كولىكتەرگە حابار بەرۋ قوندىرعىسىن ورناتۋ تۋرالى ەرەجە كۇشىنە ەندى
«ەرا- گلوناسس» دەپ اتالاتىن بۇل قۇرىلعى جول- كولىك وقيعاسى بولعان جاعدايدا ترانسپورتتىڭ مەكەنىن ناقتى انىقتاۋعا مۇمكىندىك بەرمەك. دەگەنمەن تەحنيكالىق رەگلامەنتتەگى بۇل وزگەرىس كولىك باعالارىنا قالاي اسەر ەتپەك؟
جول- كولىك وقيعاسى تۋرالى اقپاراتتى اۆتوماتتى تۇردە جەدەل جاردەم، توتەنشە جاعدايلار مەن پوليتسيا قىزمەتتەرىنە حابارلايتىن «ەرا- گلوناسس» قۇرىلعىسى جولاۋشىلار قاۋىپسىزدىگى ءۇشىن قوندىرىلماق. ونىڭ كومەگىمەن كولىكتىڭ ءنومىرى مەن ماركاسىن، قاي جەردە، قانداي جىلدامدىقپەن ءجۇرىپ بارا جاتقانىن انىقتاۋعا بولادى. جۇيەنىڭ نەگىزگى مىندەتى - قيىندىققا تاپ بولعان كولىك يەسىنە سۋىت جەتىپ، جەدەل كومەك كورسەتۋ.
«جەدەل جاۋاپ قاتۋ جۇيەسى ءسوزسىز قاجەت، سەبەبى ادامداردىڭ ومىرىنەن ارتىق ەشتەڭە جوق. ءاربىر مينۋت ساناۋلى، مۇنداي كەزدە ەشكىم ونىڭ ورناتۋ باعاسىن ويلاپ باس اۋىرتپايتىن شىعار. ەسەسىنە ۋاقىت وتە جول- كولىك وقيعالارىنىڭ سانى قىسقارادى. جول ۇستىندەگى جۇرگىزۋشىلەر ءومىرىن ساقتاپ قالۋعا بارلىعىمىز مۇددەلىمىز» ، - دەيدى قازاقستان اۆتوبيزنەس قاۋىمداستىعىنىڭ ءتوراعاسى اندرەي لاۆرەنتيەۆ.
دەسە دە تىڭ جۇيە ەۋروپا مەن اقش سياقتى ەلدەردەن جاڭا كولىك اكەلىپ ساتاتىن ديلەرلەردىڭ نارازىلىعىن تۋدىرۋدا. سەبەبى جەدەل جاۋاپ قاتۋ جۇيەسى ورناتىلماعان تەمىر تۇلپارلارعا ولاردىڭ قاۋىپسىزدىگىن راستايتىن كۋالىك بەرىلمەيدى. ال اتالمىش كۋالىكسىز كولىك قۇرالى پاسپورتىن الۋ مۇمكىن ەمەس. تاۋەلسىز كولىك جۇرگىزۋشىلەر وداعىنىڭ ءتوراعاسى قۇرىلعىنى قوندىرىپ، ءتيىستى قۇجاتتاردى راسىمدەۋ ءۇشىن 800 مىڭ ەۋروعا دەيىن قاراجات قاجەت. ال بۇل جىلىنا ونشاقتى دانا كولىك ساتاتىن ديلەرلەر ءۇشىن ءتيىمسىز - دەيدى. ماماندار بۇل سايىپ كەلگەندە رەسەيلىك اۆتو ءوندىرىستى قولداۋعا باعىتتالعان كەزەكتى شارا ەكەندىگىنە سەنىمدى.
«رەسەيدە وندىرىلگەن كولىكتەرگە رەسەيدىڭ وزىندە سۇرانىس تومەندەپ جاتىر. رەسەيلىك اۆتو ءوندىرىس شىعىندارى 2015 - جىلى 1 ميلليارد دوللارعا جەتتى. ولار شىعارعان ءونىمنىڭ 80 پايىزى بۇگىندە قازاقستانعا ەكسپورتتالادى. سەبەبى ءمورالدى تۇرعىدا ەسكىرىپ كەتكەن بۇل كولىكتەردى شەتەلدىكتەرگە وتكىزۋ مۇمكىن ەمەس. سوندىقتان وسىنداي تالاپتارمەن، قوسىمشا شەكتەۋلەرمەن رەسەيلىك اۆتو ءوندىرىستىڭ سويىلىن سوعىپ وتىرعان شەندىلەر تۇرعىندارىمىزدى اتالمىش كولىكتەردى تاڭداۋعا يتەرمەلەمەك» ، - دەپ اتاپ ءوتتى تاۋەلسىز كولىك جۇرگىزۋشىلەرى وداعىنىڭ ءتوراعاسى ەدۋارد ەدوكوۆ.
جولاۋشىلاردى قۇتقارۋعا ارنالعان قوندىرعى GSM جۇيەسى ارقىلى، ياعني بايلانىس وپەراتورلارىنىڭ كومەگىمەن جۇمىس ىستەمەك. ولاي بولسا، بايلانىس جوق جەردە، قۇرىلعىدا ورناتىلعان Sim كارتادان دا پايدا جوق سياقتى. ياكي كەدەندىك وداق ەلدەرى ءۇشىن كۇشتەپ مىندەتتەلىپ جاتقان «ەرا- گلوناسستىڭ» تيىمدىلىگى كۇماندى - دەيدى ماماندار.
31.kz
