قاراعاندى وبلىسىندا ءۇيىندى استىندا قازا تاپقاندار جەرلەنەدى
«ۆالەري ميحايلوۆتى جەرلەۋ بۇگىن سارەپت كەنتىندە وتەدى. 60 جاستاعى ەر ادام «كارەم» ج ش س- دا جۇمىس ىستەگەن. ارتىندا جۇبايى مەن ۇلى قالدى»، - دەدى وبلىس اكىمىنىڭ باسپا ءسوز قىزمەتىندە.
گالىشەۆتار وتباسىنىڭ ەكى مۇشەسى 4- قاڭتاردا شاحان كەنتىندەگى زيراتقا جەرلەنەدى. 5- قاڭتاردا شاحاندا ءۇش ادام اجال قۇشقان اندروپوۆتار وتباسىمەن قوشتاسادى.
زەينەتكەر تاتيانا كان 6- قاڭتاردا ۆوسمميدوميكي كەنتىندەگى زيراتقا جەرلەنەدى. روجدەستۆو مەرەكەسى كۇنى، 7 -قاڭتاردا شاحان زيراتىنا ەلەنا الەكسەەنكو ۇلىمەن بىرگە جەرلەنەدى. ەكى قازا تاپقان ەر ادام «تەنتەك» جانە «شاحتينسكايا» شاحتالارىندا جۇمىس ىستەگەن.
ەكى مەرت بولعان ايەل دەكرەتتىك دەمالىستا بالا كۇتىمىمەن اينالىسقان. بۇدان بۇرىن حابارلانعانداي، وبلىستىڭ بيلىك وكىلدەرى شاحان كەنتىندە قۇلاعان كوپ قاباتتى ءۇيدىڭ زارداپ شەككەن جانە قۇربان بولعان تۇرعىندارىنىڭ وتباسىلارىنا ماتەريالدىق كومەك كورسەتەدى، «مەرت بولعان وتباسىنىڭ ءاربىر مۇشەسىنە 1 ميلليون تەڭگە ماتەريالدىق كومەك كورسەتىلەدى. اۋرۋحانادا جاتقان، زارداپ شەككەندەر ءۇشىن 500 مىڭ تەڭگەدەن تولەنەدى»، - دەدى وبلىس اكىمىنىڭ باسپا ءسوز قىزمەتىنىڭ جەتەكشىسى ءاليا سىزدىقوۆا.
اكىمدىك قايتىس بولعانداردى جەرلەۋ مەن اس بەرۋ شىعىندارىن ءوز مويىندارىنا الادى. بۇعان قوسا ءتيىستى زاڭناماعا سايكەس، ارنايى كوميسسيا جۇمىسىنىڭ شەشىمىمەن كەلتىرىلگەن شىعىن بيۋدجەتتەن تولەنەدى.
ايتا كەتەيىك، 1- قاڭتار كۇنى 22 ساعات 40 مينۋت شاماسىندا قاراعاندى وبلىسىنىڭ توتەنشە جاعدايلار دەپارتامەنتىنە شاحان كەنتىندە كوپ قاباتتى ءۇيدىڭ قۇلاعانى جونىندە ارنايى حابار كەلىپ تۇسكەن. وقيعا ورنىنان توتەنشە جاعدايلار قىزمەتىنىڭ كۇش-قۇرىلىمدارى مەن ارنايى تەحنيكالارى جونەلتىلىپ، تۇرعىنداردى ەۆاكۋاتسيالاۋ جۇمىستارى جۇرگىزىلدى.
شاحان كەنتىنىڭ اكىمدىگى جانىنان 87215632417 ءنومىرى بويىنشا، جەدەل جەلى قىزمەتى ۇيىمداستىرىلدى. قيراعان ءۇيدىڭ ۇيىندىلەرىنەن 9 ادامنىڭ ءمايىتى تابىلدى. ولاردىڭ 3 ءۋى ەر ادام، 3 ءۋى ايەل ادام، تاعى ۇشەۋى بالالار.
رەسمي ءتىزىمدى قاراعاندى وبلىسىنىڭ توتەنشە جاعدايلار قىزمەتى ۇسىندى. قۇربان بولعانداردىڭ اراسىندا 2016-جىلى تۋعان ەكى نارەستە بار. 32 جاسار ەر ازامات ۇيىندىلەردىڭ استىنان امان شىقتى. ءۇيدىڭ قۇلاۋىنا 4- پودەزدىڭ جەرتولەسىندە ورنالاسقان قازاندىقتىڭ جارىلۋى سەبەپ بولعان. قۇلاعان ءۇي 1987-جىلى سالىنعان. اپات بولعان پودەزدە 10 پاتەر بولعان. اكىمدىكتىڭ مالىمەتتەرى بويىنشا، ۇيدە 118 ادام تۇرىپ جاتقان.
قۇلاعان پودەزدە 25 تۇرعىن، قوناقتاردى قوسا العاندا شامامەن 30 ادام بولعان. شاحاندىقتار ورتالىقتاندىرىلعان جىلۋ جۇيەسى بولماعاندىقتان جىلۋ ماسەلەسىن وزدەرى شەشكەن. بيلىك وكىلدەرىنىڭ مالىمەتتەرىنشە، جاڭا قازاندىق سالۋ جوسپارى 2013-جىلعا قويىلعان. جوبا-سمەتالىق قۇجاتتار دايىندالعانىمەن قارجى ماسەلەسى قولبايلاۋ بولىپ كەلگەن.
قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قاراعاندى وبلىسىنىڭ شاحان كەنتىندە بولعان توتەنشە جاعدايعا بايلانىستى كوڭىل ايتتى. ەلباسى قاراعاندى وبلىسىنىڭ اكىمىنە، سونداي-اق ۋاكىلەتتى مەملەكەتتىك ورگاندارعا زارداپ شەككەن تۇرعىنداردىڭ بارىنە جان-جاقتى كومەك كورسەتۋ ءۇشىن ءتيىستى شارالار قابىلداپ، توتەنشە وقيعانىڭ سەبەبىن انىقتاۋ جونىندە تاپسىرما بەردى.
