شاحاندا قيراعان ءۇيدىڭ وت جاعۋشىسى ۇستالدى
ال جىلىنا جەتى اي تىنباي جاناتىن قازاندىقتان قاۋىپ ۇلكەن. بۇعان دەيىن ەشكىمنىڭ قاپەرىنە دە كىرىپ-شىقپاعان پەشتەر 9 ادامنىڭ ولىمىنەن كەيىن جاپپاي تەكسەرىلە باستادى. ءتىپتى جەرگىلىكتى بيلىك كىنالىنى تاۋىپ تا قويعان سياقتى. بار جاۋاپكەرشىلىك ارتىلعان وت جاعۋشى قازىر تەرگەۋشىلەر الدىندا جاۋاپ بەرۋدە. قىس تۇسسە بولعانى ءوز قوتىرىن ءوزى قاسىپ ۇيرەنگەن جۇرت بولسا، ۇيلەردە قالۋعا ۇرەيلەنىپ وتىر.
جانتۇرشىگەرلىك جارىلىستىڭ سەبەبى تەك ءبىر تاۋلىكتەن سوڭ بەلگىلى بولدى. سويتسە، جەرتولەدە ورنالاسقان دەربەس جىلۋ قازاندىعى قىسىمعا شىداماي جارىلعان ەكەن. سالدارىنان كوپ قاباتتى ءۇيدىڭ ءبىر بولىگى جەرمەن-جەكسەن بولدى.
دەسە دە، 9 ادامنىڭ قازا تاپقانىنا قاراماستان، بۇل جارىلىس ءۇشىن ناعىز كىنالىلەردىڭ تابىلمايتىن ءتۇرى بار. ويتكەنى، سۋ مەن جىلۋعا جاۋاپتى كوممۋنالدىق قىزمەتتىڭ بارىنا قاراماستان، قاراعاندىلىق شەنەۋنىكتەر بولعان وقيعاعا تۇرعىنداردىڭ تەك وزدەرى عانا جاۋاپتى دەپ وتىر.
«60 پاتەر ءبارى دە جەكەمەنشىك. وزدەرى شەشەدى. كەيبىر ۇيلەر پەشتەرمەن وتىر. كەيبىرەۋلەر سىرتىنا قازاندىق سالىپ الدى. كەيبىر ۇيلەر وزدەرىنە جەرتولەگە قازاندىق سالدى. جەكەمەنشىك بولعاننان كەيىن قاۋىپسىزدىككە وزدەرى جاۋاپتى»، - دەيدى قالا اكىمى سەرجان ايماقوۆ.
ليديا پريماكتىڭ ايتۋىنشا، جارىلىس تەك جىلىتۋ قازاندىعىنان بولماعان. وعان گاز باللونداردىڭ دا اسەرى بار. ويتكەنى، جىلۋعا جارىماعان شاحاندىقتار تەك پروپان تۇتىنادى ەكەن. ال كوگىلدىر وتىن قوسىلماعاندىقتان، بيلىكتەگىلەر دە وعان كوز جۇما قاراعان. ەسەسىنە، توعىز ادامنىڭ ءومىرىن جالماعان جارىلىس ءۇشىن قازاندىقتىڭ كۇتۋشىسى تەرگەلىپ جاتىر.
