الماتىدا ۋاقىتشا تىركەۋگە تۇرۋ قۇنى قانشا
ناقتىراق ايتقاندا، كۇنكورىس ءيا باسقا دا سەبەپتەرمەن ۋاقىتشا جۇرگەن ازاماتتاردى جاڭا زاڭ تالابى بويىنشا تىركەۋگە الۋ ءۇشىن پاتەر يەلەرى قانشا باعا سۇراپ، قانشا مەزگىلگە تىركەۋگە تۇرۋىنا رۇقسات بەرە الاتىنىن سۇراستىرىپ ءبىلدى.
بۇگىنگى تاڭدا ينتەرنەتتە ازاماتتاردى الماتىدا تىركەۋگە قويۋ تۋرالى جارنامالار كوبەيىپ وتىر. وسىعان وراي، «قازاقپارات» ءتىلشىسى الماتىعا مەكەنجاي اۋىستىرعان ادام قانشالىقتى اقى تولەپ، قانداي جاعدايدا تىركەۋگە تۇرا الاتىنىن انىقتاۋعا تىرىستى.
قازىرگى قوعامداعى ۇسىنىس بويىنشا، الاتاۋ اۋدانىندا ءبىر ادامعا ءبىر جىلعا تىركەۋگە تۇرۋ شامامەن 50-60 مىڭ تەڭگەگە شىقسا، ناۋرىزباي اۋدانىندا جارتى جىل تىركەۋدە تۇرۋ قۇنى 40 مىڭ تەڭگە، ال تۇتاس ءبىر جىلعا 55 مىڭ تەڭگە بولىپ وتىر. مەدەۋ، بوستاندىق سەكىلدى قالا ورتالىعىنداعى اۋدانداردا باعا قىمبات. وندا جارتى جىلعا ادامدى تىركەۋگە الۋ 60 مىڭ تەڭگەگە شىعادى.
تىركەۋگە تۇرعىزىپ بەرۋگە ۋادەر بەرىپ جۇرگەندەر بارلىعى رەسمي تۇردە زاڭدى بولاتىنىن ايتىپ سەندىرەدى.
«ەگەر قانداي دا ءبىر ولقىلىقتار بولسا، حالىققا قىزمەت كورسەتۋ ورتالىقتارىندا ول كورىنىپ تۇرادى، سوندىقتان بارلىعىن رەسمي تۇردە جاسايمىز»، - دەدى قازاقپارات ءتىلشىسى اڭگىمەگە تارتقان دەلدال.
ايتا كەتەيىك، مۇنداي جارنامالار قازىر الاتاۋ اۋدانىندا كوبىرەك. اۋەزوۆ اۋدانىندا 3 ايدان ارتىق ۋاقىت تىركەۋگە تۇرعىزىپ بەرۋ قۇنى 40 مىڭ تەڭگە، ال 6 ايعا 60 مىڭ تەڭگە قاجەت بولادى.
ەسكە سالا كەتەيىك، قازاقستاندا «ەكسترەميزم مەن تەرروريزمگە قارسى ءبىرقاتار زاڭناماعا وزگەرىستەر مەن تولىقتىرۋلار ەنگىزۋ» تۋرالى زاڭعا قول قويىلعان بولاتىن. اتالعان زاڭ بويىنشا ازاماتتاردىڭ ۋاقىتشا مەكەنجايى بويىنشا تىركەۋگە تۇرۋى مىندەتتەلىپ وتىر.
سونىمەن قاتار، پاتەردى جالعا بەرۋشىگە دە، الۋشىعا دا رۇقسات قاعازى بولماسا، ايىپپۇل سالىناتىن بولادى. ساراپشىلاردىڭ پىكىرىنە سۇيەنسەك، مۇنداي شارا زاڭسىز پاتەر جالعا بەرۋشىلەر سانىن ازايتىپ، ىشكى ميگراتسيادا ەسەپ جۇرگىزۋگە سەبەپ بولادى.
اۆتور: الماس مۇقاش ۇلى
