شاحانداعى وقيعا: وت جاعۋشىعا ىزدەۋ جاريالاندى

قاراعاندى. قازاقپارات - شاحاندا قۇلاعان ۇيدە كەزەكشى بولعان وت جاعۋشىعا ىزدەۋ جاريالاندى، دەپ حابارلايدى قازاقپارات ءتىلشىسى شاحان اكىمى سەرجان ايماقوۆقا سىلتەمە جاساپ.

«مەنىڭ بار بىلەرىم، ءالى كۇنگە دەيىن وت جاعۋشىنى تابا الماۋدا. ىزدەستىرۋ جۇمىستارى ءجۇرىپ جاتىر. قىلمىستىق ءىس قوزعالىپ، تەرگەۋ شارالارى جۇرۋدە»، - دەدى اكىم سەرجان ايماقوۆ جۋرناليستەرگە بەرگەن سۇحباتىندا.

ەسكە سالا كەتسەك، 1- قاڭتار كۇنى 22 ساعات 40 مينۋت شاماسىندا قاراعاندى وبلىسىنىڭ توتەنشە جاعدايلار دەپارتامەنتىنە شاحان كەنتىندە كوپ قاباتتى ءۇيدىڭ قۇلاعانى جونىندە ارنايى حابار كەلىپ تۇسكەن. قيراعان ءۇيدىڭ ۇيىندىلەرىنەن 9 ادامنىڭ ءمايىتى تابىلدى. ولاردىڭ 3 ءۋى ەر ادام، 3 ءۋى ايەل ادام، تاعى ۇشەۋى بالالار. ءۇيدىڭ قۇلاۋىنا 4- پودەزدىڭ جەرتولەسىندە ورنالاسقان قازاندىقتىڭ جارىلۋى سەبەپ بولعان.

قۇلاعان ءۇي 1987-جىلى سالىنعان. اپات بولعان پودەزدە 10 پاتەر بولعان. اكىمدىكتىڭ مالىمەتتەرى بويىنشا، ۇيدە 118 ادام تۇرىپ جاتقان. قۇلاعان پودەزدە 25 تۇرعىن، قوناقتاردى قوسا العاندا شامامەن 30 ادام بولعان. شاحاندىقتار ورتالىقتاندىرىلعان جىلۋ جۇيەسى بولماعاندىقتان جىلۋ ماسەلەسىن وزدەرى شەشكەن. بيلىك وكىلدەرىنىڭ مالىمەتتەرىنشە، جاڭا قازاندىق سالۋ جوسپارى 2013-جىلعا قويىلعان. جوبا-سمەتالىق قۇجاتتار دايىندالعانىمەن قارجى ماسەلەسى قولبايلاۋ بولىپ كەلگەن.