مايلى تەرىگە قالاي كۇتىم جاساۋ كەرەك؟

​استانا. قازاقپارات - مايلى تەرى -  ماي بەزدەرى قىزمەتىنىڭ جوعارىلىعىنىڭ بەلگىسى.

مايلى تەرىدە ماي بەزدەرىنىڭ شىعاتىن جەرلەرى، ساڭىلاۋلارى ۇلكەيەدى. سول جەرلەردەن ماي كوپ شىعادى.

سونىڭ اسەرىنەن تەرى مايلى بولىپ تۇرادى. تەر مايى شاڭمەن، كىرمەن قوسىلىپ ماي بەزى شىعاتىپ ساڭىلاۋلاردى بەكىتەدى. تەرىگە مايدىڭ كوپ شىعاتىن مەرزىمدەرى: جىنىستىق تولىسۋ كەزىندە، جۇيكە جۇيەسىنىڭ بۇزىلۋى، ىشكى سەكرەتسيانىڭ بەزى اۋرۋعا شالدىققاندا، اسقازان اۋرۋلارى جانە ت. ب.

ىشەك قۇرتى مەن ەتەككىردىڭ دە اسەر ەتۋى مۇمكىن. اشى جانە جانۋارلار مايى كوپ قولدانىلعان تاماقتار دا تەرىدە مايدىڭ كوبەيۋىنە اكەپ سوعادى. كەيدە كوسمەتيكالىق كرەمدەردى ۇزاق، كوپ قولدانعاندا سويتەدى. جاس ۇلعايا كەلە ماي ءبولىنۋ ازايادى دا، كارىلىك كەلگەندە تەرى مايدان ارىلادى.

كوبىنەسە بەت تەرىسى مايلى بولادى. ونىڭ كوپ جينالاتىن تۇسى ماڭداي، مۇرىن، يەك. مايلى تەرىگە ارنايى كۇتىم كەرەك. مايدى ازايتۋ ءۇشىن كۇندەلىكتى جۋىنۋدان باسقا ءبىر پايىزدىق ءمۇساتىر سپيرتىمەن كۇنىنە بىرنەشە مارتە سۇرتەدى.

مايلى تەرىنى كۇتۋدىڭ العاشقى شارتى -  ونى ماي مەن كىردەن تازالاپ الادى. كۇندە تاڭەرتەڭ سابىندى سۋمەن جۋادى. ەگەر تابىلسا گليتسەرين سابىنىن قولدانسا ءتىپتى جاقسى. مايلى تەرىنى سابىنداپ جوكەمەن جۋعان دۇرىس. جۋىلعان، سۇرتىلگەن تەرىگە ءسال «بارحاتنىي» كرەمىن جاققان ءجون. مۇنداي كرەمدەردى ۇيدە دايىنداپ الۋىڭىزعا دا بولادى. جۇمىرتقانىڭ اعىن كوبىگىن شىعارا ارالاستىرادى. وعان ءبىر اس قاسىق گليتسەرين، جارتى ستاقان سۋ، جارتى ستاقان ءيىس سۋ، ەكى گرامم بۋرا قوساسىز.

جۋىلعان، تازا مايلى بەتتى ازداپ وپالاعان دۇرىس. وپا تەرىنى قورعاپ قانا قويمايدى، تەرىدەن بولىنگەن مايدى ءسىڭىرىپ الادى. ۇيىقتار الدىندا سۋ قوسىلعان ءيىس سۋمەن سۇرتسە دە ارتىقتىق ەتپەيدى. ءبىراق مىنا ءبىز ۇسىنىپ وتىرعان قوسىندى وتە پايدالى: ءيىس سۋ -  40 گرامم، سۋ -  60 گرامم، بور قىشقىلى -  2 گرامم.

تەرىسى مايلى ادامدارعا ءىش قۇرىلىسىنىڭ جۇمىسىن قاداعالاعان ءجون. مايلى تاعامداردى از جەپ، سۇيىقتىقتى كوپ ءىشۋ قاجەت. ەندى بىرنەشە ماسكانىڭ جاسالۋ تاسىلدەرىن ۇسىنىپ كورەيىك:

جۇمىرتقانىڭ سارىسىن الاسىز دا وعان ءبىر شاي قاسىق ليمون شىرىنىن قوساسىز. ارالاستىرا وتىرىپ ۇستىنە كۇنباعىس مايىن قۇياسىز. سويتەپ بەتكە جاعاسىز. وتىز مينۋتتان سوڭ جۋىپ تاستايسىز.

ازداعان اشىتقى الىپ، ونى جىلى سۇتكە نەمەسە قيار شىرىنىنا قوساسىز. بۇل ماسكانى جەتىسىنە ەكى رەت جاساۋ كەرەك.

بور ۇنتاعىن، سۋ، بەس پايىزدىق سىركە سۋىن ارالاستىرىپ، گازى شىعىپ جاتقاندا بەتكە جاعا قوياسىز. 10-15 مينۋتتان سوڭ سۋىق سۋمەن جۋىپ تاستايسىز.

 جاس وسىمدىكتەردەن دە كومپرەستەر جاساۋعا بولادى. الما، كوك سالاتتى، ت. ب. ۇساقتاپ تۋراپ، بەتكە جاعادى دا وتىز مينۋتتان كەيىن جىلى سۋمەن جۋىپ تاستايدى.

سونداي- اق لوسوندار دا پايدالانىلادى. لوسون فرانسۋز ءسوزى، ياعني «سۋارۋ» دەگەن ءسوز. مايلى تەرى ءۇشىن لوسوننىڭ قۇرامىندا: كامفارا، سترەپتوسيد، ليمون قىشقىلى، گليسەرين، سۋ، سپيرت، ساليسيل قىشقىلى بولۋى كەرەك.

كرەم- ماسكالاردى دا ازىرلەۋگە بولادى. كرەم دەگەن اعىلشىن ءسوزى. ول كىلەگەي دەگەن ۇعىمدى بىلدەرەدى. قازىرگى كرەمدەردىڭ نەگىزىندە مايلى زاتتار بار.

دەرەككوز: ماماندار كەڭەسى