ديماش قۇدايبەرگەنوۆ قىتايدىڭ ءان بايقاۋىنا قاتىسادى
قىتايلىق sina.com پورتالى 5 - قاڭتاردا بايقاۋعا قاتىسۋشى 7 ءانشىنىڭ ەسىمدەرىن جاريالادى. جوباعا قاتىسۋشىلار اراسىندا ديماش تا بار.
قىتايدىڭ تانىمال Sina Weibo (تۋيتتەردىڭ بالاماسى) قولدانۋشىسى ءوز پاراقشاسىندا ديماشتىڭ چاڭشا قالاسىندا قىدىرىپ جۇرگەن ۆيدەوسىن جۇكتەدى.
ايتا كەتەرلىگى، جوبانىڭ ۇيىمداستىرۋشىلارى بۇعان دەيىن جەكە بلوگتارىندا قازاقستاننان قايرات نۇرتاستىڭ قاتىساتىنىن ايتقان ەدى.
كورەيانىڭ «I Am a Singer»جوباسىنىڭ قىتايلىق نۇسقاسى ەلدە ۇلكەن سۇرانىسقا يە.
جوبا تايۋان، ماكاو، سينگاپۋر جانە كورەيانىڭ جۇلدىزدارى، سونىمەن قاتار قىتاي انشىلەرىنىڭ قاتىسۋىمەن جۇرتشىلىققا تانىمال بولىپ وتىر.
ال ديماشتىڭ ەسىمى قىتايعا وسى ەلدىڭ اتاقتى ءانشى - كومپوزيتورى حان حۋننىڭ «تاڭ اتتى» ءانىن ورىنداۋىمەن بەلگىلى.
بايقاۋدىڭ جالپى 5 ىرىكتەۋ كەزەڭى، سونداي- اق، جارتىلاي فينالى جانە فينالدىق سايىستارى 21 - قاڭتاردان 15 - ءساۋىر ارالىعىندا چاڭشا قالاسىندا وتەدى.
اۆتور: مۇحتار قاليموللا ۇلى
