بيزنەسمەندەر قالالارعا اسكەر كىرگىزۋدى سۇراپ وتىر

استانا. قازاقپارات - مەكسيكانىڭ ۇيلەستىرۋشىلىك كاسىپكەرلىك كەڭەسى بيلىكتەن بەنزين باعاسى كوتەرىلگەننەن كەيىن باستالعان تارتىپسىزدىكتەر بارىسىندا بولىپ جاتقان زورلىق-زومبىلىق پەن ۇرلىق ارتىپ وتىرعان قالالارعا فەدەرالدى كۇشتەردى ەنگزۋدى سۇراپ وتىر، دەپ حابارلايدى قازاقپارات «ر ي ا نوۆوستي» اگەنتتىگىنە سىلتەمە جاساپ.

«ءبىزدىڭ قىزمەتكەرلەردىڭ، كليەنتتەرىمىز بەن دۇكەندەرىمىزدىڭ قاۋىپسىزدىگىن جانە قۇقىقتارىن قورعاۋ ءۇشىن شتاتتار مەن قالالاردىڭ پوليتسيا كۇشتەرى جەتكىلىكسىز تۇردە جۇمىلدىرىلعانى ايدان انىق. زارداپ شەككەن نەگىزگى قالالارعا فەدەرالدى كۇشتەردىڭ ەنگىزىلۋىن سۇرايمىز»، - دەلىنگەن ۇيىمنىڭ حابارلاماسىندا.

كەڭەس مۇشەلەرىنىڭ ايتۋىنشا، ۆانداليزم اكتىلەرىنە ۇلاسقان قارسىلىق اكسيالارى كاسىپكەرلەر، دۇكەندەر، تۋريزم مەن مەيرامحانالارعا زارداپ تيگىزۋدە.

سونداي-اق بيزنەسمەندەر بەنزيننىڭ قىمباتتاۋىنا بايلانىستى الەۋمەتتىك جەلىلەر ارقىلى قۇقىققا قارسى ارەكەتتەرگە ۇندەگەن حابارلامالارعا ەگجەي-تەگجەيلى تەرگەۋ جۇرگىزۋدى تالاپ ەتىپ وتىر.

1- قاڭتار كۇنى بەنزيننىڭ شامامەن 20 پايىزعا كوتەرىلۋىنە قارسى باستالعان قارسىلىق اكسيالارى جاپپاي تارتىپسىزدىكتەرگە جانە ساۋدا نۇكتەلەرىنىڭ تونالۋىنا ۇلاستى. سوڭعى مالىمەتتەرگە سايكەس، بىرنەشە كۇننىڭ ىشىندە شاعىن، ورتا جانە ءىرى بيزنەستىڭ 400 دەن استام ساۋدا نۇكتەسىنە قاراقشىلىق شابۋىل جاسالدى.

توناۋ فاكتىلەرى لاتينوامەريكالىق مەملەكەتتىڭ بارلىعى 12 شتاتىندا بەلگىلەندى.