اراب بايلارى ارىستان جەتەكتەپ جۇرە المايتىن بولدى
بۇل كۇندە ارابيا سىندى مۇنايلى ەلدىڭ باي تۇرعىندارىندا قابىلان، ارىستان، جولبارىس سىندى جىرتقىشتاردى اسىراۋ بەت- بەدەل مەن اتاق- ابىرويدىڭ بەلگىسى ساناۋ داستۇرگە اينالعان. الايدا ەندىگى جەردە بايلار وسى ىستەرى ءۇشىن كوپ مولشەردەگى ايىپپۇل تولەۋىنە تۋرا كەلەدى. ءتىپتى باس بوستاندىعىنان ايىرىلۋى دا مۇمكىن.
وسىدان بۇرىن ادامدار الەۋمەتتىك جەلىلەردەن اراب باي- باعلاندارىنىڭ ءىرى مىسىق تۇقىمداس جىرتقىشتاردى جەتەكتەپ، سەيىلدەپ جۇرگەن سۋرەتتەرىن كورۋگە بولاتىن. ءتىپتى، اۆتوكولىكتىڭ ورىندىعىندا وتىرعان ارىستانداردى دا كورەتىن ەدى. قازان ايىندا دۋباي جاعاجايىندا اسىر سالعان جولبارىستىڭ ماۋلەندەرى تۇسىرىلگەن ۆيدەو الەۋمەتتىك جەلىنى شارلاپ، جەلى تۇتىنۋشىلارىنىڭ قىزىعۋشىلىعىن تۋدىرعان بولاتىن.
ارينە، ءا ب ا- ءنىڭ بيلىگى وسى جىرتقىشتاردىڭ قوعامدىق قاۋىپسىزدىككە قاتەر توندىرۋىنەن الاڭدايدى. اتقارۋعا بەرىلگەن سوڭعى زاڭدارىنا سايكەس، «كەز كەلگەن جەكە تۇلعانىڭ جابايى اڭداردىڭ بارلىق ءتۇرىن، جىرتقىش اڭداردى، قولعا ۇيرەتىلگەن ادام ومىرىنە قاتەر توندىرەتىن جانۋارلاردى اسىراۋعا، تاماقتاندىرۋعا بولمايدى» .
ەگەر بۇل زاڭدى بۇزعان جەكە تۇلعالار انىقتالسا، 6 ايعا دەيىن باس بوستاندىعىنان ايىرۋ جازاسى قولدانىلىپ، 500 مىڭ ديرحان (13,6 مىڭ ا ق ش دوللار) ايىپپۇل سالىنادى. ەگەر جىرتقىش جانۋارلاردى باسقالاردى قورقىتۋ ءۇشىن پايدالانىلسا، ايىپ پۇلى 700 مىڭ ديرحانعا دەيىن جوعارىلايدى.
