باتىرحان شۇكەنوۆتىڭ ءانىن ەستىگەن رەسەيلىك زاعيپ قىز قازاق تىلىنە عاشىق بولىپ قالدى
زاعيپ جاندارعا ارنالعان مەكتەپ-ينتەرناتتىڭ شاكىرتى قازاق تىلىمەن بىرگە مادەنيەتىن، ادەت-عۇرىپتارىن دا زەرتتەپ ءجۇر دەپ جازادى «ەۆريكا» باسىلىمىنا سىلتەمە جاساپ Skifnews.kz پورتالى.
بويجەتكەن قىزدىڭ ايتۋىنشا، ول وسىدان بىرنەشە جىل بۇرىن الەۋمەتتىك جەلى ارقىلى قازاق جاستارىمەن تانىسقان ەكەن. ولار ۆيكاعا قايرات نۇرتاستىڭ اندەرىن تىڭداتىپ، ۇناعاندارىن ورىسشاعا دا اۋدارىپ بەرگەن ەكەن.
«ول ءالى باستاۋى بولاتىن. ال، باتىرحان شۇكەنوۆتىڭ «وتان انا» ءانىن تىڭداعان كەزدە مەنىڭ جان دۇنيەمدە تەبىرەنىس پايدا بولدى. قانداي سەزىمدەر تەربەگەنىن سوزبەن ايتىپ جەتكىزە المايمىن. بالكىم مۇنداي ادامنان ايرىلىپ قالعانىمىزعا دەگەن وكىنىش تە بولعان شىعار. ال، ءان كەرەمەت. مەنىڭ ويىمشا، باتىر بۇل انگە ءوزىنىڭ وتانىنا دەگەن ماحابباتىن قوسىپ ورىنداعان. ال، ءانشىنىڭ بۇل سەزىمى ماعان دا بەرىلدى. مىنە، وسىدان كەيىن مەن قازاق ءتىلىن ۇيرەنۋگە شىنداپ كىرىستىم»، - دەيدى ماسكەۋلىك قىز.
ۆيكتوريا ءتىل ۇيرەنۋ ءۇشىن الدىمەن soyle.kz پورتالىنىڭ قىزمەتىن پايدالانعان ەكەن. الايدا، ءسال ۋاقىتتان كەيىن اتالعان سايتتىڭ زاعيپتارعا ارنالعان فۋنكتسياسى ىستەن شىعىپ قالعان. كەيىن، «جاس تولقىن» ونلاين-كۋرسىمەن ءتىل ۇيرەنبەك بولعاندا، ول قىزمەتتىڭ دە زاعيپتارعا ارنالعان فۋنكتسياسى پايدالانۋعا قولايسىز بولىپتى. العان بەتىنەن قايتپاعان بويجەتكەن الەۋمەتتىك جەلىلەر ارقىلى ءتىل ۇيرەتەتىن مۇعالىم ىزدەپ، ونى اقىرى اقتوبەدەن تاۋىپ وتىر.
قازىر ماسكەۋلىك وقۋشى ءوزى تۋرالى قازاق تىلىندە ەركىن ايتىپ بەرە الادى. ءبىراق، ونىڭ ارمانى - قازاق تىلىندە تازا سويلەپ، ولەڭ سوزدەرىن اۋدارۋ، قازاقشا فيلمدەر كورۋ.
«مەن قازاق ەرتەگىلەرىنىڭ كەيىپكەرى الدار كوسەنى جاقسى بىلەمىن، قىز جىبەك تۋرالى فيلمدى كورىپ شىقتىم. امىرە قاشاۋبايەۆ پەن ءشامشى قالداياقوۆتىڭ اندەرىن تىڭدادىم. قازىرگى ەسترادانى دا تىڭداپ وتىرامىن. مۇقاعاليدىڭ ولەڭدەرىن وقيمىن. ماعان ۇنايدى. ماعىناسىن تۇسىنبەگەن كۇننىڭ وزىندە ۇيقاستارى، مانەرى ۇنايدى»، - دەيدى ۆيكتوريا اندرەيەۆا.
ونىڭ ايتۋىنشا، قازاق ءتىلى ونىڭ انگە دەگەن ماحابباتىن وياتىپتى.
«تەك قازاق ءتىلىن ۇيرەنە باستاعاننان كەيىن مەنىڭ ءان ايتۋعا دەگەن قۇشتارلىعىم وياندى. العاشىندا تەك تىڭدايتىنمىن. كەيىن نەگە وزىمە ءان ايتپاسقا دەپ شەشتىم. ايتاتىن ءانىمدى ۇزاق تاڭداپ، اقىرى تاسپاعا جازىپ شىقتىم»، - دەيدى بويجەتكەن.
ۆيكانىڭ قازىرگى ارمانى - قازاقستانعا كەلىپ، قازاقتارمەن قازاقشا سويلەسۋ، سۇيىكتى انشىلەرىمەن كەزدەسىپ، قولتاڭبا الۋ. سونداي-اق، ەڭ الدىمەن قازاقتىڭ ۇلتتىق تاعامى ەتتەن اۋىز تيۋ دەيدى ول.
