جاڭا جىل كۇنگى جاعىمسىز جاڭالىقتار
ايدىڭ العاشقى كۇنى باستالماي جاتىپ، تۇركيادا جارىلىس بولدى. Reina تۇنگى كلۋبىندا جاڭا جىل ءتۇنى اياز اتانىڭ كيىمىن كيگەن بەلگىسىز بىرەۋ 700-800 ادام جينالعان كلۋبتا مەيرامدى تويلاپ جاتقان جاندارعا وق اتتى. سونىڭ سالدارىنان 39 ادام قايتىس بولىپ، 70 كە جۋىق ادام جارالاندى.
Anadolu اگەنتتىگىنىڭ حابارىنا قاراعاندا، قايتىس بولعاندار مەن جارالانعانداردىڭ اراسىندا ساۋد اراۆيا، ليۆان، موروككو، ليۆيا مەن بەلگيانىڭ ازاماتتارى بار. وقىستان وققا ۇشقانداردىڭ جارتىسىنا جۋىعى شەتەلدىكتەر بولىپ شىقتى.
* * *
سونداي- اق جاڭا جىل ءتۇنى ىستامبۇل مەشىتىنە ەركىن ەنگەن بەلگىسىز ءبىر ادام وق اتىپ، سونىڭ سالدارىنان ەكى ادام جاراقات الدى. پوليتسيا قازىرگى تاڭدا قىلمىسكەردى ۇستاۋ ءۇشىن بارلىق امال - شارالاردى جۇزەگە اسىرۋ ۇستىندە.
* * *
برازيليانىڭ وڭتۇستىك شىعىسىنداعى كامپيناس قالاسىندا جاڭا جىلدى تويلاۋ كەزىندە ءبىر ەر كىسى ۇيگە باسا كوكتەپ كىرىپ، وق اتقان. بۇرىنعى ايەلى مەن ونىڭ تۋىسقاندارى مەيرامدى اتاپ ءوتىپ جاتقان ساتتە «كۇيەۋ بالانىڭ» وقىستان اتقان وعىنان وتباسىنىڭ ونداعان مۇشەسى قايتىس بولعان. Associated Press باسىلىمىنىڭ جازۋىنا قاراعاندا، قىلمىسكەر ارتىنان ءوز- ءوزىن اتىپ، ول دا و دۇنيەلىك بولعان.
* * *
31 -جەلتوقسان كۇنى تۇنگى ساعات 12 گە جاقىنداعان ساتتە كنياز دميتري رومانوۆ قايتىس بولدى. وتكەن عاسىردىڭ باسىندا رەسەيدە پاتشا تاقتان قۇلاتىلىپ، قۋدالاۋ مەن قىسىم كورسەتۋ باستالعان شاقتا ونىڭ اتا-باباسى ەميگراتسياعا كەتكەن. دميتري رومانوۆ يمپەراتور نيكولاي I دىڭ شوبەرەسى بولىپ تابىلادى.
ءومىرىنىڭ سوڭعى جىلدارىندا دانيادا تۇرعان ول رومانوۆ اتىنداعى ارنايى قور قۇرىپ، رەسەيدەگى اۋرۋحانالار مەن بالالار ۇيىنە قايىرىمدىلىق جاساۋمەن اينالىسقان.
* * *
لوندون قالاسىندا جاڭا جىل كۇنگى كەشتە ەلدىڭ قاۋىپسىزدىك جانە قۇقىق قورعاۋ ورگانى وكىلدەرى مەن پوليتسيا قىزمەتكەرلەرى ۇلكەن قاۋىپتىڭ الدىن الدى.
ۇلى بريتانيانىڭ قاۋىپسىزدىك قىزمەتىنىڭ حابارلاۋىنشا، «يسلام مەملەكەتى» ۇيىمىنىڭ سودىرلارى جۇرتشىلىق شوعىرلانعان جەرلەردە حيميالىق شابۋىل جاساماق بولعان.
* * *
جاڭا جىل جاقىنداعان ساتتە يندونەزيانىڭ جاعالاۋىندا كەتىپ بارا جاتقان كەمەدان ءورت شىقتى. توتەنشە وقيعانىڭ سالدارىنان 10 ادام جاراقات الىپ، 23 ادام قايتىس بولعان. قازىرگى تاڭدا وقىس وقيعانىڭ سەبەپ- سالدارى انىقتالۋدا.
* * *
وڭتۇستىك كورەيانىڭ Lockheed P-3CK اسكەري ۇشاعى ۇشىپ بارا جاتىپ، تەڭىز ۇستىنەن اياق استىنان سنارياد تاستاۋعا ءماجبۇر بولعان. توتەنشە جاعدايلار جونىندەگى باسقارما مۇنىڭ سەبەبىن كەيىن تۇسىندىرگەن. ۇشقىشتار قاتەلەسىپ، باسقارۋ جۇيەسىندەگى ءبىر نۇكتەنى بايقاۋسىزدا ساۋساعىمەن باسىپ قالعان كورىنەدى. ءبىراق جارىلعان سناريادتان زارداپ شەككەن ەشكىم جوق.
* * *
جاڭا جىل كۇنى تاڭەرتەڭ ءوز قىزمەتىن تاپسىرىپ، ۇيىنە قايتىپ كەلە جاتقان ساتتە بۋرۋنديدىڭ قورشاعان ورتانى قورعاۋ ءمينيسترى كىسى قولىنان قازا تاپتى. قازىر وعان قارسى وق اتقان ايەل ادام ىزدەستىرىلۋدە.
* * *
باۆاريانىڭ باد- گريەنەنباح قالاسىندا ءىرى جول- كولىك وقيعاسى ورىن الىپ، التى ادام قايتىس بولدى.
جاڭا جىلدىڭ تۇنىندە بولعان جول اپاتىنىڭ سەبەبى قالىڭ تۇماننىڭ سالدارىنان ورىن العان. ونداعان اۆتوكولىكتىڭ سوقتىعىسىنان التى ادام قايتىس بولىپ، 17 ادام جاراقات العان
* * *
قىتايدىڭ شانشي قالاسىنداعى قوعامدىق اجەتحانادا جارىلىس بولىپ، 1 ادام قايتىس بولدى. گاز قۇبىرىنىڭ جارىلۋىنان سونداي-اق 7 ادام زارداپ شەكتى.
بەرىك بەيسەن ۇلى
«ايقىن»
