. قازاقپارات - كورەي عالىمدارى سمارتفون ەكراندارى الدىندا ءۇش ساعاتتان استام ۋاقىت وتىراتىن بالالارعا قۇرعاق كوزدەر سيندرومى ءتونىپ تۇرعانىن دالەلدەدى، دەپ حابارلايدى قازاقپارات.

قۇرعاق كوزدەر سيندرومى ادام اعزاسى كوز جاسىن جەتكىلىكتى كولەمدە شىعارا الماعان جاعدايدا پايدا بولادى. سالدارىنان ادامنىڭ جانارى قىزارىپ، تىتىركەنەدى. ولارعا توپىراق تۇسكەن ءتارىزدى بولادى.

بۇل تەوريانى دالەلدەۋ ءۇشىن كورەيلىك عالىمدار 7-12 جاس ارالىعىنداعى 916 بالاعا زەرتتەۋ جۇرگىزدى. تەكسەرۋ بارىسىندا ولاردىڭ 6,6 پايىزىنىڭ كوز جانارىندا سول ۋاقىتتا اتالمىش سيندروم بولعانى انىقتالدى. بالالاردىڭ بارلىعى دەرلىك كۇنىنە 3,2 ساعات بويى سمارتفوندار پايدالانعان. بۇل رەتتە، ولاردىڭ اناعۇرلىم دەنى ساۋ قۇرداستارى گادجەتتەردى قولدانباعان.

كورەيلىك عالىمدار قۇرعاق كوزدەر سيندرومى مەن سمارتفوندار الدىندا وتكىزگەن ۋاقىتتىڭ اراسىندا بايلانىستىڭ بارىنا دايەكتى دالەلدەمەلەر تابا الدى.

ماسەلەن، سيندرومعا شالدىققان بالالارعا ءبىر ايعا گادجەتتەردەن باس تارتۋ ۇسىنىلدى. ناتيجەسىندە، كەسەل سيمپتومدارى تولىعىمەن عايىپ بولعان، دەپ جازادى «روسسييسكايا گازەتا».

 The Independent ساراپشىلارى سمارتفونداردىڭ دەنساۋلىققا قاۋىپتى اسەرىنەن ءوز بالالارىن قورعاعىسى كەلەتىن، ءبىراق گادجەتتەردى ولاردىڭ ومىرلەرىنەن تولىعىمەن الىپ تاستاي المايتىن اتا- انالارعا، ءوز بالالارىنا ۇيالى تەلەفوندى ۇيىقتار الدىندا بەرمەۋگە، سونداي- اق قۇرىلعى الدىندا ەكى ساعاتتان استام ۋاقىت وتىرماۋىن قاداعالاۋعا كەڭەس بەردى.