ۋنيۆەرسيادادا بىرنەشە قاشىقتىقتا جۇلدە الۋدان ءۇمىتتىمىز - نۇربەرگەن جۇماعازيەۆ
بۇل تۋرالى قازاقستان ۇلتتىق قۇراماسىنىڭ مۇشەسى نۇربەرگەن جۇماعازيەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.
ونىڭ ايتۋىنشا، ءوزى 500, 1000, 1500 مەتر قاشىقتىقتا باق سىناماقشى. سونىمەن قاتار كوماندالاس دوستارى ابزال اجىعاليەۆ، ايدار بەكجانوۆ جانە دەنيس نيكيشامەن بىرگە 5 مىڭ مەتر قاشىقتىقتا ەستافەتالىق جارىستا قازاقستان قورجىنىنا مەدال سالۋعا مۇمكىندىك بار.
دەگەنمەن قارسىلاستار دا وسال ەمەس. ۋنيۆەرسيادادا كورەيا، رەسەي، كانادا، گوللانديا سياقتى ەلدەر مىقتى شورتترەكشىلەرىن بايگەگە قوسپاقشى.
«ۋنيۆەرسيادادان كەيىن بىردەن مينسك قالاسىنا، الەم كۋبوگى كەزەڭىنە اتتانامىز. جەكەلەي سىن ءوز الدىنا، ەستافەتادان الەم چەمپيوناتىنا قاتىسۋ ءۇشىن الەم كۋبوگى كەزەڭدەرىنىڭ قورىتىندىسى بويىنشا ۇزدىك سەگىز كوماندانىڭ قاتارىنا ىلىگۋ كەرەك. مەن ءوزىم شورت-ترەكپەن ون ءتورت جىلدان بەرى اينالىسىپ كەلەمىن. ورالدا جابىق مۇز ايدىنى سارايى اشىلعاننان كەيىن-اق وسى سپورت تۇرىنە كوڭىل ءبولىنىپ، قازاقستاننىڭ ەڭبەك سىڭىرگەن جاتتىقتىرۋشىسى ءمادىعالي قارسىبەكوۆ ءبىزدى جالىقپاي باپتاي باستادى. ءبىز تابىسقا جەتسەك، الدىمەن وسى كىسىنىڭ ارقاسى دەپ بىلەمىن»، دەدى «قازاقپارات» تىلشىسىنە سۇحبات بەرگەن نۇربەرگەن جۇماعازيەۆ.
ەسكە سالا كەتەيىك، وتكەن جىل قازاقستاندىق شورتترەكشىلەر ءۇشىن جەمىستى بولدى. ا ق ش- تىڭ سولت-لەيك-سيتي قالاسىندا وتكەن الەم كۋبوگى كەزەڭىندە ابزال اجىعاليەۆ 500 مەتر قاشىقتىقتا الدىنا جان سالماي، قازاقستاندىق شورتترەكشىلەر اراسىندا تۇڭعىش رەت التىن جۇلدەنى يەلەندى.
ودان كەيىن وڭتۇستىك كورەيانىڭ كاننىن قالاسىندا نۇربەرگەن جۇماعازيەۆ 1 مىڭ مەتر قاشىقتىقتا چەمپيون اتاندى. جالپى، جۇماعازيەۆتەردى سپورتشىلار وتباسى دەۋگە بولادى. 1990-جىلعى نۇربەرگەن قازىر ناعىز دەر شاعىندا. سونداي-اق ونىڭ قارىنداسى، 1999-جىلعى عاليا بولاشاعىنان ۇلكەن ءۇمىت كۇتتىرەدى.
شورت-ترەكپەن اينالىساتىن ول دا قازاقستان چەمپيوناتتارى مەن رەسپۋبليكالىق دودالاردان ۇنەمى ولجامەن ورالىپ ءجۇر. قىسقى ۋنيۆەرسياداعا ب ق و- دان قاتىساتىن ابزال اجىعاليەۆ، ايدار بەكجانوۆ، نۇربەرگەن جۇماعازيەۆ جانە نورۆەگيانىڭ ليللەحاممەر قالاسىندا 2016-جىلى جاس وسپىرىمدەر اراسىندا وتكەن Ⅱ قىسقى وليمپيادا ويىندارىنىڭ قولا جۇلدەگەرى انيتا ناگاي ورالدان ەرتەڭ جولعا شىققالى وتىر.
اۆتور: ەلجان ەرالى
