شاحاندا قيراعان تۇرعىن ۇيگە قاتىستى قىلمىستىق ءىس قوزعالدى
«ت ج دەرەگىنە قاتىستى ماتەريال ق ر ق ك- نىڭ 292-بابىنىڭ 3 -تارماعى (ادام ولىمىنە اكەپ سوقتىرعان ءورت قاۋىپسىزدىگى تالاپتارىن بۇزۋ) بويىنشا سوتقا دەيىنگى تەرگەۋ جۇمىستارىنىڭ تىزىلىمىنە تىركەلدى»، - دەپ حابارلادى قاراعاندى وبلىستىق ءى ءى د باسپا ءسوز قىزمەتى. بۇعان دەيىن حابارلانعانداي، ءۇيىندى استىنان 9 كوز جۇمعان ادامنىڭ دەنەسى ارشىپ الىندى. ونىڭ ۇشەۋى ەر ادام، ۇشەۋى ايەل، ۇشەۋى بالا.
بالانىڭ بىرەۋى 2016 -جىلعى، ەكىنشىسى 2010 -جىلعى. «تۇرعىن ءۇي قازاندىقتىڭ جارىلۋىنان قۇلاعان. شاحانداعى ءبىرقاتار تۇرعىن ۇيلەرگە جىلۋ اۆتونومدىق جۇيە ارقىلى بەرىلەدى. بۇل قازاندىق ءۇي كوميتەتىنىڭ ەسەبىندە بولدى»، - دەپ ءمالىم ەتتى وبلىس اكىمى نۇرمۇحامبەت ابدىبەكوۆ جۋرناليستەرگە بەرگەن سۇحباتىندا.
ول توتەنشە جاعدايدىڭ سالدارىن جويۋ جانە سەبەبىن انىقتاۋ بويىنشا وبلىستىق كوميسسيا قۇرىلعانىن جاريالادى. اكىمنىڭ ايتۋىنشا، رەسپۋبليكالىق كوميسسيا قۇرۋ جوسپارلانۋدا. ت ج ورنىندا ىزدەۋ- قۇتقارۋ جۇمىستارى جالعاستىرىلۋدا. «مىندەتىمىز ادامداردى انىقتاۋ ءۇشىن ۇيىندىلەردى تازالاۋ جۇمىستارىن اياقتاۋ»، - دەپ اتاپ ءوتتى ءوڭىر باسشىسى.
ازىرگە، ءبىر ادام ءۇيىندى استىندا قالىپ قويعان. ازىرگە بەلگىلىسى، بۇل كوپقاباتتى ۇيدە 118 تۇرعىن مەكەندەگەن، ال ت ج ورىن العان كەزدە قۇلاعان بولىكتە شامامەن 30 ادام بولعان. تۇرعىنداردىڭ كوبىسىن تۋىستارى سىرتقا شىعارىپ ۇلگەرگەن.
سونىمەن قاتار، باسپاناسىز قالعاندارعا بالاباقشانىڭ عيماراتىندا تۇرۋعا مۇمكىندىك بەرىلدى. ساعات 8:12-دە قيراعان ءۇيىندىنىڭ استىنان ءتىرى قالعان 32 جاستاعى ەر ادام قۇتقارىلدى. ۇيىندىلەردى تازارتۋعا 280 ادام جۇمىلدىرىلعان، ولاردىڭ قاتارىندا قۇتقارۋشىلار، پوليتسيا قىزمەتكەرلەرى، جەرگىلىكتى اتقارۋشى ورگاندار، جەدەل مەديتسينالىق جاردەم بريگاداسى، ۇلتتىق ۇلاننىڭ 52859 اسكەري ءبولىمىنىڭ اۋىر تەحنيكاسى جانە جەكە كاسىپكەرلەر بار.
سونىمەن قاتار، قاراعاندى وبلىسى شاحتينسك قالاسىنا قاراستى شاحان كەنتىندەگى تۇرعىن ءۇيدىڭ قۇلاۋ وقيعاسىنا قاتىستى شاحان كەنتى اكىمدىگى قاسىنان شۇعىل جەلى اشىلدى: 8 (72156) 3-24-17. ەسكە سالا كەتەيىك، 1 -قاڭتار كۇنى 22:40-تا قاراعاندى وبلىسى ت ج د قۇتقارۋ بولىمىنە شاحتينسك قالاسى شاحان اۋىلىنداعى كوپقاباتتى ءۇيدىڭ ءبىر بولىگى وپىرىلىپ تۇسكەنى تۋرالى قوڭىراۋ شالىنعان.
وقيعا ورنىنا شۇعىل تۇردە ت ج د قۇتقارۋشىلارى جونەلتىلىپ، تۇرعىندار ەۆاكۋاتسيالاندى. اۋەلى 1 ادامنىڭ ءمايىتى ءۇيىندى استىنان شىعارىلعان بولاتىن. كەيىن ەكىنشى تۇرعىننىڭ دەنەسى ءۇيىندى استىنان تابىلدى.
