ەرتىس وزەنىنىڭ ۇستىنەن مۇز وتكەلدەرى اشىلدى

استانا. قازاقپارات - جىل سايىن قىسقى كەزەڭدە ەرتىس وزەنىندە ءتيىستى تالاپتاردى ساقتاۋ كەزىندە مۇز وتكەلدەرى جانە جاياۋ وتپە جولدار سالىنادى، دەپ حابارلايدى ت ج ك- نىڭ سايتى.
None
None

وزەن ۇستىنەن وتكەلدەردىڭ اشىلۋى اۋىل تۇرعىندارى ءۇشىن ۇلكەن وقيعا، ويتكەنى اۋىلدار اراسىنداعى جولدى قىسقارتادى، دايىندالعان پىشەن جانە وتىن تاسىمالداۋ جەڭىلدەيدى.

ۇستىمىزدەگى جىلى رەسمي تۇردە اقتوعاي، ەرتىس، لەبياجي جانە ماي اۋداندارىندا ءتورت مۇز جولى جەگىن كولىكتىڭ وتكەلى جۇمىس جاسايدى. وتكەلدەر اۋدان اكىمدەرىنىڭ وكىمدەرىنە سايكەس اشىلدى.

ەرتىس اۋىلىندا مۇز وتكەلى پارومدىق وتكەلدىڭ ورنىندا ورنالاسقان، مۇزدىڭ قالىڭدىعى 49-55 س م، اقتوعاي اۋىلىندا جاعاجاي اۋدانىندا ورنالاسقان مۇزدىڭ قالىڭدىعى 54 س م. وبلىستىڭ باسقا اۋداندارىندا مۇز وتكەلدەرىن رەسمي اشۋعا ازىرشە رۇقسات جوق.

2017 - جىلى قاڭتاردا جەلەزينكا اۋدانىنىڭ ءۇش اۋىلدىق وكرۋگىندە (جەلەزينكا، باشماچينسك جانە پرييرتىشسك) اشىق مۇزدى وتكەلدەر اشۋ جوسپارلانعان.

قازىرگى ۋاقىتتا اۋا تەمپەراتۋراسىنىڭ وزگەرۋىنەن بارلىق وتكەلدەر نەگىزىنەن جاياۋ جانە شانالارعا ارنالعان، ال اۆتوكولىكتەردىڭ سالماعى 2,5 توننادان اسپاۋى كەرەك.

وتكەن جىلداعىداي مۇز جولدارى مەن وتكەلدەرىن ۇستاۋ ءۇشىن پىشەن تاسىمالىن ۇيىمداستىراتىن شارۋا قوجالىقتارىنىڭ باسشىلارى جاۋاپتى بولادى.

جەرگىلىكتى باسىلىمدار ارقىلى كورسەتىلگەن وتكەلدەر مەن وتپە جولداردىڭ ورىندارى تۋرالى، ولاردىڭ جۇمىس ىستەۋ كەستەسى، جاۋاپتى جەكە جانە زاڭدى تۇلعالار كورسەتىلگەن اقپارات جەتكىزىلدى.

ءبىراق رەيدتەر بارىسىندا قۇتقارۋ بولىمشەلەرى اقتوعاي اۋدانىنىڭ پريرەچەنكا، قوجامجار، مۇتكەنوۆ اۋىلدارىندا اپاتتىق شانا وتكەلدەرى، قاشىر اۋدانىنىڭ تەرەڭكول، بەرەگوۆوە، پەسچانوە، بايقونىس اۋىلدارىندا جاياۋ وتپە جولدارى انىقتالدى.

مۇزدىڭ بەرىكتىگىنە جانە ونىڭ قالىڭدىعىنا قاراماستان، مۇز وتكەلدەرى بويىنشا جۇرگەندە وتە اباي بولعان ءجون. وتكەلدىڭ ۇستىمەن ءجۇرۋ جىلدامدىعى ساعاتىنا 10 شاقىرىمنان اسپاۋى كەرەك.

مۇز وتكەلىمەن جۇرگەن كەزدە كولىكتىڭ ەسىكتەرى اشىق، قاۋىپسىزدىك بەلبەۋلەرى شەشۋلى بولۋى قاجەت. كولىكتىڭ جولاۋشىلارى وزەندى جاياۋ كەسىپ وتەدى. ءبىر مەزگىلدە ەكى اۆتوكولىك قوزعالسا، وتكەلگە كىرگەن كەزدە كورسەتىلگەن اراقاشىقتىقتى قاتاڭ تۇردە ساقتاۋ قاجەت.

سوڭعى جاڭالىقتار