شىمكەنتتە تۇرعىن ۇيدە بولعان جارىلىستىڭ العاشقى بولجامدى سەبەبى ايتىلدى

شىمكەنت. قازاقپارات - شىمكەنتتە جەكە تۇرعىن ۇيدە بولعان جارىلىستىڭ العاشقى بولجامى ايتىلدى، دەپ حابارلايدى «قازاقپارات» ح ا ا ءتىلشىسى «قازترانس گاز ايماق» ا ق و ق و ف باسپا ءسوز قىزمەتىنە سىلتەمە جاساپ.
None
None

«وقيعا ورنىنا جەتكەن ماماندار كەلەسى ءمان-جايدى انىقتادى. تۇرعىن ءۇيدى جىلىتۋ قازاندىعى پاتەردى جالعا بەرۋشىنىڭ ۇيىنە ورناتىلعان. سول جەردەن پاتەردى جالعا الۋشىلارعا كوگىلدىر وتىن وتتەگى شلانگىسى ارقىلى تارتىلىپ، ودان ءارى گاز پليتاسى مەن گازبەن جىلىتىلاتىن الاۋوشاق جالعانعان. سول جەردە تەحنيكالىق اقاۋلار ورىن العان. ناقتىسى، كوگىلدىر وتىن جەتكىزىلگەن شلانگا گازبەن جىلىتىلاتىن الاۋوشاققا دۇرىس بەكىتىلمەگەن. سالدارىنان گاز-اۋا قوسپاسىنىڭ جارىلىسى بولعان»، - دەلىنگەن حابارلامادا.

وقىس وقيعادان 1988-جىلى تۋعان ءسابينا ورىنبايەۆا قازا بولدى. تاعى ءتورت ادام زارداپ شەكتى: قارلىعاش احانوۆا 1996-جىلى تۋعان (2 دارەجەلى كۇيىك جاراقاتى)، ءاسيا ورىنبايەۆا 1957-جىلى تۋعان (دەنە جاراقاتى)، داۋرەن جۇماليەۆ 1985-جىلى تۋعان (دەنە جاراقاتى)، ارۋجان داۋىلباي 2015-جىلى تۋعان (دەنە جاراقاتى).

«بۇگىن، وسى جاعدايعا بايلانىستى شىمكەنت قالاسى اكىمدىگى جانىنان ارنايى جۇمىس توبى قۇرىلادى. وندا زارداپ شەككەندەردى ۋاقىتشا باسپانامەن قامتۋ جانە ماتەريالدىق كومەك كورسەتۋ ماسەلەسى قارالادى»، - دەيدى وبلىستىق توتەنشە جاعدايلار جونىندەگى دەپارتامەنتتىڭ باس مامانى زاريپا ابدۋللايەۆا.

ەسكە سالايىق، 8- قاڭتاردا شامامەن ساعات 03:30 دا شىمكەنت قالاسىنداعى حالىقتار دوستىعى كوشەسىندە ورنالاسقان ەكى قاباتتى تۇرعىن ۇيدە گاز باللونى جارىلىپ، باسپانا وپىرىلىپ قۇلاعان بولاتىن.

جارىلىس ورىن العان ۇيگە ءبىرىنشى بولىپ، جاقىن ماڭدا تۇراتىن ۇلتتىق ۇلاننىڭ قىزمەتشىسى ستارشينا رۋسلان باحراموۆ جەتكەن.

ول قۇلاعان ءۇيدىڭ ءۇيىندىسىنىڭ استىنان ازامات د. جۇماليەۆتىڭ وتباسىن شىعارىپ العان. وكىنىشكە وراي، جۇماليەۆتىڭ زايىبى العان جاراقاتتار سالدارىنان سول جەردە كوز جۇمدى. كوپ ۇزاماي، وقيعا ورنىنا شىمكەنت قالاسىنىڭ قۇتقارۋشىلارى جەتتى.

الماس سۇلتان

سوڭعى جاڭالىقتار