قازاقستان و پ ە ك الدىنداعى مىندەتتەمەلەرىن ورىنداۋعا كىرىستى

مۇناي ونەركاسىبىن دامىتۋ دەپارتامەنتىنىڭ ديرەكتورى قۋاندىق قۇلمۇرزيننىڭ ايتۋىنشا، قاڭتار ايىنان باستاپ، ەلىمىز مۇناي ءوندىرۋ كولەمىن مۇناي كارتەلىنىڭ ماجىلىسىندە ايتىلعانداي، تاۋلىگىنە 20 مىڭ باررەلگە قىسقارتتى. الايدا مينيسترلىك وكىلى ءوندىرىس قىسقارتىلعان كەنىشتەردىڭ اتتارىن اتامادى.
وسىعان دەيىن ۆەدومستۆو باسشىسى قانات بوزىمبايەۆ اقتوبە، قىزىلوردا جانە باتىس قازاقستان وبلىستارىنداعى كەنىشتەر تۋرالى ايتقان بولاتىن. ول جەرلەردە مۇناي ءوندىرۋ كولەمى تابيعي تۇردە ازايىپ كەلە جاتقان.
«ءبىز 20 مىڭ باررەلگە از وندىرەمىز. جىل سوڭىنا دەيىن و پ ە ك مۇشەلەرى مەن ونىڭ بايقاۋشى ەلدەرىنىڭ كەزدەسۋى بولادى. سونىمەن قاتار تاعى ءبىرقاتار كەزدەسۋلەر بولىپ، ولاردىڭ بارىسىندا باقىلاۋ تەتىكتەرىمەن قاتار ودان ارعى ءىس- قيمىل جوسپارى دا ءسوز بولادى. ولار ىقپال ەتەدى مە، ناتيجەسىن بەرەدى مە، ول جاعىن ءبىز بىلمەيمىز. ەڭ قۇرىعاندا ءبىر اي كۇتە تۇرۋ كەرەك»، - دەدى قۋاندىق قۇلمۇرزين.
بەلگىلى بولعانىنداي، ءوندىرىس كولەمىن ساۋد ارابياسى قىسقارتتى. Wall Street Journal باسىلىمىنىڭ حابارلاۋىنشا، اڭگىمە تاۋلىگىنە 486 مىڭ باررەل تۋرالى بولىپ وتىر. وپەك مۇشەلەرى 30 - قاراشادا وتكەن ماجىلىستە تۋرا وسىنداي كورسەتكىش بويىنشا كەلىستى.
ايتا كەتەيىك، كارتەل مۇشەلەرى ءوندىرىس كولەمىن تاۋلىگىنە 1 ميلليون 200 مىڭ باررەلگە قىسقارتۋعا كەلىستى. ياعني 32 ميلليونعا دەيىن قىسقارتۋ تۋرالى ايتىلدى. و پ ە ك ەلدەرىنە كىرمەيتىن قازاقستان سياقتى ەلدەرگە كەلەتىن بولساق، ولار مۇناي ءوندىرۋدى تاۋلىگىنە بارلىعى 558 باررەلگە قىسقارتۋعا كەلىستى. ونىڭ نەگىزگى سالماعىن رەسەي وزىنە الدى. ول ءوندىرىستى تاۋلىگىنە 300 مىڭ باررەلگە ازايتاتىن بولدى. ازەربايجان 35 مىڭعا، مەكسيكا 100 مىڭعا قىسقارتۋعا كەلىستى. قازىرگى تاڭدا تەك ەكى ەل عانا وزدەرىنىڭ وسى مىندەتتەمەلەرىن ورىنداۋعا كىرىسكەندىكتەرىن جاريا ەتتى.