مۇحتار نيازوۆقا اۋىلداستارى اق بوز ات مىنگىزدى

قىزىلوردا. قازاقپارات- ايتىستىڭ اقتۇيعىنى، «التىن دومبىرانىڭ» ەكى مارتە يەگەرى مۇحتار نيازوۆ جانكۇيەرى بولعان سىربويىلىقتارمەن كەزدەسۋ ساپارىن كىندىك قانى تامعان جەرى - جالاعاش اۋدانى اقجارما اۋىلىنان باستادى.

 بۇل تۋرالى «قازاقپارات» ح ا ا ءتىلشىسى حابارلادى.

 اقىندى سالتاناتتى جاعدايدا كۇتىپ العان تۋعان اۋىلى، ونى ساحنا تورىنە شىعارىپ، لايىقتى قۇرمەت كورسەتتى. شارانى جۇرگىزگەن ۇستازى، اقىن مامىر بايداۋلەتوۆ قاسيەت قونعان اقارىق اۋىلىنىڭ تاريحى مەن مۇحتارداي التىن ۇل شىققان اۋلەت جايىندا كەڭىنەن اڭگىمە ءوربىتتى.

شاراعا وبلىستىق جاستار ورتالىعىنان، اۋدان باسشىلىعىنان وكىلدەر ارنايى قاتىسىپ، اق لەبىزدەرىن بىلدىرسە، اعاسى ءارى ۇستازى، جۋرناليست، بەلگىلى اقىن دۇيسەنبەك اياش ۇلى كەشەگى بالا مۇحتاردى سۋرەتتەي سىر شەرتتى. سونىمەن قاتار، تالانتتى ءانشى، جىرشى مارات سۇگىر ونەرىن ورتاعا سالىپ، اۋىلدىڭ اجەلەر ءانسامبلى اسەم اننەن شاشۋ شاشتى.

شارا سوڭىندا اۋىل تۇرعىندارى سىر ءوڭىرىنىڭ، جالپى قانى قازاقتىڭ اتىن شىعارىپ جۇرگەن ۇلدارىنا اق بوز ات مىنگىزىپ، شىعارىپ سالدى.

مۇحتار نيازوۆ ەرتەڭنەن باستاپ ارال، قازالى، قارماقشى، جالاعاش، سىرداريا، شيەلى، تەرەڭوزەك اۋداندارىن ارالاپ، ەلمەن جۇزدەسپەك.

 ەسكە سالايىق، 2016 -جىلدىڭ 3-4 - جەلتوقسانى كۇندەرى الماتىدا «التىن دومبىرا» ءداستۇرلى الامان ايتىسى ءوتىپ، قىزىلوردالىق ايتىسكەر اقىن مۇحتار نيازوۆ ونىڭ باس جۇلدەسىن جەڭىپ العان بولاتىن. بۇل قۇرمەتتى اتاققا ول 2012 -جىلى دا قول جەتكىزگەن ەدى. اراعا ءتورت جىل سالىپ، ەكىنشى مارتە «التىن دومبىرا» يەگەرى اتاندى.

اۆتور: ەلۋباي اۋەزوۆ