16:18, 08 - قاڭتار 2017 | GMT +5
ۋنيۆەرسيادا جارىستارىنا كورەرمەن وزىمەن بىرگە ءبىر بالانى تەگىن كىرگىزە الادى
استانا. قازاقپارات - الماتىدا وتەتىن دۇنيەجۇزىلىك قىسقى ۋنيۆەرسيادا ويىندارى كەزىندە جارىسقا كورەرمەندەر وزىمەن بىرگە 5 جاسقا دەيىنگى ءبىر بالانى تەگىن كىرگىزە الادى، دەپ حابارلايدى قازاقپارات ءتىلشىسى.

الايدا، بالاعا بولەك ورىن بەرىلمەيدى. ءبىر ەرەسەك اداممەن 5 جاسقا دەيىنگى ءبىر بالا عانا تەگىن كىرە الادى.
ەستەرىڭىزگە سالا كەتەيىك، قىسقى ۋنيۆەرسيادا 29- قاڭتارمەن 8- اقپان ارالىعىندا الماتى قالاسىندا وتەدى. وندا سپورتشىلار مانەرلەپ سىرعاناۋ، شورت-ترەك، تاۋ شاڭعى سپورتى، سنوۋبورد، بياتلون، شاڭعى جارىسى، شايبالى حوككەي، كەرلينگ، شاڭعىمەن تۇعىردان سەكىرۋ، شاڭعى قوسسايىسى، فريستايل جانە كونكيمەن جۇگىرۋ سپورتىنان ونەر كورسەتەدى.
اۆتور: كۇنسۇلتان وتارباي