باسپاناسىنان ايىرىلعان شاحاندىقتارعا پاتەر الۋعا دەمەۋشىلەر كومەك كورسەتەدى
«پاتەرلەر ەكىنشى دەڭگەيلى تۇرعىن ءۇي نارىعىنان قور ەسەبىنەن الىنادى. باستى ءۇمىت قورعا ارتىلىپ وتىر»، - دەدى ايماقوۆ جۋرناليستەرگە بەرگەن سۇحباتىندا.
«ءبىز بيۋدجەتتەن تىكەلەي تەك اپاتتان-قۇتقارۋ جۇمىستارىنا عانا قارجى بولە الامىز. ياعني، تەحنيكانى پايدالانۋ، جانار-جاعار ماي الۋ، ادامداردىڭ تاعامىنا دەگەن سياقتى»، - دەدى ول.
اكىمنىڭ مالىمەتتەرىنشە، قازىر 12 پاتەر الۋ قاجەت بولىپ تۇر.
اكىم جاس اندروپوۆتار وتباسىندا دۇنيەگە كەلگەن 7 جاسار پولينانى نازاردان تىس قالدىرمايتىنىن ايتتى. كىشكەنتاي قىز اتا- اناسىنان جانە سىڭىلىسىنەن ايىرىلىپ قالدى.
«ول وسى اپاتقا ۇشىراعان ءۇيدىڭ يەسى. سول سەبەپتى وعان دا پاتەر الىنىپ بەرىلەدى. قازىر ونىڭ تۋىستارى قىزدى كىم قامقورشىلىعىنا الاتىنىن شەشۋدە»، - دەپ ناقتىلادى شاحتينسك اكىمى.
بيلىك وكىلدەرى سونىمەن قاتار پسيحولوگيالىق تۇرعىدان وزدەرىنىڭ جارىلىستان امان قالعان ۇيلەرىنە كىرگىلەرى كەلمەيتىن ازاماتتارعا دا باسپانا الىپ بەرمەك. اكىمنىڭ سوزىنشە، ەكى ازامات قازىر وسىنداي جاعدايدا تۇر.
«الدىمەن 45 پاتەردىڭ يەلەرى قونىستانادى. وزگەلەرى بويىنشا ماسەلە كەيىنىرەك شەشىلەدى»، - دەدى سەرجان ايماقوۆ.
بۇعان قوسا، قازىر ارنايى كوميسسيا وكىلدەرى توتەنشە جاعدايدىڭ سالدارىنان جەكە مۇلىككە كەلگەن شىعىندى ەسەپتەپ جاتىر. شىعىندى وتەۋ ءتيىستى زاڭناماعا سايكەس جۇزەگە اسىرىلادى.
بۇگىنگى تاڭدا قۇلاعان 4- پودەزدى جوندەۋ جۇمىستارى ءجۇرىپ جاتىر. تۇرعىندار كەلەسى اپتادا وزدەرىنىڭ باسپانالارىنا قايتا ورالادى. الدىمەن مودۋلدى قازاندىق ىسكە قوسىلادى. وسىعان دەيىن حابارلانعانىنداي، شاحاندا زارداپ شەككەندەرگە قارجىلاي كومەك بەرۋ ماقساتىندا جەكە قايىرىمدىلىق قورى اشىلعان.
