ماعان الاتاياق قاجەت - جول پوليتسياسى قىزمەتكەرى

استانا. قازاقپارات - بيىلدان باستاپ قازاقستاننىڭ جول- پاترۋلدىك پوليتسەيلەرى الاتاياقتارىن تاستاپ، جول قوزعالىسى ەرەجەلەرىن بۇزعانداردى تەك اۆتوپاترۋل ارقىلى عانا توقتاتۋعا كوشىپ وتىر.

جول قيىلىسىنداعى قوزعالىستى رەتتەۋ جۇمىسى دا الاتاياقسىز جۇرىگىزىلۋى ءتيىس. قازاقپارات تىلشىسىنە سۇحبات بەرگەن جول- پاترۋلدىك پوليتسيا قىزمەتكەرى جاڭا جىلداعى جاڭالىقتىڭ اسەرىمەن ءبولىستى. الايدا ءوز اتىن جازباۋدى ءوتىندى.

«شىنىمدى ايتسام، ءوزىڭدى ءبىرتۇرلى سەزىنەدى ەكەنسىڭ. قولدا الاتاياقتىڭ بولعانىنا ۇيرەنىپ قالعانسىڭ عوي. اسىرەسە، جول قوزعالىسىن رەتتەگەندە الاتاياقتى اينالدىرۋعا ۇيرەنگەنبىز. سوسىن كولىكتى قولمەن توقتاتقانى دا قىزىق. ەندى، قازىرگى جاڭالىققا دا ۇيرەنەتىن شىعارمىز. دەگەنمەن، الاتاياق قاجەت دەپ ويلايمىن. الاتاياقتىڭ ىشكى جارىعى بولعاننان كەيىن تۇنگى ۋاقىتتا انىق كورىنەدى. ونسىز بوراندى كۇنى نەمەسە دالانى تۇمان باسقاندا جول قوزعالىسىن رەتتەۋ قيىن. كولىك جۇرگىزىشۋلەرى مەنىڭ قانداي بەلگى بەرىپ تۇرعانىمدى كورمەي قالۋى ابدەن مۇمكىن. بىلمەيمىن، بىزگە جارىققا شاعىلىساتىن قولعاپ بەرەتىن شىعار. سوندا جول- پاترۋلدىك پوليتسيا قىزمەتكەرىنىڭ بەلگىسى انىق كورىنەدى»، - دەيدى ول.

ايتا كەتەيىك، 1 -قاڭتاردان باستاپ ەلىمىزدەگى جول- پاترۋلدىك پوليتسيا قىزمەتكەرلەرى تولىعىمەن اۆتوپاترۋلگە اۋىستى. بۇدان بىلاي كوشەدە ەرەجەنى بۇزعان كولىك جۇرگىزۋشىلەرىن الاتاياقپەن توقتاتۋعا رۇقسات جوق. قالا سىرتىنداعى بەكەتتەردە ماشينانى توقتاتۋعا بولادى. الايدا سونىڭ وزىندە پوليتسيا قىزمەتكەرى قولمەن بەلگى بەرۋى ءتيىس.

اۆتور: ارمان اسقاروۆ