قازاق حاندىعى تۋرالى فيلمدى كينوتەاتردان كورگەندەر ءوز اسەرىمەن ءبولىستى
قازاقپارات ءتىلشىسى تاريحي تۋىندىنى كينوتەاتردان ءبىرىنشى بولىپ تاماشالاعان كورەرمەندەردىڭ پىكىرلەرىن جازىپ الدى.
«بۇل كينو وتە كۇشتى ءتۇسىرىلدى. قازاق حاندىعىنىڭ تاريحتاعى ورنىن جاقسى كورسەتە ءبىلدى. ءبىز نەمەرەلەرىمىزدىدە الىپ كەلدىك. سەبەبى جاستار وسىنداي فيلمدەردى كورۋى كەرەك، ءوز تاريحىن ءبىلۋى كەرەك. شىنى كەرەك، قازاققا رۋح بەرەتىن فيلم، ۇلتتىق سانانى سەرپىلتەتىن تۋىندى»، - دەيدى ەركىن قۇسايىن.
وتاعاسى وتباسىمەن بىرگە الماتىدان قوناققا كەلگەن ەكەن. «الماس قىلىش» فيلمى پروكاتقا شىعادى دەگەندى ەستىگەن بويدا بىردەن العاشقى سەانسقا بيلەت العان. «ءيا، ءبىز دە، بالالار دا كوپ ماعلۇمات الدىق. ءبارىمىز تۋرا سول تاريحي كەزەڭگە ساپار جاساپ، ءوز كوزىمىزبەن كورگەندەي بولدىق. بۇل فيلمدى كينوتەاتردا عانا ەمەس، مەكتەپ وقۋشىلارى دا، ستۋدەنتتەر دە كورسە ەكەن دەيمىز. تاريحي سانامىزدى وياتاتىن فيلم ەكەن»، - دەيدى اعانىڭ جۇبايى ەسىمحان قۇسايىن.
«بۇل فيلم بۇرىن وقىعان كىتابىمىزدان دا كەرەمەت بولدى دەپ وتىرمىن. وتە جاقسى تۇسىرىلگەن. دەكوراتسياسىندا تاماشا جاساعان. بىزگە قاتتى ۇنادى»، - دەيدى ايكەن وسپانوۆا.
«ونى كۇتكەنىمىزگە كوپ بولدى عوي. مىنەكي، بۇگىن تاريحىمىزدى ءبىلسىن دەپ، بالا- شاعامىزدى ادەيى الىپ كەلدىك. اتا- بابامىزدىڭ قانى توگىلدى دەپ، قانشا ايتقانمەن ول ءبارىبىر كورگەندەي بولمايدى. سوندىقتان وسى فيلمدى اسىعا كۇتتىك. ونى وتە جاقسى تۇسىرگەن ەكەن. تاريحىمىزدى ايشىقتاپ، ءوزىنىڭ تاعىلىمى مەن ونەگەسى مول دۇنيە ەكەن. جالپى، فيلم ۇنادى. مازمۇنى دا، ارنايى ەففەكتىلەرى دە تاماشا. قازاق كينولارىنىڭ وسىنداي الەمدىك دارەجەدە تۇسىرىلەتىندەي جاعدايعا جەتكەنىنە وتە قۋانىشتىمىز. سوندىقتان وسى ىسپەتتى فيلمدەر كوبەيە بەرسىن»، - دەيدى اپايدىڭ ۇلكەن ۇلى ارداق وسپانوۆ.
اۆتور: ارمان اسقاروۆ
